Wenía 49 - Yové Koĩni Vana

Jacopa ãwẽ vakerasĩ vana roapa ato netãti ivo yoã

¹ Askávaíki txipo, Jacopa ãwẽ vakerasĩ kenavaíki kãtxivarãsho, “mato neskákatsa”, ato apáki.

² “Vakerasĩní, vana nĩkãi verína. Mato ẽ vana aká nĩkãtsoma.

³ Rúbení, miaro ẽ vake vevoké, veroneshõ mestẽ tsã ikimanamãsho mia ẽ merati. Miaro vake kakataiya, mestẽpa ivo.

⁴ Askámẽkĩ waka koviinatõ ikí mĩ niásho, rama mia kakáyatĩpa. Awesainãma, ẽ anõ piá ivo, anõ eséyakĩma, mĩ meskomtákatá.

⁵ Askámaĩnõ Simeãonĩ Leviro, kewãa anõ atõ pakaya toĩtirívi.

⁶ Atonĩ askátõ ea takékatsikíma, atõ vanarasĩ ea nĩkãkatsikíma aká. Awesainãma, ichná akĩ chinãki, yorarasĩ keyomtávo, txasho vene ati akĩ tewẽ shatemtávo aká.

⁷ Atõ chinã voró ivo ea roa akáma. Israel maĩsho arírvi ato shokõpakénõ, anosho ato ẽ peás anõ.

⁸ Askámaĩnõ, Judapá, miaro mĩ takevõ minõ kakataiyakĩ mia oĩkatsavo. Mivé rawíkinanãyavo miãse ato mĩ akatsai. Mivé merávo mia veyó vetĩ ipákatsavo.

⁹ Mia leão vake keská. Yoini yamamavaikĩ enevarãi mia omíska. Rakápakéi ikítõ mia imíska, ãwẽ aĩ keská, tsoa rakésmatõ vesõtirá?

¹⁰ Wino toĩatõ akĩ enekima mĩ toĩkatsa, mĩ revomaa yorarasĩ askásevi, aaivo toĩki, enetĩpa ikivo, ã ivo oátishõki. Askái aaro maitiósho ashkãsho yorarasĩni nĩkãtanaa niá ikatsai.

¹¹ Ãatõro ãwẽ jumento uva vanapa neshakatsa. Askávaíki ãwẽ õporasĩ vinho enẽ txakakatsa.

¹² Ãwẽ vero imika, uva ene keská ikatsai. Ãwẽ shetaro pashaka, leite keská ikatsai.

¹³ Askámaĩnõ Zebulomro waka kaya kesó shaváyakatsai. Ano rãtxa neshéi vẽ vẽa ikatsai, ãwẽ mai Sidomnamã kesoa ikatsai.

¹⁴ Askámaĩnõ Issacarro jumento keská, mestẽkasho papí tava rakáa, papikatsiinã.

¹⁵ Mai roapa merasho, teneimai mee ikiya ikatsai.

¹⁶ Askámaĩnõ Dãro ãwẽ wetsamavorasĩ vesosho kakáyai nikatsai, Israel vake wetsase ikítõ ikí.

¹⁷ Aaro rono, vai pasó rakásho cavalo tapóshki ãwẽ nachamaĩnõ yora matxi tsaóa ivo naso rakáinásho pakékawãkatsa”, ato akĩ.

¹⁸ Askávai vanai. “Ase Yavepá, ea mĩ pashamáa ivo ẽ manáai”, akĩ.

¹⁹ Askávaíki ato tanamaóki. “Gadero kerõmavorasĩni yamamakatsímaĩnõvo, nerishõ ãatõse atõ poshómaĩnõ, kopiki ato txivãvaĩkatsa.

²⁰ Askámaĩnõ, Aserro piti roapa ivõ mãaimai, kakáyatõ piti naí ashõya ikatsai.

²¹ Askámaĩnõ, Naftaliro nĩi txasho keská, kenétámasho ato saí imai, metsápai niaya.

²² Askámaĩnõ, Joséro waka kesó vaná vimiyãwa niá keská. Ãwẽ meã kene matxi votĩ ikí oá keská.

²³ Tawayavorasĩni onikĩ chinãki yamamakatsikí. Askái ichnáki chinãki atõ tekõkatsímaĩnõ

²⁴ ãwẽ kãti kewikesho nii, yometakĩma mestẽkarãsho ato tekõkatsikí. Awesáma, ẽ Yové Weeya Ivõ, Israel yorarasĩ vesoya, ato teashoaya akámẽsho ã ikí.

²⁵ Askávaíse Yové Koĩni mia take atikĩra. Yové Weeya ivõ askásevi vana roapa netãtikĩra. Naí shavapa ivorasĩ askásevi, vana roapa netãi, maĩ aaivorasĩ askásevi, vana roapa netãi, anõ revotirasĩ, shoma, vakenãti aatiisho askásevi, netãi, atikĩra.

²⁶ Naaivo vana roapa mia ẽ netãro ẽ papavõ vana ẽ tavakepái, mató ipawarasĩ keyósma ivo keská. Askái naaivo vana roapatõ mĩ takevo ãtsakamẽkĩ mia ivo kavẽsho netãtikĩ irawẽ.

²⁷ Askámaĩnõ, Benjamimro lobo onika keská. Shavá nakoki pivaikĩ yãtã ãwẽ piti ivo oshkevakĩsho tsaõkatsa”, iinã ato yoãshokĩ Jacopa.

²⁸ Naa 12 yoraro, yora shoko wetsa shovii, yora shoko wetsa shovii, apávo. Askáinã atõ papã vana roapa, atõ ikatsai ivorasĩ aká katseki ato netãpakéki.

²⁹ Ato aská apavaíki txipo Jacopa neská akĩ ato tanamaóki. “Ẽ papavo ẽ merai kakatsai. Atonĩkĩ ea atsoma oneki, shasho pepi sawéatõ, heteu yora Efrom nipawanamã.

³⁰ Aaivo pepiro Macpelanamã, Manre orakama, Canaã mai naki, Abraãone Efrom heteu yora, kopímashõ viãkãti ivo, anõ yora vopimaĩnõ oneti mai.

³¹ Ano Abraão, ãwẽ aĩ Sara, Isaque, ãwẽ aĩ Rebeca aatii onéa, askávaíse, Lia anosevi onei ẽ ayãtá.

³² Atõ mai, atõ shasho pepi akárasĩ õsiki heteu yorarasĩ, Abraãone kopímashõ ato viãkãti”, ato akĩ.

³³ Aská akĩ ãwẽ vakerasĩ ato yoãshokĩ mashtevaĩvaíse, namékaĩi, ãwẽ papavo merai kati.