Wenía 45 - Yové Koĩni Vana

José ãwẽ takevõ onãti ivo yoã

¹ Aská anosho, José, anõ ato ã pãtea ivo, aa mee ishõyavorasĩ veyósho tenetĩpa tanainã, isĩinasho vanainái. “Ea veyó shokotsomároa, sherévãna”, ato ãwẽ amaĩnõ, katsése voávo. Askánamãsho “eanã Josétsikĩ”, iinã ãwẽ takevo yoãshokĩ.

² Askái isĩinasho ãwẽ wai imaĩnõ, Egito yorarasĩni nĩkãvaíki atõ yoãmaĩnõ, Faraopa nĩkãóki.

³ Aská anosho ãwẽ takevo yoãshokĩ. “Eanã Josétsikĩ. Papanã vopima niisrá?” iinã ãwẽ vanamaĩnõ, ãwẽ takevõ ratéki, revíma ikívo.

⁴ Askávai vanai. “Neripáchta verína”, ãwẽ imaĩnõ aa orakamapa shokoi voávo. “Eanã Josétsikĩ. Matõ take, yorarasĩ inãki, enõsho kopímati mã vimaĩnõ, Egito mainamã ea atõ vivarãti ivotsikĩ.

⁵ Askámaĩnõ ramaro ‘awesakĩ neno, José yora inãsho, anõsho nõ kopímati viyãtákĩ’, iinã maríse naí akĩ chinãtsomároa. Vevosho ‘mato shavá amanoshõ’, iinã ea yonotirívi neno, Yové Koĩni.

⁶ Askásho rama piti makia vari ravévakĩ ma tavái. Ramaro 5 varikase iyakea, yorã wai aká, piti ikítĩpá.

⁷ Askáinã Yové Koĩni ‘yora keyóa teshe vevosho pashamakĩ, minõsho ato ẽ shavá amakatsa’, iinã neri maĩ ea ãwẽ yonotirívi.

⁸ Matomarívi neno Egito maĩ ea yonomtáya, Yové Koĩni ea ayãtárvi yonoki. Aská akĩ Faraopa ãwẽ avé chinãne takéa ea shovimai, kakáyatõ shovo vesomaí, Egito maitio kakáya shovimaí ashõ ea nitxĩkemtá.

⁹ Ramaro rayá papa yoãshotãna. ‘Mĩ vake José neskái vanai’, atsoma. ‘“Yové Koĩni Egito maitio akĩ kakáya ea nitxĩa ẽ niá. Rayá ea oĩrí, inokaroa.

¹⁰ Ea orakama Gósen mainamã mia nitxĩnõ. Mia, mĩ vakerasĩ, mĩ shokóvo, mĩ txivorasĩ, mĩ txashorasĩ, mĩ awe roaparasĩ aatiiyaíse otso.

¹¹ Mĩ askákarãmaĩnõ mia ẽ vesokatsa. Awesáma, 5 varikase iyakea, piti makia shavá. Mã askávarãma ivoro, mia, mĩ vakerasĩ, mĩ inárasĩ aatii mã onís awekatsa”, ikikatá’, akĩ yoãshotãtsoma.

¹² Aská akĩ Benjamimnĩsho ashkãsho ea mã verõ tsakaaivere. ‘Ea Josévere’, neskái matonĩ vanaya.

¹³ Askávaíse vana wetsa papa yoãóshokĩro neská atsoma. ‘Mĩ vake Egitonamãsho anõ esayakĩpá oĩmtsãwavo’, iinã mã oĩa ivorasĩ keyoki yoãshoi atsoma. Aská akĩ rayá neri ẽ papa ea ewevarãshotsoma”, ato akĩ.

¹⁴ Askávai José ãwẽ take Benjamimnĩ tetsõnanãvaĩsho wai ikívo.

¹⁵ Askáki ãwẽ takevo katseki ato mekí apái wai ikí. Askámaĩnõ txipo ãwẽ takevo avé vanavo.

¹⁶ Askái “Josepa takevo veavo”, ikí Faraopa shovonamã kaká nĩkãinã, Faraó, ãwẽ mee ima ivo yorarasĩ aká anõ mekívo.

¹⁷ Askáinã Faraopa, “mĩ takevo neská atso”, iinã José tanamakĩ. “Matõ inárasĩ papimavai, Canaã mainamã votãna.

¹⁸ Askátani iovarãtsoma, matõ papa, matõ wetsamavorasĩ aatíi. Egito mai kashke roapa ivo ato ẽ inãkatsa, anõ marí piti merámashõ roa akĩ pii shokonoshõ.

¹⁹ Askáki nenosho anõ kawitirasĩ vivaĩtana, anõ matõ aĩvorasĩ, matõ vakerasĩ, matõ papa aatii kawivarãnoshõ.

²⁰ Ari matõ awe ichnárasĩmẽ tsakátsomároa. Awesainãma, Egito mainamã roapa ivorasĩ mato aya ikatsai”, akĩ Faraopa.

²¹ Askámaĩnõ Israẽl vakerasĩni aská akávo. Faraopa “ato aská ashõtso”, iinã yonomaĩnõ ashõki, anõ kawitirasĩ inãi, vokĩ atõ vaĩsho piti inãi ato akĩ Josepa.

²² Aská avaikĩ, õpo venákarasĩ ato katseki inãpakéki, askámaĩnõ Benjamim ivoro kopímati shasho prata 300 inãi, õpo venáka 5 inãi akĩ.

²³ Askámaĩnõ ãwẽ paparo Egito maĩ awe roapa ivorasĩ 10 jumento papimavaikĩ yonoshokĩ. Aská avaikĩ 10 jumento aĩ, trigo, pão, vaĩ okĩ ãwẽ piti ivo aatii papimaovaíki yonoshokĩ.

²⁴ Askái anosho ãwẽ takevõ enevaĩkatsímaĩnõ, “Vaĩsho vatxinanãkõvaĩtsomároa”, akĩ ato vana akĩ.

²⁵ Askái anosho Egitonamãsho wenívaĩi voí, Canaã atõ papa Jacó niánamã nokóvaĩsho

²⁶ yoãshoávo. “José vopima, niisa. Egito kakáyatõ yonoa maitioi kakáyasevi niá”, ikĩ yoãmaĩnõvo, Jacó ãwẽ chinã ratéktãwãki atõ yoã tanaki.

²⁷ Askámaĩnõ Josepa vana katseki atõ yoãshomaĩnõ, ã vakẽ anõ kawitirasĩ yonoshovai oĩinã, ãwẽ chinã matsipakevaí mekíi.

²⁸ “Ii anõserá! Ase, ẽ vake José vopima taíse. Ẽ vopiti vevochta ẽ oĩi kanõ askáro”, ikí vanai.