Wenía 42 - Yové Koĩni Vana

Josepa takevo Egitonamã veti ivo yoã

¹ Jacopa, Egito mainamã trigo aya ikí nĩkãinã, “awesainã mã manaknanãrá?

² Egito mainamã piti aya iki. Kopímashõ ano vitãna, noke shopĩni tenãmísi”, iinã ãwẽ vakerasĩ yonoki.

³ Ato ãwẽ aská akatõsho, Josepa takevo 10 voávo, Egito mainamã trigo kopímashõ nõ vinõ iinã.

⁴ Askámaĩnõ Jacopa, Benjamim, Josepa take ivoro, atonĩkĩ yonoma, aaivoro ichnák pakémísi iinã.

⁵ Askái Israẽl vakerasĩ, yora wetsarasĩnĩ trigo kopímashõ nõ vinõ iinã õsíketashõ voávo. Awesáma, Canaã maitioi ashkã pikatsikívo.

⁶ Aská aatiã Joséro Egito maĩ kakáya, mai wetsãsho vẽ vẽyavo yorarasĩ ashkã akĩ ato piti inãki, kopímati viaya. Askámaĩnõ Josepa takevo, nokóvaĩsho, aa veyó maĩ vetsek ipásho masoi voávo.

⁷ Atõ aská tachimaĩnõ, Josepa ato onãsmẽinã, matsíshóse ato oĩki. Askáki vana mestẽnése ato ainakĩ ato nĩkãki. “Atosho mã veárkĩ?” ãwẽ imaĩnõ, “Canaã mainamãshõ nõ veá, piti kopímashõ mia viãnõ iinã nõ vea”, akĩ revívo.

⁸ Awesáma, Joseparo ãwẽ takevo ato onãsmẽkĩ, ãwẽ takevokiríshoro onãma ikívo.

⁹ Anosho José ãwẽ takevo, ãwẽ namámta ivokiri chinãsho vanai. “Matoro vevosho onésho verõ akaya yorarasĩrvi, mato. ‘Atonamã vesótamara, nõ oĩnõ’, iinã mã veárvi”, ato akĩ.

¹⁰ Askái ãwẽ vanamaĩnõ, anõ eséyakĩ revívo. “Askáma, askátõ inõ iinã nõ veámarívi. Piti kopímashõ mia viãnõ iinã nõ veárvi.

¹¹ Nokẽ nõ paparo westíserívi. Nokero oné iti chinãsmarvi. Noke vevosho onésho aská verõ akí nõ shokomarvi”, akávo.

¹² Atõ aská akámẽkĩ, “Askáma! Nokẽ mai, atokiri vesótámará iinã, verõ anõ iinã mã veátivesóka”, akĩ ato revíki.

¹³ Aská akĩ ato ãwẽ revímaĩnõ, “Nokẽ papa westíchta. Canaã mainamã nishõ, ãwẽ meraa, nokẽ take venevake katsésero 12. Txipokéchtaro shovõse, papanĩ niakevai, askámaĩnõ wetsãro noke ma eneya”, iinã atõ chinã tanáipakésho revívo.

¹⁴ Atõ askámaĩnõ Josepa, “aská ẽ ikitĩ, matoro vevosho onésho verõ akayavorasĩ mato.

¹⁵ Askáro, anõseraki mato ẽ oĩnõ. Matõ take txipoke neno ãwẽ oáma ivoro, Faraómẽsho ea mato imavaĩotĩpávere.

¹⁶ Mato wetsase kashõ, matõ take txipoke eweta. Askámaĩnõ ravéro, nenose kepókatsavo, anõise mã vanaraki ẽ oĩnõ iinã. Mã yoa ivoro, mato vevosho onésho verõ akayarasĩ ẽ tanaskatsa. Faraómẽsho ẽ chinã tekítĩpavere”, akĩ.

¹⁷ Askáki anosho 3 shavá ato kepoki.

¹⁸ Askái 3 shavá nokómaĩnõ, ato vana akĩ. “Yové Koĩ rakéshoi niá ea, askásho ‘noke vopimísi’ iinãro, neská atsoma.

¹⁹ Mato oné iti chinãsma yoraro, matõ take wetsa kepóa shovo nakise enena. Ravétõro matõ wetsamavorasĩ shopĩni tenãmísivo iinã trigo vivaĩtana.

²⁰ Askátani vekĩ matõ take txipoke ivo ewevarãtsoma, anõise mã vanaraki ẽ oĩnõ. Mã aská akáro, mato keyótĩpá”, ato akĩ.

²¹ Ato ãwẽ askámaĩnõ, “ase, nõ aská anõ”, iinã arímamẽ chinãmakinanãvo. “Nokẽ take nõ aská ayãtatõsho, noke yostáai. Ãwẽ onís awea oĩsmẽinã, ari noke nĩkãma iyãtá, askásho ramaro noke onís aweóai”, ikívo.

²² Atõ askámaĩnõ, Rúbeni ato vana akĩ. “Vake aská atsomároa ẽ ikímẽkĩ eakiri mato nĩkãma iyãtátĩ. Nõ aská ayãtásho, ramaro noke kopitáai”, ato akĩ.

²³ Askái atõ vana Josepa tanamaravã akávo, yora wetsãse ãwẽ vana teki aka oĩinã.

²⁴ Askái José, ano nishõ kayasho onésho wai itãi oshõ atonĩ vanaói oí. Askáki Simeão ivo kavẽvaíki ato veyósho menéshmakĩ.

²⁵ Askáki Josepa ãwẽ mee ishõyavo yonoki. “Sacõ trigo matá avaikĩ, atõ kopímati, arimẽse trigo matxi ato naneshopátsoma. Vaĩsho ave pinõvo iinã pitichta ato inãpakéi atsoma”, akĩ ato ãwẽ yonomaĩnõ, ãwẽ yonoa keskáse ashõvo.

²⁶ Ato ãwẽ aská ashõmaĩnõ, Josepa takevo, trigo atõ viá ivorasĩ jumento matxi potaníi, avai voávo.

²⁷ Askávai voí, yãtamaĩnõ, oshakatsiinã, wetsã jumento pimakatsiinã ãwẽ saco vepẽpakéki naki kopímati tĩi ikí meravaíki

²⁸ ãwẽ takevo yoãshokĩ. “Ii, naaro oĩtana, kopímati arimẽse ea inãaivo, neno naki nanéa ẽ meraai”, ãwẽ imaĩnõ ashkãse ratéi tari ikívo. “Ii, awesa wetsakarkĩ. Yové Koĩni noke awesa akíkĩ?” ikívo.

²⁹ Askái Canaã mainamã atõ papa Jacó niánamã nokóvaĩsho, atõ oĩvai ivorasĩ katseki yoãshoávo.

³⁰ “Ano Egito mainamã niaya kakáyã, vana mestẽnése noke avaikĩ, ‘nokẽ mai vevosho onésho verõ akí mã shokorá’, noke avai.

³¹ Noke ãwẽ askámaĩnõ neská akĩ nõ revívai. ‘Noke oné ikí aská verõ akí nõ shokomarvi.

³² Nokẽ papa westíchta nishõ, ãwẽ meraa, nokẽ take venevake katsésero 12. Wetsaro yama, noke eneya, askámaĩnõ txipoke ivoro Canaã mainamãse papanĩ niakevai’, nõ akátõsho,

³³ kakáyatõ noke neská avai. ‘Mato oné iti chinã ayaraki ẽ oĩnõ. Matõ take wetsa ea eneshovainii, mato ravéro piti vivainii, matõ shavapa mã voá roase.

³⁴ Askámaĩnõ matõ take txipoke ivoro neno ea ewevarãshotsoma. Mã askámaĩnõro mato ẽ tanakatsa, “vevosho onésho verõ akí oné iti chinãi atõ shokomarvirá?” ikĩ onãtakĩ mato ẽ oĩkatsa. Askávaíkiro matõ take mato kepẽshoi, neno maĩ pokéi veshõ, awe viãnanãi mã akatsai’, iinã noke askávai”, akávo.

³⁵ Askávaíki atõ vivaĩa ivo sacorasĩ reokekéki, kopímati rakorasĩ trigo naki tĩi ikí meravo. Askáki kopímati rakorasĩ tĩi ikí meravai, atõ papanĩ rakévo.

³⁶ Aská oĩinã atõ papa vanai. “Awesainã vakerasĩ ea mã keyõvaĩtsikírá? José yama, Simeão yama aká. Ramaro Benjamim ivo ea mã viãvaĩkatsíki. Awesainã ekise mã vesokekérá?” ato akĩ.

³⁷ Askái ãwẽ vanamaĩnõ Rúbeni ãwẽ papa aská akĩ. “Ẽ ewevarãma oĩinã, ẽ vake venevake ravé ashõ yamamanosho. Yonose, eã roakakĩ vesosho ẽ ewevarãkatsa”, ãwẽ imaĩnõ,

³⁸ “ẽ vake matonĩkĩ ea yonotĩpá. Ãwẽ take ma vopichná, naa westíchtarvi. Askávaĩi mã voánamãsho, ãwẽ ichnák pakémaĩnõ, ronã ea tenãa, mapo oshokase ẽ onéa mã oĩkatsa”, akĩ ato revíki.