Wenía 41 - Yové Koĩni Vana

Josepa Faraopa namárasĩ yoãshoti ivo yoã

¹ Anosho vari ravévakĩ tavákeanamãsho, Faraopa namáki, “Nilo” akĩ atõ anea waka kesó nishõ ãwẽ oĩa,

² 7 txasho aĩ yoíkavo, chaokavo aká, wakãsho kayaníki, kesó wasi shokoa piávo.

³ Askámaĩnõ wakãsho, aatíisevi txasho aĩ poshóniósho, wetsarasĩ õsívaĩi, Nilo waka kesó. Askámẽkĩ, atovoro ichnáka, txookavo.

⁴ Askánamãsho, txasho ichnáka, txookarasĩni 7 txasho yoíka, chaokarasĩ keyoki sheavo. Faraó aská namátani vesokaĩvaíki

⁵ arimẽse oshakaĩki namáoki, trigo aaivo kayãse, 7 vimi koanía, veneka, tono roakavo.

⁶ Askámaĩnõ wetsarasĩ 7sevi, txipo koanióa, txochiya, vari oátõsho niwe shanakatõ shovi akatõsho.

⁷ Aská anosho, ãwẽ txochiyarasĩni ãwẽ veneka tono roaka ivorasĩ sheaa namáoki. Askávai vesokaĩi. Askámẽkĩ ãwẽ namárívi.

⁸ Aská akĩ namávai, chinã tsakáse vesokaĩi, shavá nakoi. Askáki Egito mainamã shokoyavo romeyavorasĩ, yosípavorasĩ aká katsése ato kenavaíki ãwẽ namá ato ãwẽ yoãshoamẽkĩ, wetsã “aská mĩ namáatsikĩ”, akámase ikívo.

⁹ Askánamãsho aká ivo ene sanayatõ Faraó yoãshokĩ. “Rama ẽ kanéchna ivorasĩ ẽ chinãi.

¹⁰ Ichná akĩ chinãki, pão akayatõ kakáyanĩkĩ ea mĩ kepochná, teske akaya kakáyã shovonamã.

¹¹ Anosho aská akĩ nõ namáchná. Wetsã namáro wetsarvi, wetsã namáro wetsarvi noke aká ichĩa.

¹² Askánamãsho teske akaya kakáyatõ mee imaya yora, hebreu verone niá, ãatõ noke namá noke yoãshochĩa. ‘Aaivoro neská akĩ mĩ namáatsikĩ, aaivo miã mĩ namáro aská akĩ mĩ namáatsikĩ’, iinã noke yoãshopachná.

¹³ Aská akĩ noke ãwẽ yoãshopachná keskáse, ẽ namá neei, arimẽse naaivo mee iti ẽ ioai, wetsaro teneshmechná”, ikĩ yoãki.

¹⁴ Aská akĩ ãwẽ yoã nĩkãinã Faraopa, José kenamaĩnõ, inókimase kepóa paropashõ kepẽnakaĩki kakĩ, keni weshai, õpo vená akí, avaikĩ Faraó meramai kakĩ.

¹⁵ Aská akĩ ãwẽ meramatachímaĩnõ, Faraó vanai. “Ẽ namá, wetsãchta ‘aská mĩ namáatsikĩ’, iinã ea akámase ikívo. Askámẽkĩ ‘aaro namá nĩkãvaíki meki akĩ yoãshomíska’, ikí ẽ nĩkãvaĩvaĩa”, akĩ.

¹⁶ “Mã, aaro eã erí ‘aská’, mia akátĩpa, askámaĩnõ, Yové Koĩniro, ‘askátsikĩ’, iinã roaka akĩ mia yoãshokatsai”, akĩ ãwẽ revímaĩnõ,

¹⁷ “neská akĩ ẽ namáai. Nilo waka kesó nikaĩsho ẽ oĩa

¹⁸ 7 txasho aĩ yoíkavo, chaokavo aká, wakãsho kayaníki, kesó wasi shokoa piávo.

¹⁹ Askánamãsho txipo, aatíisevi 7, kayaníi askámẽkĩ atovoro yomechtavo, ichnáka, txookavo aká. Egito maĩ txasho aĩ aská ichnákarasĩ ẽ oĩmarvi.

²⁰ Askáki txasho aĩ txooka, ichnáka akárasĩni, 7 txasho aĩ, chaokavo, atopari kayaniavorasĩ, ato sheavo.

²¹ Askámẽkĩ, piáma keskáse shokovo, yanima, txoose, vevo atõ shokoa keskáse. Askánamãshóse ẽ vesoai.

²² Askávaíki namáoki ẽ oĩa, piti vaná, aaivo kayãse, 7 vimi koanía, veneka, tono roakavo.

²³ Aská wetsarasĩ 7sevi, txipo koanióa, txochiya, vari oátõsho niwe shanakatõ shovi akatõsho.

²⁴ Aská anosho, ãwẽ txochiyarasĩni ãwẽ roaka ivorasĩ sheaai. Askáinã, romeyavorasĩ ato ẽ yoãshoa askámẽkĩ wetsã ‘aská mĩ namáatsikĩ’, iinã ea akámase ikivo”, akĩ.

²⁵ Ãwẽ aská akatõsho, “mĩ namá ravévakĩ askámẽkĩ westíse. Yové Koĩni akatsai ivorasĩse mia ãwẽ oĩmárvi.

²⁶ 7 txasho aĩ roaka ivorasĩro 7 vari tanáti, askávai, 7 piti vaná roaka ivorasĩ askásevi, aatii tanátíisevi.

²⁷ Aská, 7 txasho aĩ txooka, ichnáka txipo kayanía ivorasĩro 7 vari tanáti. Piti vaná txochiya, vari oátõsho niwe shanaka shovi aka ivoro 7 varisevi, askásho aatii vari piti makikatsa.

²⁸ Aská naaivo vana mia ẽ yoãshoáro, Yové Koĩni ãwẽ akatsai ivo mia ãwẽ oĩmárvi.

²⁹ Askái, Egito maitioi, 7 vari tanáti piti ãtsa merákatsa.

³⁰ Askávai txipo, 7 vari tanátíisevi, piti makikatsa, roapa ivo shavá chinãnáma ikatsai, mairo yora ikítõ ikatsai, shopĩi.

³¹ Aská txipo aaivo shavá nokóatxinĩro shopĩi ichnáchtamashõ, roapa ivo shavá chinãnáma ikatsai.

³² Aská ravé ashõ mĩ namáa, Yové Koĩni aská akatsiinã ma chinãkéai, omakaĩai.

³³ Aská ramaro, yora chinãya, yosíka aká ivo mĩ kavẽti roaka, Egito mai vesokatsaya chinãsho.

³⁴ Aská avaikĩ, 7 varitíi, piti ãtsa merámaĩnõ, 5 aya oĩinã, westíkase ave mekekénõvo iinã yora vesoyarasĩ mĩ shokõti roaka.

³⁵ Askávaíki, waaivo vari roapa ivorasĩ nokómaĩnõ, piti vesoyarasĩni atõ cidadenamã, trigo ãtsapakĩ mekei, ave anõvo, anõ mekeanamã.

³⁶ Aská akĩ, mã mekea ivo piti, Egito mainamã, 7 vari tavái, piti makimaĩnõ, mã pii pia anõkaĩkatsa, yorarasĩ shopĩni tenãma ikatsai”, akĩ.

³⁷ Josepa aská akĩ yoãmaĩnõ, Faraó ãwẽ shokõkenavonĩ, mekíi.

³⁸ Askáinã Faraopa, “naa José keská yoranã nõ meratirá, yovepa peshót aká ivonã?” iinã ato nĩkãki.

³⁹ Askávai vesokesho José vana akĩ. “Yovepa katsése mia oĩmaai, askásho yora wetsa, mia keská, mĩ chinã yosítii yama.

⁴⁰ Aská ramaro ẽ shavapa kakáyai mĩ nimaĩnõ ẽ yorarasĩni ashkãsho mia nĩkãtakatsaivo, askámaĩnõ vevokepa ivoro ea westíse.

⁴¹ Ramaro Egito maitio akĩ kakáya mia ẽ nitxĩkéai”, akĩ.

⁴² Aská akĩ yoãshovaikĩ ãwẽ mevĩ osõti, anõsho onãtakĩ oĩti, kochakevaíki José sawemai, õpo pashpichta yoíka ivo sawemai, ouro tewemaói akĩ.

⁴³ Aská avaikĩ, “ramaro José kakáya shoviai”, ikĩ avé oĩnõvo iinã ãwẽ anõ pakaya ivo carro wetsã José ãwẽ tsaõnímaĩno, yorarasĩ “sherévakĩna, sherévakĩna”, iinã aa veyósho oi oi voávo. José askái, anosho Egito maitioi kakáya shovii.

⁴⁴ Askánamãsho, Faraopa José tanamaóki. “Earvi kakáya, askámaĩnõ mia nĩkãshoma, Egito maitioi yorarasĩ atõ ari chinãne ikítĩpá”, akĩ.

⁴⁵ Anosho, Faraopa José ane wetsa teki akĩ. “Zafenate-Paneia”, akĩ anevaíki, Om yorarasĩ yové vevoshoaya yora, ãwẽ anero “Potífera”, ãatõ vake Asenate ninivarãsho José inãki. Askávai txipo Josepa, Egito maitioki katseki oĩketakĩ.

⁴⁶ Aatiã Josepa, ãwẽ vari 30namãsho, Faraó, Egito kakáya mee ishõi shovii. Askái nikĩ, Egito mai katseki oĩketakĩ.

⁴⁷ Aská 7 vari, roaise piti vanárasĩ revokaĩkarãi, ichnáchtama.

⁴⁸ Askámaĩnõ Josepa, Egito mainamã shavátio akĩ, pitirasĩ kãtxi kãtxitãki, 7 varitíi akĩ mekekõvaĩki. Aská akĩ, atõ cidaderasĩ kesó, katsésho piti merámashõ, arí Faraó mekeshokõvaĩvo.

⁴⁹ Askáki Josepa, piti vaná ãwẽ kãtxia, itãtĩpa, tanátĩpakaĩi, machi pototíi.

⁵⁰ Aská piti makikatsa vevo, Asenatemẽsho vake venevake ravévakĩ meraki. Aaivo shavoro Potífera, Om yorarasĩ yové vevoshoayatõ vake.

⁵¹ Ãwẽ vake vevoké ivo “Manassés”, akĩ anesho vanai. “Yové Koĩni ẽ onís awearasĩ, ẽ papã wetsamavorasĩ aká petxĩi ẽ aka”, ikí.

⁵² Askávaíki vake wetsa meraósho, “ẽ anõ onís awea mainamãsho Yové Koĩni roã ea pakekéai”, iinã “Efraim”, akĩ aneki.

⁵³ Aská ano Egito mainamã, 7 vari tavái, piti roai ii iisho

⁵⁴ makii, Josepa yoãchnatõ ikí, 7 varisevi tavái. Aská maitio yorarasĩ pikatsikívo, askámẽkĩ Egito mainamãro, pitĩ mãama ikívo.

⁵⁵ Aská anosho Egito maĩ yorarasĩ ashkã pikatsiinã Faraó pitĩ yokávo, askámaĩnõ Faraopa “José nĩkãna, awesá ikatsíki”, ato akĩ.

⁵⁶ Askái, maitioi, ashkã pikatsimaĩnõvo, Josepa atõ anõ mekechna ivo shovo ãwẽ kepẽmaĩnõ, Egito yorarasĩni José kopímashõ viãkãvo.

⁵⁷ Aská mai wetsã shokoya yorarasĩni, pikatsiinã, Egito mainamã kopímashõ José piti viãi vẽ vẽvo.