Wenía 40 - Yové Koĩni Vana

Josepa atõ namárasĩ yoãshoti ivo yoã

¹ Askáchna txipo, pão ashõya kakáya, aká ene sanaya kakáya, aatiisho Faraó ichnákemávo.

² Atõ aská akatõsho, atoki sinákéki

³ ato atximavaikĩ kepomakĩ. Teske akaya kakáyatõ shovonamã Josénĩ ashõ “kepona”, ato akĩ.

⁴ Teske akaya kakáyatõ Josepa vesosho ato ave take anõvo iinã eneshokĩ. Anosho inopáchtai, kepósho shokosho

⁵ oshapakéki namávo, Egito kakáyatõ mee imarasĩni. Aská wetsã namá wetsarvi, wetsã namá wetsarvi akĩ namávo, aaivo yamepáse.

⁶ Askámaĩnõ Josepa, shavá nakochtaki tachikaĩki ato ãwẽ oĩa, ronase kãtxívo

⁷ oĩinã ato nĩkãki. “Awesa ronase mã vesokõrkĩ”,

⁸ ato ãwẽ akátõsho, “awesa nõ namáaikĩ nõ iki. Tsoã noke meki ashõkatsíkĩ iinã nõ chinãi”, atõ imaĩnõ, “Yové Koĩnĩ akárvi aská meki ashõki. Ramaro ea yoãshona”, ato akĩ, Josepa.

⁹ Ãwẽ aská akatõsho, ene sanaya ivõ, ãwẽ namáa José yoãshokĩ. “Ea veyó vaná niá

¹⁰ ãwẽ meã 3 aya, aská ãwẽ meãneshõ wetsa koainái, oakaĩsho, vimikaĩi, uva õchĩkase.

¹¹ Askái Faraopa anõ akátõ toĩsho uva naki tsinĩvaíki, Faraó inãa ẽ namáai”, ikĩ ãwẽ yoãmaĩnõ,

¹² “aaro neská mĩ namáa. 3 meãro, 3 shavátsikĩ.

¹³ Aská nenosho 3 shavánamãsho Faraopa tsekavaíki arimẽse mia nitxĩkeókatsa, vevo mĩ ikaikaĩnatõsevi akĩ aká ivo ene mĩ sanaókatsa.

¹⁴ Askái roai nikĩ ea chinãki, roaka ivo ea ashõótso, Faraó ea yoãshotso, ea ave kepẽnõ iinã.

¹⁵ Earo hebreu maĩsho Egitonamã atxisho ea ewevarãchnávo. Aská ashõ chinãsho ea kepoóvaivo, anõ kepóa paropa”, akĩ.

¹⁶ Askáki ãwẽ namáa yoãki meki aká roaka nĩkãinã, pão akayatõ José aská akĩ. “Eã aská akĩsevi ẽ namáai. 3 kokí pão oshoka tĩi ikí, ẽ mapo matxi tsaóa.

¹⁷ Aská enéináka tsaóa ivõro, pão, piti vataka õsi õsipáse, Faraopa rayá akáka ivo tĩi ikí. Aská akĩ ẽ vivarãmaĩnõ, chairasĩni ea piãkãvo ẽ namáai”, akĩ.

¹⁸ “Ase, aaro neská akĩ mĩ namáa, 3 kokíro, 3 shavásevi.

¹⁹ Aská nenosho 3 shavánamãsho Faraopa mĩ mapo shatevaíki, mĩ kaya iwĩ ãwẽ ronõmaĩnõ, chairasĩni mia pikatsaivo”, akĩ.

²⁰ Aská 3 shavá tavákéa txipo, Faraó pakéa shavá nokómaĩnõ, ãwẽ mee ima yorarasĩ ato ãwẽ pimanamãsho, ene sanaya ivo, pão akaya ivo aatii arimẽse ato shokõpakeóki.

²¹ Ene sanaya ivo arimẽse nitxĩkéki, Faraó ave ene sanaónõ iinã.

²² Askámaĩnõ, pão akaya ivoro “tenéshna”, ikí, Josepa ato yoãshovaitõse ikí.

²³ Askámaĩnõ, ene sanaya ivo, Josékiri chinãma, petxii.