Wenía 39 - Yové Koĩni Vana

José Potifar shavapa niti ivo yoã

¹ José, ismaelita yorarasĩni Egito mainamã atõ vivaĩmaĩnõ, Potifarpa kopímashõ vikĩ. Potifarro, Faraopa nitxĩa yora, teske akayatõ kakáya.

² Aská Yavepa José vesoatõshõ ichnámatõse pakékésho aa yonokatsayatõ shavapa nii kaí.

³ Askámaĩnõ Potifarpa José onãtakĩ oĩki, katsése ãwẽ mearasĩ Yavepa peshót ashõ José roaka ashõkõvaĩa oĩinã.

⁴ Askásho, Josémẽ mekíki, mee imaki. Askáki ãwẽ shovo, ãwẽ awerasĩ aká vesomashõ nitxĩki.

⁵ Askásho Josémẽsho Potifar katsése aya ivorasĩ Yavepa roapa ivo ashõki, ãwẽ shavapa awerasĩ, ãwẽ waĩ awerasĩ aká.

⁶ Aská oĩinã, José katsése eneshokĩ Potifarpa. Wetsarasĩmẽro anõ tsakáma, arí ãwẽ piti ivochtase chinãki. Aská Joséro roakachta, anõ tavátĩpa ivo.

⁷ Askái shavá ãtsakawãmaĩnõ, Potifarpa aĩni José kẽevakĩ “ovõi kawã ea”, akĩ.

⁸ Ãwẽ aská akatõsho, aví ishõimai vanai. “Neno ãwẽ shavapa ẽ nimaĩnõ, ẽ ivõ awemẽ tsakásho ãwẽ niámarívi, katsése vesomashõ ea nitxĩásho.

⁹ Neno shavapa ẽ niá, wetsa ea keská yamarivi. Katsése ẽ meskoa roasemẽkĩ, miaro ea meskotĩpá, miaro ãwẽ aĩrvi. Anõ itimatõ ikí Yové Koĩni vana tavámashõ ea nikatsikíma”, akĩ.

¹⁰ Ãwẽ aská aka nĩkãsmẽinã, askatase José meskoski. Ãwẽ askámaĩnõ, ari nĩkãma, aví ishõma, tasakatsikíma aká.

¹¹ Askávai txipo shavá wetsã ano shovõ mee inõ iinã ãwẽ erékomaĩnõ, avé mee ikivorasĩ yama.

¹² Aská oĩinã aĩvõ ãwẽ õpo anõsho kawã ivõ atxivaĩsho, “ea ovõi kawã”, ãwẽ akátõsho aki ãwẽ õpo peshokésho ene enevaĩi, ikotĩ, kayakaĩi.

¹³ Aská Josepa kayashokĩ ãwẽ õpo aki ene enevaĩa oĩinã,

¹⁴ avé mee ikivorasĩ ato kenaki. “Naaro oĩi verína, hebreu yora, ẽ venẽ toĩa ivõ, noke ati akatsíki. Ẽ kene naki erékosho, ea ichnákatsímaĩnõ ẽ txakarináai.

¹⁵ Ẽ txakarináa nĩkãinã, ãwẽ õpo eki ene enevaĩi ikotĩ kayaai”, iinã yoãki.

¹⁶ Askáki Josepa õpo rakãki, ãwẽ vene oatishõki.

¹⁷ Askávai ã vene nokókarãmaĩnõ, ato ãwẽ yoãshoa keskásevi akĩ yoãki. “Hebreu yora yononoshõ iinã mĩ vichĩa ivõ ẽ kenẽ erékosho ea ati akatsíki.

¹⁸ Ea ãwẽ aská amaĩnõ isĩinasho ẽ txakarinámaĩnõ ã õpo peshókésho eki ene enevaĩi ikotĩ kayakaĩai”, iinã yoãshoki.

¹⁹ Aská avaikĩ, “mĩ mee imatõ ea aská aka”, iinã ãwẽ aĩni ãwẽ vene yoãshotõsho, ichnákéi.

²⁰ Askáinã José atxivaíki, kepoki. Aaivo anõ kepóa shovoro Egito kakáyanáchtarvi. Askái José kepósho ãwẽ niámẽkĩ

²¹ Yavepa Josénĩse nishõ, noípakĩ vesoki. Askásho, kepói shokoa vesoya ivo yora Josémẽ mekíai.

²² Askáinã kepóya yorarasĩ vesoyatõ ano ato vesomashõ nitxĩki. Anosho José kepóa shovonamã ato yonoya niokei kaí.

²³ Askásho kepóa shovo vesoya yora José keyoki eneshovaikĩ tsakátaníma nii. Aaro awesáma, Yavepa José peshót akásho, roaise ãwẽ mee iki oĩinã.