Wenía 38 - Yové Koĩni Vana

Judánĩ Tamar ivo yoã

¹ Aatiã, Judá, ãwẽ takevo enevaĩi kaí, adulamita yora, Hira, ãwẽ shovonamã nii kaí.

² Anosho, cananeu yora Suapa vake merasho ninivarãki.

³ Ãwẽ aská aka tooinasho ãwẽ pakémaĩnõ, ãwẽ papã “Er”, akĩ aneki.

⁴ Askái, txipo tooinaósho, ãwẽ pakémaĩnõ, “Onã”, akĩ aneki.

⁵ Askávai txipo Quezibenamãsho, wetsa meraósho ãwẽ pakémaĩnõ, “Selá”, akĩ aneki.

⁶ Askávai txipo, Judapa, ãwẽ vake vevoke Er ãwẽ mashtémaĩnõ aĩvo vishõki, ãwẽ anero “Tamar.”

⁷ Aská Yavepa Er askái ã niá roakamáse oĩinã, nitxĩóma.

⁸ Askámaĩnõ Judapa ãwẽ vake Onã vana akĩ. “Mĩ takẽ mekẽya meskotso, mia ãwẽ txairvi, askásho nokẽ tanátikiri chinãsho, revomatso. Mĩ aská aká vake pakémaĩnõ vevo enevai keskánase ikatsai”, akĩ.

⁹ Ãwẽ askámaĩnõ, Onãne ãwẽ revoarasĩ “ená keskámamísi”, ikĩ chinãinã ãwẽ takẽ mekẽya avé ãwẽ meenanãa katsése, ãwẽ anõ vake merati ichná avavaĩski, ãwẽ takẽ vake keská akĩ revomamasnõ iinã.

¹⁰ Askámaĩnõ Yavepa Onã roakama oĩinã askásevi akĩ, aaivo nitxĩómasevi.

¹¹ Ãwẽ askámaĩnõ Judapa ãwẽ vakẽ mekẽya vana akĩ. “Mĩ papã shavapa venemase rakásho oĩtatso, ẽ vake Selá kaniatishõki”, akĩ. Awesáma, ãwẽ takevo ikítõ ikísevi, aa vopiomísi ikĩ chinãinã. Ãwẽ aská akatõsho, Tamar ãwẽ papã shavapa rakái kaí.

¹² Askásho aatiã txipo Judapa aĩ, Suapa vake vopii. Askámaĩnõ ãwẽ rona tãti avãsho, Judá Timna mainamã, ãwẽ txivo rani mashko akayavo shokoa oĩnõ iinã, ãwẽ avé takéa Hira, adulamita yoranĩ kaí.

¹³ Askákaĩi ãwẽ kamaĩnõ yorã, “mĩ kokatxo Timna mainamã txivo rani mashko akávo oĩnõ iinã oa”, iinã yoãshokĩ.

¹⁴ Aská akĩ atõ yoãshoatõsho ãwẽ aya rona ivo õpo wetsa katovaí, õpõ marákmepakesho kaí, “vesãkara shavo ravãki ea ave anõ”, iinã. Askávai Enaim shavá kepoti kesó tsaói kaí, Timna vai kawãnamã. Ãwẽ askáro awesainã ãwẽ ikíma, Selá mashtéyamẽkĩ ãwẽ kokatxo Judapa “aĩ arí”, iinã yonoshoama oĩinã ãwẽ ikí.

¹⁵ Askákaĩi kakĩ õpõ marákmepakesho ãwẽ tsaóa oĩinã vesãkara shavoravã akĩ Judapa.

¹⁶ Ãwẽ vakẽ mekẽya onãmasho, vai kesó ãwẽ tsaómaĩnõ kochikaĩki vana akĩ. “Orí, evé mia oshatĩpará”, ãwẽ imaĩnõ, “awe ea mĩ inãkatsa askáro”, ãwẽ akátõsho,

¹⁷ “ẽ cabra vake wetsa mia ẽ yonoshokatsai”, ãwẽ imaĩnõ, “roase, askámẽkĩ awe wetsase ea enesho, iná mĩ yonoatishõki”, akĩ.

¹⁸ “Awe mia ẽ eneshokatsai askáro”, ãwẽ imaĩnõ, “anõsho onãtakĩ oĩti, mĩ teweanamã txiría ivo, mĩ toĩa otéti txĩti aká ea enesho”, akĩ Tamarpa. Ãwẽ aská akatõsho, ãwẽ yokáa ivorasĩ eneshokĩ. Askávai Tamarnĩ meenanãi, aská ashõ ãwẽ enea, tooinái.

¹⁹ Tamar askái mashtévaí iokaĩi, õpo anõ marákmea ivo kochai, aská avaikĩ ãwẽ aya rona õpo arimẽse saweóki.

²⁰ Askávaíki txipo, Judapa ãwẽ avé takéa Hira yonoki, “naa cabra vake ano eneshovaikĩ, awe ẽ enevai ivo ea vishõta”, iinã ãwẽ yonoamẽkĩ aĩvo merama.

²¹ Anosho Hirapa ano shokoya venerasĩ nĩkãki. “Vesãkara shavonã ato rakáará, Enaim vai kesó nimíska ivonã”, ãwẽ imaĩnõ, “neno aĩvo aská ivo yamarivi”, ikĩ revívo.

²² Askátani oshõ, “ẽ itimatãai, yorarasĩni, ‘neno aĩvo aská ivo yamarivi’, iinã ea yoãshoavo”, iinã Judá ãwẽ yoãshoatõsho,

²³ “roase ãatõse ave vinõ, noke ati amísivo. Txivõ vakechta ẽ yonoshoamẽkĩ aĩvo mia merama taíse”, akĩ.

²⁴ Askávai 3 oshenamãpáchta, Judá yoãvaĩshoávo. “Mĩ vakẽ mekẽya Tamar, vesãkara shavo ikítõ iki, tooya”, akávo. Aská nĩkãinã, “neno ewevarãna, pasha koati”, ikí vanai Judá.

²⁵ Ãwẽ askámaĩnõ, ãwẽ shovo ikotĩ atõ ninikõatõsho, “naa awe ivõ ea imavairvikata, toomakĩnã. Anõ onãtakĩ oĩti, naa tewea, otéti akánã oĩ, tsoanáraki”, iinã ãwẽ kokatxo Judá vana yonoshokĩ.

²⁶ Ãwẽ aská aká Judá ãwẽ awerasĩ onãvai vanai. “Ase, aamarívi kanéya, earvi ichná aweya askáro. Ẽ vake Selá oĩmati roakamẽkĩ ea oĩmáma”, ikí. Askávai txipokiri avé meenanãóma.

²⁷ Askái ãwẽ pakéti shavá omakaĩmaĩnõ atõ oĩa, vake ravé nanéa.

²⁸ Askái, pakékatsiki, mevipari ã sinókarãa oĩinã, too imayatõ, ichi õchĩkatõ venevakechta menéshki. Askái, “naaivoro vevokarãya”, ikí vanai.

²⁹ Askámẽkĩ ãwẽ mevi sinókarãchtavaíse arimẽse ikomaĩnõ ãwẽ take wetsarvi tavavarãi pakéi. Aská oĩinã, “ii, miãpari mĩ vai meravarãai”, ikí too imaya vanai. Askáinã aneki “Perez”, akĩ aneki.

³⁰ Aská txipo ãwẽ take ichi õchĩkatõ meneshméya ivo pakékarãi. Askáinã aaivo “Zerá”, akĩ aneti.