Wenía 36 - Yové Koĩni Vana

Esaupa merávo ivo yoã

¹ Naaivo yoãro Esaú, ãwẽ ane wetsa Edom, ato ãwẽ revomati yoã.

² Askái Canaã maĩ shavo ravé akĩ ninivarãki. Adaro, heteu yora, Elomnẽ vake. Wetsaro Oolibama, Anapa vake, Zibeão heveu yorã shokó.

³ Askávai txipo, Basemate, Ismaẽl vake ninivarãsho aĩ aoki. Aaivo ãwẽ aĩro Nebaiotẽ aweshavo.

⁴ Aská akĩ aĩ ashõ, Adamẽsho, Elifaz meraki, Basemate ivomẽshoro Reuel meraki.

⁵ Askámaĩnõ Oolibama ivomẽshoro Jeús, Jalão, Corá aatii meraóki. Naarasĩro Esaupa vake venevakerasĩ Canaã mainamã nishõ atõ ãwẽ merati.

⁶ Askávai Esaú anosho tekii, ãwẽ aĩvorasĩ, ãwẽ vakerasĩ, ãwẽ inárasĩ, Canaã mainamã nishõ ãwẽ merakenaa awerasĩ aká, kawivaĩi kaí, ora ãwẽ take Jacó enekésho nii kaí.

⁷ Awesáma, atõ awe ãtsai, mai ichtóchtasho, atõ inárasĩ mashkái.

⁸ Askásho, Esaú, ãwẽ ane wetsa Edom, mató keyáka Seirnamã nii kati.

⁹ Askái naatíiro Esaupa merávo, edomita yorarasĩ, mató keyáka Seirnamã shokoarasĩ.

¹⁰ Ãwẽ vake venevakerasĩni anero naatíi. Esaupa Adamẽsho meratiro Elifaz. Reuelro Basematemẽsho ãwẽ merati aká.

¹¹ Naatíiro Elifaznẽ vake venevakerasĩ, Temã, Omar, Zefo, Gaetã, Quenaz aatíi.

¹² Askái Elifaz, ãwẽ rakãa aĩvo, Timnamẽsho, vake wetsa meraki, ãwẽ anero Amaleque. Askái atovo katsésero Ada Esaupa aĩ wetsa ivõ vavavo.

¹³ Askámaĩnõ Reuel vake venevakerasĩro naatíi, Naate, Zerá, Samá, Mizá aatíi. Askái naatíiro Basematemẽsho revoa, Esaupa aĩ wetsa ivo.

¹⁴ Askámaĩnõ naa vake venevakerasĩro Esaupa Oolibamamẽsho merati, Jeús, Jalão, Corá aatíi. Askái Oolibamaro Anapa vake aĩvake, Anapa paparo Zibeão aká.

¹⁵ Naarasĩro Esaupa ato revomaa kakáyarasĩ. Ãwẽ vake vevokéro Elifaz. Ãatõ vake venevakerasĩro naatíi, Temã, Omar, Zefo, Quenaz,

¹⁶ Corá, Gaetã, Amaleque, aatíi. Aatíiro Adamẽsho revoa kakáyarasĩ, Edom mainamãsho pakétivo.

¹⁷ Askámaĩnõ Esaupa vake wetsa Reuẽl vake venevakerasĩro naatíi. Kakáyarasĩro Naate, Zerá, Samá, Mizá aatíi. Atovoro Reuẽl ato revomaa, Edom mainamãsho pakétivo, Esaupa aĩ Basematẽ vavavo.

¹⁸ Askámaĩnõ naarasĩro Esaupa aĩ wetsa Oolibamã vake venevakerasĩ. Kakáyarasĩro Jeús, Jalão, Corá aatíi. Kakáya naatíiro Anapa vake aĩvake Oolibamamẽsho revoarasĩ.

¹⁹ Naarasĩ katsésero Esaú, Edom akĩ atõ anea ivomẽsho revoa kakáyarasĩ.

Seirpa merávo ivo yoã

²⁰ Naarasĩro Seir, horeu yorã vake venevakerasĩ, Edomnamã shokoyavo, Lotã, Sobal, Zibeão, Aná,

²¹ Disom, Eser, Disã aatíi. Atovo katsésero horeũ kakáyarasĩ, Edom mainamã.

²² Naarasĩro Lotãne vake venevakerasĩ, Hori, Hemã aká. Askámaĩnõ Timnaro Lotãne take aĩvake.

²³ Naarasĩro Sobãl vake venevakerasĩ, Alvã, Manaate, Ebal, Sefô, Onã aatíi.

²⁴ Naarasĩro Zibeãone vake venevakerasĩ, Aiá, Aná aká. Naaivo Anáro ãwẽ papa Zibeãone jumentorasĩ wasi ato pimanõ iinã kawivaĩi kakĩ, askata wenẽnamã wakapasha shanaka tsaóa ivo meramtáya.

²⁵ Naarasĩro Anapa vakerasĩ, venevake ivoro Disom, aĩvakero Oolibama aatíi.

²⁶ Naarasĩro Disomne vake venevakerasĩ, Hendã, Esbã, Itrã, Querã aatíi.

²⁷ Naarasĩro Esẽr vake venevakerasĩ, Bilã, Zaavã, Acã aatíi.

²⁸ Naarasĩro Disãne vake venevakerasĩ, Uz, Arã aatíi.

²⁹ Naarasĩro horeu yorarasĩnĩ kakáyavorasĩ, Lotã, Sobal, Zibeão, Aná

³⁰ Disom, Eser, Disã, aatíiro horeu yorã kakáyarasĩ, Seir mainamã.

Edom maitioi kakáyavo, Edom shavá naki kakáyavo aká ivo yoã

³¹ Naaivo kakáyarasĩro Edom maitioi kakáya ipawayavorasĩ, Israel yorarasĩni kakáya shovikatsa vevo.

³² Beláro, Beorpa vake venevake, Edomnamã kakáya, ãwẽ anõ kania cidade anero “Dinabá.”

³³ Anosho Belá vopimaĩnõ Jobabe, Zerapa vake, ãwẽ shanẽne niakéi. Zeráro Bozranamã niá yora.

³⁴ Anosho Jobabe vopiómaĩnõ, temanita yora Husã, ãwẽ shanẽne niokeói.

³⁵ Anosho Husã vopiómaĩnõ, Hadade, ãwẽ shanẽne niokeói, ãwẽ anõ kania cidade anero “Avite.” Hadadẽ paparo Bedade, midianita yorarasĩ ato keyokeãmtáya, Moabe mainamãsho.

³⁶ Anosho Hadade vopiómaĩnõ, Samlá ãwẽ shanẽne niokeói, ãwẽ anõ kania cidade anero “Masreca.”

³⁷ Anosho Samlá vopiómaĩnõ, Saul, ãwẽ shanẽne niokeói, ãwẽ anõ kania cidade anero “Reobote”, Eufrates waka orakama.

³⁸ Anosho Saul vopiómaĩnõ, Baal-Hanã, Acbõ vake, ãwẽ shanẽne niokeói.

³⁹ Anosho Baal-Hanã, Acbõ vake, vopiómaĩnõ, Hadar ãwẽ shanẽne niokeói, ãwẽ anõ kania cidade anero “Paú”, ãwẽ aĩni anero “Meetabel”, Matredẽ vake, Me-Zaabẽ shokó.

⁴⁰ Naaivo mai naki kakáyarasĩro Esaupa ato revomaa. Atõ anerasĩ ikítõsevi ikí, aaivo nawavo, aaivo nawavo ikí, atõ mai askásevi, ipá oa aká. Askásho atõ anerasĩro naatíi, Timna, Alva, Jetete

⁴¹ Oolibama, Elá, Pinom,

⁴² Quenaz, Temã, Mibzar,

⁴³ Magdiel, Irã aatíi. Askásho Edom mai naki kakáyarasĩ, arí shavá ivopakesho shokovo. Askáti Esaú, edomita yorarasĩ revomayãtáya.