Wenía 35 - Yové Koĩni Vana

Jacó arimẽse Betelkiri iokarãti ivo yoã

¹ Askávai txipo Yové Koĩni Jacó tanamakĩ. “Earo Yové mĩ take kayashoi mĩ kamaĩnõ Betelnamãsho mia meramayãta ivo ea. Ramaro ano shaváyatso, ano nokósho anõ maki ati tapo earavĩki ea ashõtso”, akĩ.

² Ãwẽ aská akatõsho, ãwẽ vakerasĩ, ãwẽ shokõkenavo aká ato tanamakĩ. “Yora shoko wetsarasĩni yové yochĩ, mã ravia ivorasĩ potana. Matõ chinã roavaíki õpo wetsa vená arína.

³ Askávai Betelnamã nõ vonõ. Anosho, ẽ onís awemaĩnõ ea take apawaya ivo, ẽ niátipakĩ ea eneimai niaya ivo Yové Koĩ anõ maki ati tapo ẽ ashõnõ”, ato akĩ.

⁴ Ãwẽ askámaĩnõ, yové yochĩ atõ toĩa ivorasĩ, pãtxõ osõti akárasĩ, Jacó keyoki atõ inãatõsho, Siquém shavá orakama iwi anika tavá maĩ oneki.

⁵ Askái atõ vomaĩnõ Yové Koĩni ato kesotõ shaváyai ivorasĩ ato raket akĩ. Ato ãwẽ aská akatõsho, Jacónĩ ã vakerasĩ meskoma ikívo.

⁶ Askái, Jacó ãwẽ shokõkenavonĩ “Luz” akĩ atõ anea shavá nokoki, ãwẽ ane wetsaro Betel, Canaã mai naki.

⁷ Anosho, anõ maki ati tapo avaikĩ “El-Betel”, akĩ aneki. Awesáma, anosho Yové Koĩni oĩmayãtá, ãwẽ take kayashovainii ãwẽ kamaĩnõ.

⁸ Askái, anosho Débora, Rebeca vesoya ivo aĩvo vopii. Betel orakama iwi carvalho tavá onetivo, askásho “Alom-Bacute”, akĩ anetivo.

⁹ Askávai txipo askákarãi Padã-Arãnamãsho ãwẽ omaĩnõ Yové Koĩni meraósho, vana roapa netãki.

¹⁰ “Mĩ anero ‘Jacó’ askámẽkĩ rama mia anekiro ‘Jacó’ mia aotĩpá. Rama mĩ anero ‘Israelvere’”, akĩ anesho eneki.

¹¹ Aská avaikĩ tanamaóki. “earo Yové Weeya ivo. Ãtsa akĩ ato revomatso. Askái minõsho yora shoko wetsa, arí wetsai shokopakéa aká shovivaĩkatsa, atomẽsho kakáya mestẽka ivorasĩ merákatsavo.

¹² Abraãonĩ Isaque mai ato ẽ inãti ivo mia ẽ inãókatsa, ato mĩ revomaivorasĩ askásevi akĩ ato inãi ẽ akatsai”, akĩ tanamakĩ.

¹³ Askái anosho Yové Koĩ Jacónĩ vanai mashtékaĩi weníkaĩi.

¹⁴ Askái ãwẽ vana vananamãsho, Jacopa shasho mashko masõníki voró akĩ. Aská avaikĩ, aká ivo ene, azeite sheni akátõ matxi mavó ashõ eneki.

¹⁵ Askái Yové Koĩ vananamã “Betel”, akĩ aneki.

Raquel vopiti ivo yoã

¹⁶ Askávai txipo Betelnamãsho weníkaĩi, ãwẽ vakerasĩnĩ. Askái ã kaanamãsho, Efrata atõ aká omakaĩanamãsho, Raquel tõo nene avawãki. Askái ãwẽ vake rayá pakéma.

¹⁷ Askáki, ãwẽ mai avawãmaĩnõ too imayatõ aská akĩ. “Rakéroa, venevake wetsa mia aya ikatsai”, akĩ tanamakĩ.

¹⁸ Askámaĩnõ Raquẽl vopikatsiinã, “Benoni”, akĩ aneki. Askámaĩnõ ãwẽ papã anekiro “Benjamim”, akĩ.

¹⁹ Askái ãwẽ vopimaĩnõ Efrata vai kesó onevo, rama “Belém” akĩ atõ aneanamã.

²⁰ Askái, ãwẽ aĩ onéanamã shasho mashko masõníki voró ashõ eneki, anõsho ã onéa onãtakĩ oĩti iinã. Aaivo voró rama niisa.

²¹ Askái anosho iokaĩi, “Migdal-Eder”, atõ akánamã peshé ashõ nioi kaí.

²² Askái aaivo maĩ ãwẽ niánamãsho, ã vake Rúbeni, ã papã rakãa aĩvo Bila ivo meskõkãki. Ãwẽ aská akãa, ãwẽ papã tanaki. Aatiã Israel 12 vake venevake aya.

Jacopa merávo ivo yoã

²³ Naatíiro Lia ivomẽsho ãwẽ merati. Rúbenro vevoké, atxõyavoro Simeão, Levi, Judá, Issacar, Zebulom aká.

²⁴ Naatíiro Raquel ivomẽsho ãwẽ merati, José, Benjamim aatíi.

²⁵ Naatíiro Bila, Raquel mee ishõyamẽsho ãwẽ merati, Dã, Naftali aatíi.

²⁶ Askámaĩnõ, naatíiro Zilpa, Lia mee ishõyamẽsho ãwẽ merati, Gade, Aser aatíi. Naarasĩ katsésero Padã-Arãnamãsho ãwẽ merati.

Isaque vopiti ivo yoã

²⁷ Askái Jacó ano nishõ ãwẽ papa Isaque Manre mainamã niá oĩnõ iinã chinãvaĩi kaí. Aaivo mairo Quiriate-Arba akĩ atõ anea orakama, ãwẽ ane wetsaro Hebrom, ã papa Abraãonĩ ãwẽ nipawanamã.

²⁸ Askái Isaque 180 vari niti.

²⁹ Sheniwetsa mashtésho ãwẽ papavo merai kati. Askámaĩnõ ãwẽ vakerasĩni, Esaúnĩsho Jacopa onetivo.