Wenía 32 - Yové Koĩni Vana

Jacopa ãwẽ take weníkarãa nĩkãti ivo yoã

¹ Askái Jacó iokaĩmaĩnõ Yové Koĩni yonoa yovérasĩni meratachívo.

² Askái ato oĩvai vanai. “Nenoro Yové Koĩni shokõa shavá keská”, ikĩ oĩinã naaivo shavá “Maanaim”, akĩ aneki.

³ Askáki ãwẽ take Esaú merakatsiinã yorarasĩ ato yonoki. Aaro Seir shavánamã niá, Edom mai naki.

⁴ Aská akĩ ato yonokatsiinã, ato tanamakĩ. “‘Jacó askáikatá’, ea ashõtatsoma. ‘“Earo Jacóvere, mĩ yonoa keská niá ea. Vari ãtsa tavái, nokẽ koka Labãonamã ẽ nikaikaĩna.

⁵ Inárasĩ naatii ea aya. Txasho, jumento, txivo, cabra, askávaíse ẽ mee ima yorarasĩ aká ea aya. Neská akĩ vana mia ẽ yonoshomaĩnõ roai enõ mekítso”, ikikatá’, ea ashõtsoma”, ato akĩ.

⁶ Aská akĩ ato ãwẽ yonovairasĩni oĩtani veshõ yoãshoávo. “Mĩ take nõ meratavai. Ma oa, 400 venerasĩnĩ”, akávo.

⁷ Aská akĩ atõ yoã nĩkãinã, Jacó rakéi ranóma, ãwẽ chinã tsakákẽwãi. Anoshose ãwẽ yorarasĩ avé shokoyavo, ãwẽ txivorasĩ, cabrarasĩ, txashorasĩ, jumentorasĩ, camelorasĩ aká ato oshkevakĩki.

⁸ Aská akĩ arí chinãki, “yora shokoa wetsa ẽ takẽ ato pakã amaĩnõro wetsarasĩro ave poshónõvo”, ikĩ chinãki.

⁹ Askái ano Yavénĩ vanai. “Yavepá, mia ẽ ochtxó Abraãonĩsho, ẽ papa Isaquẽ ravipaóa Yové mia. Ea mĩ aská avai. ‘Arimẽse mĩ maikiri mĩ wetsamavorasĩnamã iokaĩtátso. Ano mĩ nimaĩnõ roakakĩ mia ẽ nitxĩkatsa’, iinã ea mĩ yonovai.

¹⁰ Earo ichnárvimẽkĩ, enõ noípakĩ petxitima chinãsho ea mĩ vesokõvarãai. Roaka ivorasĩ ea mĩ ashõrívi. Jordão waka txĩtĩchtase otésho ẽ pokemtá, askámẽkĩ ramaro yora shoko ravévakĩ aya ea.

¹¹ Ẽ takẽ, ea, ẽ aĩvorasĩ, ẽ vakerasĩ aatii yamamamísi iinã ãwẽ chinã onika ivo ea teashotso.

¹² Mĩ chinãsaitĩ, ‘minõsho revokaĩarasĩ yorã tanátĩpa machi pototii ikatsai’, mĩ iti”, akĩ.

¹³ Askái aaivo yamé ano oshavaíki vesokaĩki ãwẽ inárasĩ wetsa kashma akĩ kavẽki, Esaú anõ onis akí kanosho iinã.

¹⁴ Aská akĩ 200 cabra aĩ, 20 ãwẽ vene, 200 txivo aĩ, 20 ãwẽ vene akĩ ato kavẽpakéki.

¹⁵ Aská avaikĩ 30 camelo aĩ, ãwẽ shoma akayavorasĩ, 40 txasho aĩ, 10 ãwẽ vene, 20 jumento aĩ, 10 ãwẽ vene aatii kavẽsho ato oshkepakéki.

¹⁶ Aská akĩ yoinavorasĩ ato oshkepakevaíki ato ãwẽ mee ima yorarasĩ ato vesomapáki. Askávai vanai. “Neská atsoma vevovaĩi, wetsa atxõ, wetsa atxõ akí orapachta shokovaĩtsoma”, iinã ato tanamakĩ.

¹⁷ Aská avaikĩ vevokaĩya ivo tanamakĩ. “Ẽ takẽ veyatachísho mia nĩkãkatsa. ‘Tsoarkĩ mĩ kakáyanã? Awetonamã mĩ kaará? Tsoanárkĩ naa yoinavorasĩ mĩ kawivãanã?’ iinã mia ãwẽ nĩkãmaĩnõ,

¹⁸ neská akĩ revítso. ‘Naa yoinavorasĩro Jacó, mĩ yonoa ivo keskáná. Mia ivosho, anõ mia onis ati, miaravĩki ãwẽ yonoa nõ kawivarãa. Aa askásevi, aa noke txipo oa’, atso”, akĩ yosĩki.

¹⁹ Aská avaikĩ atxõ shokoyavo wetsa, atxõ shokoyavo wetsa, iná vesoyavorasĩ aatii ato tanamaóki. “Matõ Esaú nokovaĩsho inárasĩ askásevi akĩ yoãoshotsoma.

²⁰ Askávaíse, ‘Jacó noke txipo oa’, aotsoma”, akĩ. Aská akĩ, “onis akĩ awe vevo ẽ yonoshoatõsho, ẽ take rawekatsa taíse. Ẽ meramatõsho, enõ mekískatsa taíse”, ikĩ chinãki.

²¹ Aská akĩ anõ onis ati awerasĩ vevo yonovaí peshénamã oshai.

²² Askái aaivo yamepáse weníkaĩki Jaboque ivo teã atonĩsho pokevaĩi, ãwẽ aĩvorasĩ, ato ãwẽ mee ima ravévakĩ, ãwẽ vakerasĩ 11 akánĩ.

²³ Askávaíki arimẽse iokaĩsho, ãwẽ awerasĩ pokékemaóvai

²⁴ aríse niakéi txipo. Askánamãsho yora wetsa tachikarãsho avé wea ikinanãi, ii ii shavá mashtévo.

²⁵ Aská akĩ wea akĩ akátĩpa tanainã ãwẽ kichi shao txiwánamã tsipískãki.

²⁶ Aská avaí vanai. “Ea ene, ma shaváai”, ãwẽ imaĩnõ, “vana roapa ea mĩ netãma ivoro, ea mia enetĩpa”, akĩ Jacopa.

²⁷ “Mĩ ane awerá?” ãwẽ imaĩnõ “earo Jacó”, akĩ.

²⁸ “Rama mia anekiro ‘Jacó’ mia aotĩpá. Venerasĩ, Yové akánĩ mĩ wea ikinanãki miãse mĩ aka, askásho rama mĩ anero ‘Israelvere’”, akĩ.

²⁹ Ã aská akatõsho, “miã mĩ ane awerá”, iinã ãwẽ nĩkãtõsho, “awesainã ẽ ane mĩ nĩkãtsikirá?” akĩ. Aská avaikĩ anosho ãwẽ vana roapatõ Jacó netãki.

³⁰ Ãwẽ aská akatõsho, Jacó vanai. “Yové Koĩ kayakavi ẽ oĩmẽkĩ, ea vopima”, iinã aaivo shavá aneki “Peniel”, akĩ aneki.

³¹ Askái shavá nakoi vari tachiinámaĩnõ Jacó Penielnamãsho nití nitii kaí, ãwẽ kichi shao tsipískméyasho.

³² Askásho rama shavapa Israel yorarasĩ kichi txiwá nami pimísmavo, ano ãwẽ tsipískmemtakiri chinãsho atõ ikí.