Wenía 31 - Yové Koĩni Vana

Jacopa Labão kayashoti ivo yoã

¹ Askáki txipo Jacopa ãwẽ rayósenẽ vakerasĩ vana nĩkãki. “Nokẽ papã awemẽsho mestẽki, keyoki viãkãkõvarãai”, ikívo.

² Askáki arí ãwẽ rayóse onãtakĩ oĩóki, vevo ãwẽ avé taképaoatõ aoma.

³ Aská oĩinã Yavepa Jacó tanamakĩ. “Arimẽse mĩ papanĩsho mĩ ewã maĩ, iokaĩta mĩ wetsama niánamã. Mĩ kamaĩnõ mia ẽ vesokatsa”, akĩ.

⁴ Aská nĩkãvaíki, atõ inárasĩ shokoanamã nishõ Raquelnĩ Lia “neno verína iki”, iinã ato ãwẽ kenaa,

⁵ atõ tachivaĩmaĩnõ ato aská akĩ. “Ramaro matõ papa ẽ onãtakĩ oĩai, vevotiã ea ãwẽ apawa keskáma, enõ noímase, askámẽkĩ ẽ papã ravia Yoveparo ea enekéma, ea vesovaĩvaĩa.

⁶ Mã tanaitĩ, earvi matõ papamẽ yomãnái mee ikiya.

⁷ Askámẽkĩ ea ma parãkõvarãki ãtsaka, 10tíi akĩ, ‘iná mia inãnõ’, iinã ea tanáki teki ashõpakevarãki. Aská akĩ ea ãwẽ ichnák paketsikimẽkĩ Yové Koĩni ea teashokõvarãai.

⁸ Matõ papã ‘ramaro iná toteyavo mia kopíma keskáse ikatsaivere’, ea ãwẽ amaĩnõ, vakeya toteyavomamẽse para ikívo. ‘Ramaro iná pokeyavo mia kopíma keskáse ikatsai’, ea ãwẽ aomaĩnõ anosho katsése pokeyavorasĩ para ikí.

⁹ Askásho Yové Koĩni mĩ papã inárasĩ viãkãsho ea eneshokõvarãai.

¹⁰ Askávai shavá wetsã, inárasĩni atõ aĩ aká ivo shavapa namáki ẽ oĩa, atõ aĩ matxi papíkenáro pokeyavo, toteyavo, patsáyavo aká ẽ oĩchná.

¹¹ Aská ẽ oĩanamãsho Yové Koĩni Yonoa Yovepa ea kenachná. ‘Jacopá’, ea ãwẽ amaĩnõ, ‘ẽe, neno ẽ niá’, ẽ achĩa.

¹² ‘Naa oĩwẽ, iná venerasĩnã, atõ aĩ akayavorasĩ, pokeyavo, toteyavo, patsáyavo aká. Eatsikĩ Labãone mia aská parãkatsiimaĩnõ mia ashõyanã.

¹³ Ea Yové Betelnamãsho mĩ oĩmta ivonã, ano shasho masõnísho azeite shenĩ mĩ voimtá, aská ashõ tekísma ivo vana mĩ nẽemtá. Ramaro kashma avaí naaivo mai enevaĩi kashõ mĩ anõ vaketi ivo maĩ arimẽse iokaĩta’, ea achĩa”, akĩ ãwẽ aĩvorasĩ yoãshokĩ.

¹⁴ Ãwẽ askái vanamaĩnõ ãwẽ aĩvorasĩni revíki. “Nokẽ papa vopimaĩnõ ãwẽ mekẽya awechta noke yama ikatsai.

¹⁵ Yora wetsa akátõ noke amíska. Nõ veneyamẽsho ãwẽ viti ivo keyoki ichná akõvarãai.

¹⁶ Yové Koĩni nokẽ papã awe viãkãa ivoro nokená, nokẽ vakerasĩná aká, askásho mia ãwẽ yonoa ivo keská akĩ ashõtso”, akávo.

¹⁷ Ãwẽ aská nĩkãinã Jacopa, ãwẽ aĩvorasĩ ãwẽ vakerasĩ aká camelorasĩ matxi ato kãtxiníki.

¹⁸ Askávai ãwẽ inárasĩ Padã-Arãnamã ãwẽ vivaivaĩna ivorasĩ, awerasĩ aká kawivaĩi, ãwẽ papa Isaquẽ maĩ, Canaãnamã kaí.

¹⁹ Askámaĩnõ Labãoro ãwẽ txivorasĩ atõ rani mashko anõ iinã ãwẽ kavai wetsanamã. Askái ano ãwẽ nimaĩnõ, atõ voti vevo Raquẽl ãwẽ papã arí ravia ivo iwi yochĩrasĩ onẽkãki, ãwẽ shovonamã.

²⁰ Askáki ãwẽ rayóse, arameu yora tanamamase kayashokĩ.

²¹ Kakĩ ãwẽ awerasĩ keyoki kawivaĩi, Eufrates waka pokevaĩi, Gileade mainamã matóyãwakiri kaí.

²² Ãwẽ askámaĩnõ 3 shavá tavákeanamãshorívi Labãone Jacó kayavai tanaki.

²³ Anosho ãwẽ wetsamavo, venerasĩmamẽ mekikinanãvaíki, Jacótxõvaĩvo. Askávai vokĩ, 7 shavákaĩki, txivãtachívo, Gileade matóyãwakanamãsho.

^24-25 Ano Jacopa peshé aká nokovaĩsho, ano arí peshé aovo, txivãvaĩyavõ. Askái aaivo yamepa ã rayósenẽ namáki ãwẽ oĩa Yové tachikarãsho vanai. “Oĩtso, Jacóki ichnái vanaroa”, akĩ.

²⁶ Askáki ãwẽ rayósenẽ, Jacó meravaíki, tanamakĩ. “Awesakĩ ea mĩ parãvarãvai? Ẽ vakerasĩ pakã ashõ kawivarãtõ ea mĩ akãvarãvaikatá.

²⁷ Awesainã ea parãvarãai, ea tanamáma mĩ kayashovairá? Okatsiinã ea mĩ tanamavairo mia ẽ saí imakeãvai metsáki, anõ koká ikí ivorasĩ tambornĩ harpa manesho.

²⁸ Aská avaikĩ ẽ vavavo, ẽ vakerasĩ aká ea mĩ ato mekí amaómakasevi, iovai. Yora tanasma ivõ tanátinĩ mĩ ikarãvai.

²⁹ Mato ichná ati roakamẽkĩ, shaváma namáki ẽ oĩa mĩ papã ravia Yové Koĩni ea tanamavai. ‘Oĩtso, Jacóki ichnái vanaroa’, ea avai.

³⁰ Rama ẽ tanasai, mĩ shavá chinãi mĩ ovairívi. Askámẽkĩ awesainã erí ẽ ravia ivo yové yochĩrasĩ ea mĩ onẽvarãvairá”, akĩ.

³¹ Ãwẽ askámaĩnõ ãwẽ rayóse revíki. “Mia rakéshoi ẽ ivairívi, tanamamase kayavai. Mĩ vakerasĩ ea mĩ nĩnĩkãmísi iinã ẽ ivai.

³² Askámaĩnõ, mĩ ravia ivo yové yochĩrasĩ ivoro, neno yora wetsanamã mĩ meraa ivoro aaivo yora vopikatsa. Mĩ awe ichnáchta askásevi, nokẽ wetsamavorasĩni oĩníse neno mĩ meraa ivoro, vivaĩtánosho, roase minárvi”, akĩ. Aská akĩ ãwẽ yoãmẽkĩ ãwẽ aĩni onevai tanama.

³³ Aská aka ãwẽ rayósenẽ, yové yochĩrasĩ meranõ iinã Jacopa peshé nakipari ikosho oĩvãki. Aská avaikĩ Liana ivonamã oĩi, ãwẽ mee ima aĩvo ravévakĩ rakánamã oĩi, ãwẽ akámẽkĩ meráma. Anosho kayakaĩvaí, Raquẽl peshepa erékosho oĩóki.

³⁴ Askámaĩnõ camelõ papia anõ awe tĩi aká ivo maĩ rakáa. Aská aka Raquelro aa naki onevai matxi pãtesho tsaóa. Askáki ã peshepa keyoki ãwẽ oĩvãomẽkĩ merama.

³⁵ Askáki anosho ãwẽ papa tanamakĩ, “papá, ẽ weníináma oĩinã ea ichnaroa, ea maĩ iki”, akĩ. Askáki ãwẽ yové yochĩrasĩ itimamẽkĩ merama.

³⁶ Ãwẽ askámaĩnõ Jacopa ichnákéki ãwẽ rayóse aská akĩ. “Awesa ivo anõ itimatõ ẽ iki mĩ oĩinã? Mĩ tanáti awesa ivo mia ẽ ichnãkãtõsho rateki ea mĩ txivãvarãvairá?

³⁷ Ramaro ẽ awerasĩ keyoki ea mĩ meskõkãai, miná keská wetsanã mĩ onãai? Neno potavarãta, awerasĩ, mĩ wetsama, ẽ wetsama aká veyó. Ato ivo anõpáraki ave oĩnõvo.

³⁸ 20 vari tavái nishõ mia mee ishõkõvarãai. Mĩ txivorasĩ, cabrarasĩ aká, atõ vake para ikí, westíchta pashkatakĩma. Txivo vene askásevi, westíchta richkĩsho mia piãmasevi ẽ ava avaĩchná.

³⁹ Mĩ inárasĩ yoini oniparasĩni mia nachãkãmaĩnõ, eãse pãtemaí ená akátõse akí. Variké, yamé aká atõ onea ivorasĩ askásevi, ‘miã kopíma’, iinã ea yokái mĩ avaivaĩchná, chinãtso.

⁴⁰ Askái ẽ nikaikaĩchná, varikéro vari amai, yaméro matsi amai. Awetii yamé ẽ oshá ichná apawarmẽ irawẽ.

⁴¹ Askáse, 20 vari mĩ shavapa ẽ nikaikaĩchná. 14 vari mia ẽ mee ishõmaĩnõ mĩ vake aĩvake ravévakĩ ea mĩ inãchná. Askái 6 vari mee iosho mĩ inárasĩ viói. Ẽ askámaĩnõ 10tíi akĩ ‘iná mia inãnõ’, iinã ea mĩ tanáki teki ashõpakevarãki.

⁴² Ẽ shenirasĩni Yové, Abraão raviti ivo, Isaquẽ rakéshopawa ivo, ea take akámaro, awe yama akĩ ea mĩ yonokeãi. Askámaĩnõ naaro Yové Koĩni ẽ onís awei mee iki ea oĩvaĩvaĩa. Askáshovísi, shaváma yamé mia vatxĩvai”, akĩ.

⁴³ Ãwẽ askái vanamaĩnõ ãwẽ rayósenẽ aská akĩ. “Naa ẽ vakerasĩ, ẽ vavavo, yoinavorasĩ, katsése mĩ oĩarasĩ earvi, ato ivo. Askámẽkĩ arimẽse ea ato kawivaĩtĩpa.

⁴⁴ Askásho ramaro neská tanáti tavámakĩnanãimai nõ shokonõ, anõshorívi noke ave onãtakĩ oĩnõvo”, akĩ.

⁴⁵ Ãwẽ aská akatõsho, Jacopa shasho mashko vivaikĩ nitxĩníki.

⁴⁶ Aská avaikĩ ãwẽ wetsamavorasĩ “shasho mashko masõnióna”, ato akĩ. Aská akĩ ato ãwẽ yonoatõsho, shasho masõnivaíki, aa tavásho piti naí ashõ ashkãsho pii mekikinanãvo.

⁴⁷ Ano aská ashõ Labãone anekiro “Jegar Saaduta”, akí, Jacopa anekiro “Galeede”, akí atõ vanã ishõ anevakĩvo.

⁴⁸ Aská ashõ Labão vanaói. “Naaivo matopashõ nõ chinãmakinanãnõ”, iinã “Galeede”, akĩ anevo.

^49-50 “Yavepa nõ ravé pashkávakĩmaĩnõ noke ave vesonõ. Ẽ vakerasĩ roakĩ oĩma, aĩvo wetsarasĩmẽ mĩ kẽea ivoro, ‘awesaivormẽ’, ẽ ikímẽkĩ, ãatõ ato oĩskatsa”, iinã “Mispa”, akĩ aneóki, Labãone.

⁵¹ Askái ãwẽ rayóse vanaói. “Naa masoi, nitxĩi ẽ aká ivo noke tõovakĩ.

⁵² Shashõsho nõ chinãnanãnõ ravé. Eã nerishõ mia meskotĩpá. Miã arishõ ea mĩ meskotĩpásevi noke avévakĩa.

⁵³ Nokẽ papavo, mĩ ochtxó Abraão, ẽ ochtxó Naor aatiisho atõ ravipaóa Yové noke meki ashõya ave ninõ”, akĩ. Ãwẽ askámaĩnõ Jacó vanaói. “Ẽ papa Isaquẽ rakéshopawa ivo Yovepa anemẽsho tavámatima ivo mia ẽ ashõvere”, akĩ.

⁵⁴ Askávaíki matopashõ yoini maki avaikĩ, ãwẽ wetsamavorasĩ ato kenavarãsho atonĩsho pivai oshai.

⁵⁵ Askávai Labão shavá nakoi vesokaĩsho, ãwẽ vakerasĩ, ãwẽ vavavo aká ato mekí apavaíki ãwẽ vana roapa netãvaí, arimẽse iokaĩóti, ã maikirí.