Wenía 30 - Yové Koĩni Vana

¹ Askái Raquel “earo vakeyámaka”, iinã ãwẽ takemẽ naíi, ãwẽ venenĩ vanai. “Ea mĩ vake merashoámaro ẽ vopikatsa”, akĩ.

² Ãwẽ aská akatõsho, ã vene naíkawãi vanai. “Eanã Yovérá? Aatsikĩ mĩ revokatsikimẽkĩ mia teayanã”, akĩ.

³ Ãwẽ askámaĩnõ, “ramaro aská, ẽ mee ima ivo Bila mia ẽ eneshomaĩnõ, aa tasatso, anõsho vake meranoshõ. Mĩ anõsho meraásmẽkĩ nokená keskáse ikatsai”, akĩ.

⁴ Aská akĩ Bila ãwẽ eneshoatõsho avé meenanãi.

⁵ Askái Jacopa Bilamẽsho venevake meraki.

⁶ Askái Raquel vanai. “Ẽ onís awemaĩnõ, Yové Koĩni ea meki ashõai. Ẽ yokáamẽsho vake ea inãi”, iinã “Dã”, akĩ aneki.

⁷ Askái txipo Bilamẽsho venevake wetsa meraóki.

⁸ Askái Raquel “ẽ take evé tavananãa ivo ẽ viakea”, iinã “Naftali”, akĩ aneki.

⁹ Askámaĩnõ Liã revoa enésho, ãwẽ toĩa aĩvo Zilpa “naa tasatso”, iinã ãwẽ vene eneshokĩ.

¹⁰ Anosho ãwẽ venẽ Zilpamẽsho venevake meraki.

¹¹ Ãwẽ askámaĩnõ Lia “mekírvironã”, iinã “Gade”, akĩ aneki.

¹² Askáki txipo Zilpamẽsho venevake wetsa ãwẽ meraómaĩnõ

¹³ Liã, “ea mekíai, evé aĩvorasĩni ‘metsápai tsaóai’, ikĩ ea yoãkatsavo”, iinã “Aser”, akĩ aneki.

¹⁴ Askásho txipo trigo atõ tovamaĩnõ, Rúben wai matxi too rao wetsa meravaíki ãwẽ ewa Lia inãki. Askámaĩnõ Raquẽl ãwẽ take yokáki. “Mĩ vakẽ vivarãa ivo wetsachta ea inã”, akĩ.

¹⁵ Ãwẽ askámaĩnõ, “ẽ vene ea mĩ viãkechnamẽkĩ, ẽ vakẽ vaná ea ãwẽ vishõvarãa ivo ea mĩ viãkãotsikírá?” akĩ. Ãwẽ aská akatõsho, Raquel vanai. “Nõ viãnanãnõ. Miãro vaná ea mĩ inãmaĩnõ miaro aská. Naaivo yamé Jacónĩ oshatso”, akĩ.

¹⁶ Askái yãtã, Jacó, ãwẽ inárasĩ shokoanamã itãi nokókarãmaĩnõ, Liã aská akĩ. “ramaro naaivo yamé ravé nõ oshanõ. Ẽ vakẽ meraaivo too rao anõ askátivísi ma ẽ kopímaai”, ãwẽ akátõsho Jacó yamé avé oshai.

¹⁷ Askái Liã Yové Koĩ ãwẽ yokáatõsho ashõki. Askái tooinasho, 5 vake ivo meraki.

¹⁸ Askái vanai. “Ẽ toĩa aĩvo vene ẽ eneshochĩatõsho Yové Koĩni vake ea kopiki inãai”, ikĩ chinãsho, “Issacar”, akĩ aneki.

¹⁹ Askávai txipo tooinaóki, 6 vake ivo meraki.

²⁰ “Yové Koĩni ea onis amaĩnõ ramaro ẽ venẽ ea enetĩpa, 6 vake ẽ meramatõsho”, iinã “Zebulom”, akĩ aneki.

²¹ Askái revoi enekaĩnamãchtasho aĩvake merasho “Diná”, akĩ aneki.

²² Askávai txipo Yové Koĩni Raquel chinãshokĩ. Askáki ãwẽ yokáa nĩkãinã ashõki, revomakĩ.

²³ Askái tooinasho vake venevake meraki. “Vakema nishõ ẽ ravĩkaĩkaĩ ivo Yové Koĩni ea enémaai.

²⁴ Yavepa vake wetsa ea inãotikĩ ẽ iki”, iinã “José”, akĩ aneki.

Jacó awẽ mãaimai shovisho niti ivo yoã

²⁵ Askái José pakéa txipo, Jacopa ãwẽ rayóse tanamakĩ. “Arimẽse ẽ vaketi maĩ ẽ iokaĩtanõ.

²⁶ Ẽ vakerasĩ, ẽ aĩvorasĩ aká, atomẽsho ẽ mevi yomãnái mia mee ishõi niti ivo ea ato enesho. Roaka akĩ mia ẽ mee ishõkõvarãai, chinãtso”, akĩ.

²⁷ Ãwẽ askámaĩnõ ãwẽ kokã revíki, “Ea enevaĩroa, nenose nirí. Ea erísmasho mia ẽ onãtakĩ oĩai. Yavepa minõsho roapa ivo ea ashõkõvarãai.

²⁸ Awetishõ mia ẽ kopímakatsai? ‘Aatishõ’, ea mĩ amaĩnõ, mia inãnõ”, akĩ.

²⁹ Askái ã vanamaĩnõ, “mĩ inárasĩ mia ẽ vesoshovaĩvaĩna ivo mĩ tanai.

³⁰ Neno tachikarãki ẽ oĩa, mĩ inárasĩ ãtsapamarívi iyãta, ramaro itãtĩpa. Yavepa ẽ niátipakĩse mia roapa ashõkõvarãai. Ramaro ẽ vakerasĩkase ato ẽ vesonõ”, akĩ.

³¹ Ãwẽ askámaĩnõ ãwẽ rayóse vanaói. “Neno mĩ nimaĩnõ awetishõ mia ẽ kopímatira?” akĩ. Ãwẽ askámaĩnõ, “Roase, mĩ inárasĩse ẽ vesoshoókatsa. Ramaro nõ neská anõ.

³² Kashõ mĩ iná patsáyavorasĩ, txeshekavorasĩ aká ẽ kavẽi kakatsai. Ẽ aská aká ea kopímati aya keskáse ikatsai.

³³ Txiporvi ea mĩ onãtakĩ oĩkatsa, ẽ mee iti tanákõvaĩanamãsho. Txivõ vakerasĩ patsáya, toteya, txesheka aká ivoro enámamẽse. Askámẽkĩ aa keskáma mĩ meraa ivoro, ‘kerõmaka’, ea mĩ aká roase”, akĩ.

³⁴ Ãwẽ askámaĩnõ, “Mã ase, mĩ vana ẽ anõ anõ”, akĩ, ãwẽ rayósenẽ.

³⁵ Askái ã vanamẽkĩ naaivo shavapáse cabra vene ãwẽ patsáyavorasĩ, toteyavorasĩ, cabra aĩ oshõ toteyavorasĩ, txivo peshkó isokarasĩ aká arí kavẽkevaíki, ã vakerasĩ inãkãki, Jacopa vimísi iinã.

³⁶ Askái 3 shavákaĩi kaatishõ kayaki enevaĩki. Askámaĩnõ Jacóro, ãwẽ rayósenẽ iná wetsarasĩ vesosho nii.

³⁷ Askái iwi meã álamo, wetsaro aveleira, wetsaro platano aká ivorasĩ shatevaíki, shokaki oshoka akĩ tõo nẽepakevarãki.

³⁸ Iwi meãrasĩ aská ashõ inapa wakapasha akánamã masõsho eneki. Ano wakapasha kesósho atõ aĩvorasĩ ichná amískavo iinã ãwẽ aká.

³⁹ Iwi meã aská ashõ ãwẽ eneshoa, iná revokaĩa wetsaro pokeyavo, wetsaro toteyavo, wetsaro patsáyavo aká merávaĩvo.

⁴⁰ Askáki Jacopa aaivorasĩ aríkakĩ ato shokõpakéki. Aská ashõ Labãonarasĩ pokeyavo, isokavo aká ave oĩnõvo iinã vesõvakĩsho ato shokõki. Aská akĩ ãwẽ rayósenẽ inárasĩ oshkesho ivokãkéki.

⁴¹ Iná vestẽka ivorasĩni atõ aĩ akatsiimaĩnõ Jacopa wakapasha akánamã veyó iwi meãrasĩ masõsho eneki, oramachtasho atõ aĩ anõvo iinã.

⁴² Askámẽkĩ iná yomechta ivorasĩ veyóro, masõshoáma. Aská ashõ, Labão ãwẽ yomechtarasĩ kavẽsho shokõkeshokĩ, vestẽkarasĩro arí viakekĩ.

⁴³ Anõsho chinã ashõ onãtĩpai ikãkaĩi awẽ mãaimai shovii, ãwẽ inárasĩ westíma, ãwẽ mee ishõya venerasĩ, aĩvorasĩ aká, camelorasĩ, jumentorasĩ aká iti.