Wenía 3 - Yové Koĩni Vana

Venenĩ aĩvõ vana tavámati ivo yoã

¹ Aská aatiã ronoro avé yoinavorasĩ keskáma, Yavé ivo Yovepa yosíka akĩ shovimakĩ. Askái nishõ, aĩvo nĩkãki. “Awesá ira avaí Yové Koĩnã, ‘wai matxi vimi wetsãchta pitsomaroa’, ira avaí?” akĩ.

² Ãwẽ askámaĩnõ, aĩvõ rono revíki. “Naa wai matxi vimi katsése nõ piá roase,

³ askámẽkĩ, ‘vimi naki niá ivoro pitsomároa, meetima aká. Aa pishõro mato vopikatsa’, ivai”, akĩ.

⁴ Aĩvo askái vanamaĩnõ, “ãwẽ yoa, mato vopitĩpa.

⁵ Aaivo vimi pishõro, matõ vero kepẽnái, aa keská, roapa ivorasĩ tanasi, ichnárasĩ tanasi, mã amísi, iinã mato ãwẽ pãterívi”, akĩ.

⁶ Askái ãwẽ vanamaĩnõ aĩvõ vimi saná roaka oĩki, kẽevakĩ, “pipá, yosípai tsaónoshõ”, ikĩ chinãki. Askáinã metsésho pivaikĩ, ãwẽ vene pimaóki.

⁷ Vimi pivaí atõ vero kepẽnái. Anosho txĩto atõ shokoa tanavo. Askáki, figueira iwi pei ivo kekovaíki shãpati akávo.

⁸ Askái atõ shokoanamãsho, yãtã niwe shokor ikarãi. Askánamãsho Yavé ivo Yové vanatachíi. Aská nĩkãinã, wai matxi, iwi nakosho onéshoavo.

⁹ Askái atõ onémaĩnõ vene kenatachíki nĩkãki. “Ato mĩ kaai?” akĩ.

¹⁰ Ãwẽ aská akatõsho, venẽ revíki. “Wai matxi txĩto nishõ mĩ oá nĩkãinã, mia rakéshoinã ẽ onéi oa”, akĩ.

¹¹ Ãwẽ askámaĩnõ, “tsoã ‘txĩto mĩ niá’, mia araí? ‘Aaivo vimi piroa’, mia ẽ achĩa ivomara mĩ pia?” akĩ.

¹² Ãwẽ aská akatõsho, vene vanai. “Aĩvo ea mĩ inãchna ivõ aaivo vimi ea pimaai”,

¹³ ãwẽ imaĩnõ aĩvo nĩkãóki. “Mĩ awesa akárkĩ?” ãwẽ akátõsho revíki. “Ronõ ea parãtõsho ẽ pia”, akĩ.

¹⁴ Ãwẽ aská nĩkãinã, Yavé ivo Yovepa rono tanamakĩ. “Ato mĩ aská akatõsho, mia veí netãnákatsa, mivé yoinavorasĩ ikítõ ikíma mĩ ikatsai. Noyõ ikí nishõ askatase mai koro ãsh akí mĩ nikatsai.

¹⁵ Askái aĩvonĩ ichnánanãkatsa. Minõsho revoa askásevi, aĩvomẽsho revoa yoranĩ ichnánanãókatsavo. Ãatõ mapoki mia tsewe amaĩnõ, miãro ãwẽ tae txĩtóki mĩ tsewe aokatsa”, akĩ tanamakĩ.

¹⁶ Aská avaikĩ aĩvo tanamaóki. “Mĩ tooanamãsho isĩ tanai, ãwẽ pakékatsiki askásevi tanai mĩ akatsai. Askásho mĩ venẽse mĩ chinã toĩsho, mia yonoa mĩ nikatsai”, akĩ.

¹⁷ Askámaĩnõ, vene tanamakĩro, “aĩvõ vana anõ akĩ vimi mĩ pia, piroa mia ẽ achĩa ivo. Ramaro vana mĩ tavámatõshõ naaivo mai shavá ma veí netãnáai, askatase mirí yomãnáki piti mĩ merámakatsai.

¹⁸ Mai tsokósnamã, moshayãwa, akánamã piti merámashõ mĩ pikatsai.

¹⁹ Mirí kavimai mee ikí niskã ichná akĩ, piti merámashõ mĩ pikatsai. Askái mĩ niá vopirívi mĩ enékatsa. Mai mia shoviasho, arimẽse mia maikeókatsa. Awesáma, mai mia shoviasho ã ikí”, akĩ tanamakĩ.

²⁰ Askáki, Adãone, ãwẽ aĩ, “Eva”, akĩ aneki, “ashkãsho ewa”, atõ ati chinãsho.

²¹ Aská anosho, Yavé ivo Yovepa yoini shaká õpo ashõ ato sawemakĩ.

²² Askávai vanai. “Ramaro yora noke keská shoviai, roapa ivorasĩ oĩi, ichnárasĩ oĩi ma aka. Ramaro awetima akaya vimi pishõ, awetimai nimísi iinã teanõ”, ikí.

²³ Askáinã Eden wai matxisho ato poshakõki, arí ave piti merámanõvo iinã.

²⁴ Ato aská avaikĩ, vari oátõ, Eden wai repí “querubim” atõ aká ivo yovérasĩ, txii kewãa aká awetima akaya vimi vesomashõ ato shokõki.