Wenía 29 - Yové Koĩni Vana

Jacó ãwẽ kokã shavapashõ iti ivo yoã

¹ Askávai Jacó iokaĩi kaí, vari oátõ yora shokoanamã nii kaí.

² Kakĩ ãwẽ oĩa vaná wakapasha shasho anikatõ vetashméya. Askái ano txivo wetsa masoi, wetsa masoi, wetsa masoi, aká, wakapasha akatsiinã.

³ Askái aatiãro, ashkã takévaĩsho shasho sherekésho atõ inárasĩ wakapasha amavaíki arimẽse vetáshpaóvo.

⁴ Askámaĩnõ Jacopa anosho txivo vesoyavorasĩ ato nĩkãki. “Mã shokonã atonamãrá”, iinã ato ãwẽ nĩkãtõsho, “nokero Harãnamã nõ shokoa”, akávo.

⁵ Aská akĩ ato nĩkãóki. “Naorpa vake Labãonã mã oĩyará?” ato ãwẽ akátõsho, “ẽ nõ oĩya”, akávo.

⁶ “Aanã roaise niárá?” akĩ. “Ẽ niisa, roase. Ãwẽ vake aĩvake Raquel waa oaĩ, ãwẽ inárasĩnĩ”, iinã yoivo.

⁷ Aská akĩ atõ yoimaĩnõ, vanaói. “Ramaro vari keyáse, inárasĩ mã kãtxiketĩpa. Wakapasha ato amavaikíse arimẽse atõ piá wasi shokoanamã ato enetiki mã iki”, ato akĩ.

⁸ Ãwẽ askái vanamaĩnõ revívo, “Askáma, inárasĩpari keyóvarãmaĩnõ wakapasha kepẽvaíki ashkã akĩ ato nõ amakatsa”, akávo.

⁹ Askái atonĩ vanai ãwẽ nimaĩnõ, Raquel ãwẽ papã inárasĩ vesoyasho, kawivarãi tachikarãi.

¹⁰ Askámaĩnõ, ãwẽ koka Labãone vake ãwẽ inárasĩ aká meravaíki akĩvísi vaná wakapasha kepẽvaíki ato amapakeshokĩ.

¹¹ Aská avaí Raquel mekí avaí, mekípákai wai ikí

¹² vanai. “Ea mĩ papã wetsama, Rebecã toá ea”, iinã ãwẽ yoãshoatõsho, nĩkãvai eréi kashõ, ãwẽ papa ãwẽ vana ivo katseki yoãshoi kakĩ.

¹³ Askámaĩnõ ãwẽ papa, ãwẽ vakẽ yoãki aská aká nĩkãinã oĩnõ iinã kaí. Kakĩ Jacó meratachísho, atxivaĩsho mekí avaikĩ ãwẽ shavapa ewevarãki. Askámaĩnõ anosho ãwẽ ikaikaĩnarasĩ ãwẽ koka katseki yoãshokĩ.

¹⁴ Ãwẽ aská nĩkãinã, “anõse, miaro eapá, ẽ imi mia”, akĩ Labãone. Askái Jacó, ãwẽ kokã shovõ oshe westíkase tavái nii.

¹⁵ Askávai txipo Labãone Jacó tanamakĩ, “mia ẽ wetsamamẽkĩ, kopímáma ea mia mee imatĩpá. Awetishõ mia ẽ kopímatirá?” akĩ nĩkãki.

¹⁶ Aská aa yoraro ãwẽ vake aĩvake ravévakĩ aya, vevoke ivõ anero “Lia”, txipoke ivoro “Raquel” aká.

¹⁷ Askásho Lia ivoro ãwẽ verose roakachta, askámaĩnõ Raquel ivoro yoíkachta, ichnámachta aká.

¹⁸ Askáki Raquel ivo noíki, ãwẽ koka aská akĩ. “7 vari mia mee ishõvaíki mĩ vake txipoke ivo ẽ oĩnõ”, akĩ.

¹⁹ Ãwẽ askámaĩnõ, “roase, mia oĩmanõ, yora wetsaro ea oĩmatĩpá. Evé nitso”, akĩ.

²⁰ Askái Jacó ano 7 vari taváki ãwẽ koka mee ishõki. Vari ãtsaka tavái ãwẽ niámẽkĩ inomachta tanáki, Raquel noíi ãwẽ niásho.

²¹ Askái 7 vari nokómaĩnõ, ãwẽ koka nĩkãki. “Ramaro nõ tanáchna ivo ma vari nokóai. Mĩ vake ea inã, ẽ oĩnõ”, iinã

²² ãwẽ yokáatõsho, ãwẽ kokã ato saí imakatsiinã yorarasĩ keyoki kãtxivarãki.

²³ Ano yamé ato ãwẽ kãtxivarãnamãsho ãwẽ vake, Lia ivorvi ã eneshoa, avé oshai.

²⁴ (Aatiã Labãone mee ima ivo aĩvo Zilpa ma eneshoáya, ãwẽ vakẽ ave toĩsho mee imanõ iinã.)

²⁵ Askáinã shavá nakoi, vesokaĩki, aamarívi merakõki. Askáki ãwẽ rayóse vatxĩki. “Awesakĩ ea mĩ neská akárkĩ? Raquel ivoka oĩnoshõ iinã ẽ mee ikaikaĩnarvi, awesainã ea mĩ parãrakĩ?” akĩ.

²⁶ Ãwẽ askái vanamaĩnõ revíki. “Neno nokẽ tanátiro ãwẽ txipoke ivopari noke inãsmarvi, ãwẽ vevoké ivopari inãrívi.

²⁷ Ramaro ẽ vake veneyai saí ikí 7 shavápari ave tavákéinã. Askámaĩnõrívi Raquel ivo mia ẽ inãómaĩnõ 7 vari ea mee ishõótso”, akĩ.

²⁸ Ãwẽ aská akatõsho, ãwẽ rayóse anõ akĩ manáki, 7 shavákase Lianĩ saí ikĩ. Ãwẽ askámaĩnõ Raquel ivo inãóki.

²⁹ (Aatiã Labãone mee ima ivo aĩvo Bila ma eneshoáya, ãwẽ vakẽ ave toĩsho mee imanõ iinã.)

³⁰ Askáki Raquel ivo roa akĩse tasaóki. Aaivoro ãwẽ anõ noípa, Liaro ãwẽ anõ noíkamáse. Ano askái nishõ 7 vari taváki ãwẽ rayóse mee ishõóti.

³¹ Askái Yavepa Jacopa Lia roa akamase oĩinã, Lia revomakĩ tsaõki, askámaĩnõ Raquel ivoro revosma.

³² Askáki Lia, vake venevake meravai, “Yavepa ẽ awe onísa ea oĩai askásho rama vakeyashõ ẽ vene enõ noíkatsa”, iinã “Rúben”, akĩ aneki.

³³ Askávai txipo venevake wetsa meraovaíki “Simeão” akĩ aneki. “Yavepa ea roa akamase nĩkãinã, vake wetsa ea inãóai”, ikí.

³⁴ Askávai txipo venevakesevi wetsa meraovaíki, “Levi” akĩ aneki, “vakerasĩ 3 ẽ merashoatõsho ẽ venẽ ea tasakoĩkatsa”, ikí vanai.

³⁵ Askávai txipo venevakesevi meraovaíki “Judá” akĩ aneki. “Ramaro Yavé ẽ ravikatsa”, ikí. Askávai txipo revoóma, inopai tsaói.