Wenía 28 - Yové Koĩni Vana

¹ Askávai txipo Isaquẽ Jacó kenasho vana roapatõ akatsiinã tanamakĩ. “‘Neno Canaã shavo ẽ ninivarãnõ’, iroa.

² Ramaro Padã-Arã shavapa katã, anosho mĩ txaitxo Betuẽl shovõ nishõ, mĩ koka Labãone meráshavo atã, oĩki.

³ Yové Weeya ivõ roapa ivo mia ashõtikĩra. Mĩ revomarasĩni ato revomaotikĩra, atomẽsho yora shoko wetsarasĩ ave shovinõvo.

⁴ Abraão vana roapa ã netãtõsevi mia ashõotikĩra, mĩ revomarasĩ aká. Anosho miapámavorasĩ ato nakosho nishõ, mai mĩ ivoketikĩra, Yové Koĩni Abraão inãti ivo mai”, akĩ.

⁵ Isaquẽ Jacó aská akĩ yonomaĩnõ, Padã-Arãnamã kaí, arameu yora Betuẽl vake Labãonamã. Labãone takero Rebeca, Esaúnĩsho Jacopa ewa.

⁶ Askáki Esaupa, Jacó ãwẽ papã vana roapatõ avai ivo chinãki. “Padã-Arãnamã kashõ aská atso aĩ iái, askámẽkĩ Canaã shavo ninivarãroa”, ãwẽ avai ivo chinãki.

⁷ Askávaíse, Jacó ã papanĩsho ãwẽ ewã vana anõ avainii, “kaitserã, Padã-Arãnamã”, ikĩ tanaóki.

⁸ Askái, “ẽ papa Canaã shavo roa amísmarvitserã”, ikĩ chinãóki.

⁹ Askáshovísi, arí aĩ ayasmẽkĩ, kashõ Ismaẽl shovõ nishõ Maalate ninivarãki. Maalatero Nebaiotẽ take, atõ papa Ismael, atõ ochtxóro Abraão.

Jacopa Betelnamãsho namáti ivo yoã

¹⁰ Askái Jacó Berseba shavá enevaĩi kaí, Harã shavá chinãvaĩki.

¹¹ Yãtamaĩnõ, wetsanamãse shasho mashko ninivarãsho anõ vosekmeinasho oshai.

¹² Ano oshai rakásho namáki ãwẽ oĩa, paíti maĩ votówani kaí, naí shavapa kaa oĩki. Aská yonótaya yovérasĩ paítinĩ nerisho onenii voí, orisho onepakei veí akávo ãwẽ oĩmaĩnõ

¹³ Yavé aa tavásho vanainái. “Earo Yavé, Abraão, Isaque aatiisho ravipaóa ivo Yové ea. Naa, mĩ anõ rakáa ivo mai, mia, mĩ revomarasĩ aatii mato ẽ inãkatsa.

¹⁴ Minõsho revovaĩkatsayavorasĩ mai pototii ikatsai. Atovose peás ii itãi vari oátõ, vari kaatõ, naí paróri, naí paró wetsã, shokoi aa atãkatsavo. Askái yora shoko wetsarasĩro mia, mĩ revomarasĩ akámẽsho ashkã vana roapa netãnásho shokokatsavo.

¹⁵ Mĩ niátipakĩse peshót ashõ mia ẽ vesokatsa. Aská avaikĩ, naaivo maĩ arimẽse mia ẽ ewevarãókatsa. Mia enema ikatsai, mia aská akatsai ivo katsése mia ẽ ashõkõvaĩkatsa”, akĩ tanamakĩ.

¹⁶ Jacó aská akĩ namátani vesokaĩsho, “Anõse, Yavé neno niá ẽ oĩai, ẽ tanamarvi”, ikí.

¹⁷ Askái rakéi vanai. “Nenoro rakérívi, Yové Koĩni shavárvi, neno naí shavári kepoti sawérívi”, ikí.

¹⁸ Askái shavá nakoi weníináki ãwẽ anõ vosekméa shasho mashko tsaõnivaíki, azeite shenĩ voiki.

¹⁹ Aská avaikĩ ano aneki “Betel” akĩ aneki, vevotiã ãwẽ anero Luzmẽkĩ.

²⁰ Aská avaikĩ, Jacó tekísma ivõ Yové Koĩnĩ vanai. “Yové Koĩní, evé nishõ ea vesoi, pitinĩ akĩ õpo ea inãi,

²¹ arimẽse ẽ papanamã meskótaimaki ea nokómaí, mĩ aká ivoro, mia ená ikatsai.

²² Aská shasho mashko ẽ tsaõnia ivonamãro, mĩ shavá ikatsai. Aská akĩ ea mĩ inã ivo katsése, 10tíi pashka pashkavaíki, westíse arimẽse mia inãvaĩvaĩkatsa”, akĩ Jacopa.