Wenía 27 - Yové Koĩni Vana

Isaquẽ Jacó vana roapa ivo netãti ivo yoã

¹ Askávai txipo Isaque sheniwetsa mashtésho veshoi. Askáki shavá wetsã ãwẽ vake vevoké ivo Esaú kenasho aská akĩ. “Yomé”, ãwẽ imaĩnõ, “awerá papá? Neno ẽ niá”, akĩ.

² Ã aská akatõsho, “ea ma iki sheniwetsa mashtéai, ea mĩ oĩaitĩ, ẽ vopikatsa shavá ea tanama.

³ Mĩ tawa vivainii kashõ ichnáchta ea merashotã.

⁴ Aská akĩ yoini meravaíki piti ichnáma, ẽ rayá akáka ivo naí avaikĩ ea vishõvarãtso ẽ pinõ. Pivaikĩ ẽ vana roapa ivo netãsho mia enenõ, ẽ vopiti vevo”, akĩ.

⁵ Aská nĩkãinã Rebecã Esaú ãwẽ nii kamaĩnõ,

⁶ Jacó yoãshokĩ. “Mĩ papa Esaúnĩ askái vanavo ẽ nĩkãai.

⁷ ‘Yoini meravaíki naí avaikĩ vivarãtso, ẽ pinõ. Pivaikĩ vana roapa ivo netãsho mia enenõ, ẽ vopiti vevo Yavepa oĩni’, iki.

⁸ Ramaro neská atãtso, nĩkãwẽ.

⁹ Cabra shokoanamã kashõ ãwẽ vake roaka ivo ravévakĩ ea vishõta, piti ichnáma, mĩ papã rayá akáka ivo ẽ naí ashõnõ.

¹⁰ Miã vishõvaĩtátso, mĩ papã pivaikĩ, vana roapa ivo mia ave netãnõ, ãwẽ vopiti vevo”, akĩ.

¹¹ Ãwẽ aská akatõsho, “ẽ take Esaúro raniyãwakarvi, earo ranimarvi,

¹² askásho ẽ papã ramãpakevãvãki ea onãmísi, ẽ parãa tanavaíki ãwẽ vana roapa ea netãimamísi, enõ veí vana ã netãrívi”, akĩ.

¹³ Askái ãwẽ vanamaĩnõ ãwẽ ewã “ease ave anõ, veí netãkiro. Miãro mia ẽ yonoa ivo vitã”, akĩ.

¹⁴ Ãwẽ ewã aská akĩ yonoatõsho vishõtakĩ. Aská akĩ ãwẽ vishõtamaĩnõ piti ichnáma, ãwẽ papã rayá akáka ivo naí ashõki.

¹⁵ Piti aská akĩ naí ashõvaíki, ãwẽ vake vevoketõ õpo, shovõ nanéa ivo vivaikĩ ãwẽ vake txipoke sawemakĩ.

¹⁶ Aská avaikĩ cabra vake, ãwẽ shakapa Jacó ãwẽ mevinamã rakoketaní, ãwẽ teshonamã terák akí, akĩ.

¹⁷ Aská akĩ piti ichnámakĩ, ãwẽ naí aká ivo, pão tashnasho Jacó inãki.

¹⁸ Aská akĩ ãwẽ ewã inãmaĩnõ Jacopa vivainii kashõ, ãwẽ papa kenaki. “Papá”, iinã ãwẽ vakẽ kenatõsho, “awerá yomé, mia tsoará?”

¹⁹ ãwẽ imaĩnõ, “ea Esaú mĩ vake vevoké ivo, ea mĩ yonoa ivo mia ẽ ashõai. Yoini ẽ meratana pirí, pivaikĩ mĩ vana roapa ivo ea netãnoshõ”, akĩ Jacopa.

²⁰ Ãwẽ vakẽ aská akatõsho, “ii awesá yoini mia inó atãmakarkĩ?” akĩ. “Aavirá, Yavé mĩ ravia ivo Yovepa, ea yomẽ ashõatõsho ẽ aká”, akĩ.

²¹ Jacó askái vanamaĩnõ, “askáro mia meenõrí Esaúseraki”, akĩ ãwẽ papã.

²² Jacó ã papã aská akatõsho, aa kesó nii kaí. Aa kesó ãwẽ nii kamaĩnõ, ramãpakevãvai vanai. “Ãwẽ metáshero Esaúsemẽkĩ ãwẽ oiro Jacó nĩkã askĩ”, akĩ.

²³ Askái ãwẽ metáshe raniyãwasho onãma ãwẽ take keskáse meeinã. Askáinã ãwẽ vana roapa ivo netãkatsiinã

²⁴ nĩkãki. “Mianã ẽ vake Esaú ivoserá?” ãwẽ imaĩnõ, “ẽe, ea aasekatá”, akĩ.

²⁵ Ãwẽ aská akatõsho, vanai. “Yoini mĩ meratanaa ivo neno vivarãa ẽ pinõ, pivaikĩ vana roapa ivo mia netãnõ”, akĩ. Aská akĩ Jacopa ãwẽ papa pimaivaíki vinhone matĩmakĩ.

²⁶ Ãwẽ aská akatõsho, “ea mekí amarí”, ãwẽ imaĩnõ

²⁷ ã vakẽ mekí amaki. Askái õpo itsa sheteinã Isaquẽ ãwẽ vana roapa netãi vanai. “Ase, ẽ vakẽ itsaro, Yavepa vana roapa netã ivo waĩ itsa keská.

²⁸ Yové Koĩni naĩsho niví para akĩ, mai matsi akĩ, trigonĩ vinho mia ashõtikĩra.

²⁹ Yora shoko wetsarasĩ minõ eséyai maĩ vetsek ipái shokonõvo. Mĩ takevo mĩ ato yonoa shokosho mia veyó vetsek ipaónõvo. Yora mia veí vana netãya ivoro aaivo vanasevi netãnaókatsa. Askámaĩnõ, yora vana roapa mia netãya ivoro, aaivo vanasevi netãnaókatsa”, akĩ.

³⁰ Anosho ãwẽ vana roapa ivõ Jacó netãa, kayakaĩmaĩnõse, ãwẽ take Esaú nitãi tachikarãi.

³¹ Askátani oshõ arí piti roaka naí aovaíki, ãwẽ papa vishõvaíki aská akĩ. “Papá tsaóiná. Yoini mia ẽ ashõtana pinosho. Pivaikĩ vana roapa ea netãnoshõ”, akĩ.

³² Ã aská akatõsho, “mia tsoará?” iinã ãwẽ nĩkãatõsho, “eatsikĩ, Esaú, mĩ vake vevoke ivonã”, akĩ.

³³ Ãwẽ aská nĩkãinã Isaque tari ikí, naíi vanai. “Tsoará yoini atãi oshõ ea vishõvarãyanã? Mĩ nokókatsa vevo ma ẽ pia, aa vana roapa ma ẽ netãi, aarvi ikatsai ichnámai niaya”, akĩ.

³⁴ Ãwẽ papa aská nĩkãinã, Esaú naíi, txakar iki ranóma. “Mĩ vana roapa ea netãó papá”,

³⁵ ãwẽ imaĩnõ, “mĩ takẽ ea parãtõsho mia ẽ netãkatsiki ivo, ãatõ ma via”, akĩ.

³⁶ Ã aská akatõsho, “parãki ea ma ravévakĩ aka. Vevo ea askásevi aochná. Txipokemẽkĩ vevoke keskái niakeshõ ea ivokãkechná. Askávaíki rama mĩ vana roapa ivo ea viãkãóai. Askáinãvísi Jacó ‘paranka’, nõ akárvi. Askánã, wetsa ea mia mekeshoamará”, akĩ nĩkãki, ãwẽ papa.

³⁷ “Jacó ma ẽ eneshoa. Ãatõ mia, mĩ wetsamavorasĩnĩ ashõ mato yonokatsa. ‘Trigonĩ vinho mia mãamasevi ikatsai’, ma ẽ tanamai. Miaro ẽ awesarokataikĩ, yomé”, akĩ.

³⁸ Ã aská akámẽkĩ Esaú aví ikíma, “yama yamakará papá? Mĩ vana roapa ea netãó”, iinã, isĩinasho wai ikí.

³⁹ Ãwẽ askámaĩnõ ãwẽ papã aská akĩ, “mai matsi enekésho niví naĩsho para ikí yamanamã ora mĩ nikatsai.

⁴⁰ Toĩtiyai mĩ nimaĩnõ, mĩ takẽ mia yonokatsa. Askámẽkĩ askáse mĩ nasanímaĩnõ ãatõ mia yonoóma ikatsai”, akĩ.

⁴¹ Askáinã Esaú, ãwẽ takeki ichnákéi isĩpatõ ikí, vana roapa ivomẽsho. Askái arí vanai. “Ẽ papamẽsho ronakatsa omakaĩai, askámaĩnõrívi ẽ take yamamanõ”, ikí.

⁴² Askái, ãwẽ vana Rebeca atõ yoãshoatõsho, Jacó kenavaíki tanamakĩ, “mĩ takẽ mia kopiki mia yamamakatsikí.

⁴³ Ramaro neská akĩ mia ẽ yoãshokatsiki, nĩkãtso. Rayákaĩta Harãnamã, ẽ take Labão niánamãnã.

⁴⁴ Ano avé nishõ oĩta, mĩ take ãwẽ chinã ichnátõ ikípari ave taváke inõ,

⁴⁵ minõpari ave rawe inõ. Aská tavákemaĩnõrívi yora mia ẽ yonoshonõ mia ave ewenõ. Shavá wetsãse ẽ vake ravése atõ keyóa ea oĩkatsikíma”, akĩ.

⁴⁶ Askávai txipo Rebeca Isaquenĩ vanai. “Naaivo Hetẽ shavorasĩmẽ ea ma ãtsãai. Jacopa atopa shavo ãwẽ ninivarãa ivoro, ea tsaótĩpá”, ikí vanai.