Wenía 26 - Yové Koĩni Vana

Isaquẽ Gerar maĩ kakáya parãti ivo yoã

¹ Aatiã, aaivo mainamã vevõ Abraão niyãtatõsevi ioi, piti makiói. Aská oĩinã Isaque Gerar maikiri chinãvaĩi kaí, filisteu yorarasĩni kakáya Abimeleque niánamã.

² Anosho Yavepa Isaque meramashõ vana akĩ. “Egitokiríro karoa, anõ mĩ niti mai mia ẽ yoikatsa, ano ninosho.

³ Askái neno nii niitso. Mia vesokésho, roapa ivorasĩ mia ẽ ashõkatsa. Ato mĩ revomarasĩ naaivo mai keyoki ato ẽ inãkatsa, mĩ papa Abraão tavámatima ivo vana ẽ ashõmta ivo ẽ mashtéshokatsai.

⁴ Mĩ revomarasĩ atõ revovaĩa westíma, naí shavapa masoa ichitíi. Mai ato keyoki ẽ ivomakatsai. Askái revoa wetsamẽsho, maitioi yora shoko wetsarasĩ vana roapa ivo netãnákatsa.

⁵ Awesáma, Abraãoro ẽ vana anõ avaivaĩchnáya. Ẽ yonoa keská akĩ ea ishõya, ẽ yosin ikí ivo, ẽ vana aká, ẽ esé ivorasĩ aatii ea nĩkãshoaya ipawa”, akĩ.

⁶ Aská nĩkãinã Isaque Gerarnamã niakéi.

⁷ Askái ano ãwẽ niakemaĩnõ, aaivo shavapa shokoyavõ venerasĩni ãwẽ aĩmẽ nĩkãvotõsho, “ẽ aweshavorvi”, imíska. Rebecaro roakachtasho, “ẽ aĩ”, ikatsi rakéi, “anõsho ea yamamamísivo”, ikĩ chinãinã.

⁸ Ano Gerarnamã shavá ãtsa tavái ãwẽ nimaĩnõ, shavá wetsã Abimeleque, filisteu yora kakáyatõ ãwẽ shovo orõ patákaĩsho ã oĩa, Isaquẽ ãwẽ aĩ shonĩ shonĩvãa oĩki.

⁹ Aská oĩinã Isaque kenasho vana akĩ. “Naa mĩ aĩrvikatá. Awesainã ‘ẽ aweshavo’, mĩ ivaira?” ãwẽ imaĩnõ, “mãa, ‘ea anõsho yamamísivo’, iinã ẽ ivairívi”, akĩ revíki.

¹⁰ Ãwẽ askámaĩnõ, “aská atimarívi. Nokepa yora wetsã oĩkatsimaĩnõ, nokeki mĩ venatakeãai”, akĩ.

¹¹ Askáki ãwẽ yorarasĩ katseki ato tanamakĩ. “Naa yora ãwẽ aĩnĩ ashõ ati akaya ivoro yamakatsavere”, ato akĩ.

¹² Askái aaivo vari ano nishõ Isaque piti vanárasĩ ãwẽ vanaa, ikaĩi, 100 tavákepá piti westíma merámakĩ, Yavepa roapa ivo ashõatõsho.

¹³ Ano askái nishõ chinã ashõ onãtĩpai ikãkaĩi awẽ mãaimai shovii.

¹⁴ Askái ãwẽ yoini iná akarasĩ ãtsaka, ãwẽ shokõkenavorasĩ westímásevi aká oĩinã, filisteu yorarasĩni naíshoávo.

¹⁵ Askáinã Isaquẽ papa ãwẽ vopimatiã, ãwẽ shokõkenavorasĩ atõ ãwẽ pokĩmati ivo vaná wakapasha kãtxía ivorasĩ keyoki vestõkãvo.

¹⁶ Anosho Abimelequẽ Isaque tanamakĩ. “Noke tavaki isĩpáka ayakeshõ mĩ niásho neno nokẽ maĩ nióroa, katã”, akĩ.

¹⁷ Ãwẽ aská akatõsho, Isaque anosho ãwẽ peshé txoyo avaí, Gerar mai mató sapakanamã shaváyashõ nii kaí.

¹⁸ Ano tekisho vaná wakapasha, ãwẽ papa vopimaĩnõ filisteu yorarasĩni vestõmta ivorasĩ, merasho pokĩóki. Aská avaikĩ ãwẽ papã anemtá ivo anẽsevi anepakeóki.

¹⁹ Askávai txipo ãwẽ shokõkenavõ arí mai pokĩsho wakapasha choviki meravo.

²⁰ Aská akĩ atõ meraómaĩnõ, Gerarnamã txivo vesoyavorasĩni ato vatxĩvo, “wakapasha nokenárvi”, iinã. Atõ askámaĩnõ Isaquẽ ano “Eseque”, akĩ aneki. Awesáma, “anõsho vatxinanãtivo”, ikí keská vana.

²¹ Askáki wetsanamã atõ pokĩómaĩnõ, Gerar yorarasĩni ivokekatsióvo. Askámaĩnõ Isaquẽ “Sitna” akĩ ane netãóki. Awesáma, “ranĩnanãa” ikí keská vana.

²² Askái anosho iokaĩi kakĩ wetsa meraóki. Anoro yora wakapashãsho ikiyavo yama oĩinã vanai. “Ramaro Yavepa mai yora meskómanamã noke inãatõsho nenosho mãaimai nõ shokokatsa”, iinã ano “Reobote”, akĩ aneki. Aaro “yora meskómanamã”, ikí keská vana.

²³ Ano nishõ iokaĩi, Bersebanamã tekii.

²⁴ Askávai aaivo yamepáse Yavepa meravaíki tanamakĩ. “Mĩ papa Abraãone ravipaóa ivo Yové ea. Rakéroa, Eãvisi mia ẽ oĩrívi. Roapa ivo mia ẽ ashõkatsa. Ẽ nitxĩa yora Abraãomẽ noíi nishõ miapa ivo yora ẽ revomakatsai, westíma ikatsai”, akĩ.

²⁵ Askámaĩnõ Isaquẽ anõ maki ati tapo avaikĩ Yavé ravimaĩnõ, ãwẽ shokõkenavõro peshé akãi, vaná wakapasha pokĩi akávo.

²⁶ Askávai shavá wetsã, Abimeleque Isaquenĩ vananõ iinã Gerarnamãsho kaí, Austate, Ficol akánĩ. Austatero ãwẽ avé takéa, Ficolro, teske akayatõ kakáya.

²⁷ Ano atõ tachivaĩmaĩnõ Isaquẽ ato nĩkãki. “Awesai evé vananõ iinã mã veárá? Matõ maĩsho ea ichnaki ea mã yonochnákatá”, ato akĩ.

²⁸ Ato ãwẽ aská akatõsho, revíki. “Yavepa mia vesoa nõ tanaai. Askáinã tanáti tavámakĩnanãimai nõ shokonõ.

²⁹ Miã noke meskoroa, nokẽ nerishõ noke mia meskootĩpásevi. Roa akĩse mia nõ nitxĩvaĩvaĩchná. Roakakĩ mia meskotakĩma mia nõ yonochnákatá. Ramaro Yavepa roapa ivo mia ashõa nõ tanaai”, akĩ tanamakĩ.

³⁰ Atõ askámaĩnõ Isaquẽ piti ãtsaka naí avaikĩ atonĩsho pikĩ.

³¹ Askávai shavá nakoi, tavámatima ivõ vana ikinanãvo. Askái vanai mashtékaĩvaíki, Isaquẽ ato yonoa, meskótaimai voávo.

³² Aaivo shavapasevi ãwẽ shokõkenavõ mai pokĩsho, “wakapasha nõ meraai”, iinã yoãvarãvo.

³³ Atõ aská akĩ yoãvarãmaĩnõ Isaquẽ “Seba”, akĩ aneki vaná waka. Askátõsho aaivo cidade Berseba iki anéi, aaivo anẽ rama anõ anésa.

Esaupa aĩvorasĩ itivo ivo yoã

³⁴ Esaúro askáti, 40 vari ayatiã, heteu shavovo ravé ashõ ninivarãki. Beeripa vake Judite, Elomnẽ vake Basemate aká ato ninivarãki.

³⁵ Askámaĩnõ, Isaquenĩ Rebeca atomẽ chinã notsiyai shokovo.