Wenía 25 - Yové Koĩni Vana

Abraão vopiti ivo yoã

¹ Askávai txipo Abraãone shavo wetsa ninivarãóki ãwẽ anero “Quetura.”

² Aaivo shavomẽsho ãwẽ vakerasĩ Zinrã, Jocsã, Medã, Midiã, Isbaque, Sua aatii ato meraki.

³ Sebanĩ Dedã merayaro Jocsã. Dedãne merávoro assurita yorarasĩ, letusita yorarasĩ, leumita yorarasĩ aatíi.

⁴ Midiãne merávoro Efá, Éfer, Enoque, Abida, Elda aatíi. Naarasĩ katsésero Queturã ato revomaa.

⁵ Aská akĩ Abraãone ãwẽ awerasĩ keyoki Isaque inãkéki.

⁶ Askámaĩnõ, ãwẽ aĩvorasĩ rakãamẽsho ãwẽ vakeyarasĩ ivoro onis akĩ awe ato inãpakevaíki, ãwẽ vopiti vevo Isaque ato pashkavakĩsho, “vari oákiri maĩ shokotana”, iinã ato yonoki.

⁷ Askái ãwẽ vari 175 niti.

⁸ Sheniwetsa mashtésho ãwẽ papavo merai kati.

⁹ Askámaĩnõ, ãwẽ vakerasĩni, Isaque, Ismael aatíishoro, shasho pepi sawéatõ atõ papa roa akávo. Aaivo shasho pepiro Macpelanamã, Manre orakama, Zoarpa vake, Efromne mainamã.

¹⁰ Anoro Abraão, ãwẽ aĩ tavá roa ativo, heteu yorarasĩ ato ãwẽ kopímashõ viãkãti ivo mainamã.

¹¹ Askái Abraão vopimaĩnõ, txipo Isaque Yové Koĩni ãwẽ vana roapa ivo netãóki. Askái aaro vaná waka kesó nii kati, ãwẽ anero “Beer-Laai-Roi.”

Ismaẽl vakerasĩ ivo yoã

¹² Naatíiro Ismaelmẽsho revoarasĩ yoã. Ismaelro Abraãone Hagarmẽsho, meramtá ivo vake. Aaivo aĩvoro, Sarã mee ima, Egito shavo.

¹³ Askái, Ismaẽl vakerasĩro naatíi. Ãwẽ vevokékaro, Nebaiote, atxõyase Quedar, atxõyase Abdeel, atxõyase Mibsão, atxõyase

¹⁴ Misma, atxõyase Dumá, atxõyase Massá,

¹⁵ atxõyase Hadade, atxõyase Tema, atxõyase Jetur, atxõyase Nafis, Quedemáro txipokéchta aatíi.

¹⁶ Askái naatii Ismaẽl merávoro 12 kakáya shovitivo. Askái atõ shavá, atõ peshé akánamã atõ anẽse anepakévo.

¹⁷ Askái Ismael 137 vari nishõ, ãwẽ papavo merai kati.

¹⁸ Ãwẽ revomarasĩro Havilánĩ Sur rakáa ivo mai tõovakĩ shokopaóvo, Egito mai kesotõ, ano Assurkiri kaa vainamã. Askái atõ takevonĩ ranĩnanãi shokopaóvo.

Esaúnĩ Jacó iti ivo yoã

¹⁹ Abraãone vake Isaque yoãnáro neská. Abraãone Isaque merati.

²⁰ Isaquẽ, 40 varinamãsho Rebeca ninivarãki. Aaro Betuelpa vake, Labãone aweshavo. Atovoro arameu yorarasĩ Padã-Arãnamã shokotivo.

²¹ Askái ãwẽ aĩ revomaa oĩinã Isaquẽ Yavé ã aĩ vana ashõki. Askámaĩnõ ãwẽ vana nĩkãinã ashõki. Askái anosho, Rebeca tooinasho

²² vake ravé nanéi. Askái atõ ichnánanã tanainã, “ea awesáikĩ”, iinã Yavé nĩkãki.

²³ Ãwẽ aská akatõsho, revíki. “Mĩ shakĩ naki yora shoko ravévakĩ ikatsaivere. Ravé pakévaĩsho pashkánanãkatsavo. Wetsa ivorasĩro mestẽpá ikatsaivo. Askámaĩnõ vake vevoke ivoro awesakeshóse txipoketõ yonoa niá ikatsaivere”, akĩ.

²⁴ Askái Rebeca vake pakéti shavá nokómaĩnõ, anõse, venevake ravévakĩ nanéa tanaki.

²⁵ Vevo pakékaĩya ivoro õchĩka, raniyãwaka aká oĩinã “Esaú”, akĩ aneki.

²⁶ Txipoke ivoro ãwẽ takẽ tae txĩtó atxisho pakékaĩi. Ãwẽ aská oĩinã “Jacó”, akĩ aneki. Aatiã Isaque 60 vari aya.

²⁷ Askávai txipo vake ravé kanisho, Esaú ivoro yoiniya kanisho, askatase niitero niaya. Askámaĩnõ txipoke ivoro tanáyãwaka yora, askata shavapase niárvi.

²⁸ Atõ papa Esaúmẽ noí noíka, yoini ichná merasho ãwẽ pimaatõsho, askámaĩnõ atõ ewaro Jacó ivomẽ noíka.

²⁹ Askávai shavá wetsã Esaupa nitãi okĩ, shopĩ ranómaka tanainã Jacopa pasaa ivo

³⁰ yokátachíki. “Ea shopĩ ranóma, mĩ pasa õchĩka ivo ea pima”, akĩ. Askásho txipo, Esaú “Edom”, akĩ anetivo, õchĩka ãwẽ pimaĩnõ.

³¹ Ãwẽ askámaĩnõ Jacopa revíki. “Roase, askámẽkĩ ea txipokemẽkĩ, miã vevoke keská iyakeshõ ea oĩmatso askáro”, akĩ.

³² Ãwẽ aská akatõsho, “mĩ aská roase, yamairívi iki ea, vevokékasho ẽ ninõ ikĩka chinãtĩpá ea”, akĩ.

³³ “Tavámatima ivo vanãpari ea arí”, akĩ Jacopa. Ãwẽ aská akatõsho, aaivo vanãpari avaikĩ vevoke ivo keská iyakeshõ Jacó eneshokĩ.

³⁴ Aská amaĩno, Jacopa pão, lentilha pasa aká pimaki. Aská pii mashtévai Esaú weníinakaĩi kaí. Askái anosho, vevoketõ ari chinãotanáma, eneski.