Wenía 24 - Yové Koĩni Vana

Isaque mai wetsã atõ shavo vishõti ivo yoã

¹ Abraão ãwẽ sheniwetsa mashtéanamãsho Yavepa roaparasĩ katsése ashõkõvarãki.

² Shavá wetsã ramama ãwẽ awe katseki vesomaináti ivo yora kenasho tanamakĩ. “Ẽ kichi teró ea atxitso.

³ Yavé, naínĩ mai shavá vesoya ivo Yovepa anemẽsho tavámatima ivo vana ea neská ashõtso. Neno ẽ anõ niá ivo maĩ ẽ vake Isaque Canaã shavo ea oĩmakãroa.

⁴ Ẽ wetsamavorasĩ shokoanamã ivo shavo miã ẽ vake kavẽsho vishõta”, akĩ.

⁵ Ãwẽ aská akatõsho, ãwẽ yonoa yorã nĩkãki. “Aĩvo ãwẽ evé okatsikímaro ẽ awesakatsai? Mĩ anõ oyãta maikiri mĩ vake arimẽse ewevaĩóki?” ãwẽ akátõsho,

⁶ “ẽ vakero aská akáma, arimẽse ea imavaĩokatsikíma.

⁷ Yavé naĩ niá ivo Yovepa, ẽ papa, ẽ wetsamavorasĩni mai aatii ea enemavarãki, tavámatima ivõ ea vana ati, ‘mĩ revomaa yorarasĩ naaivo mai ato ẽ inãkatsa’, iinã ea tanamati. Ãatõ yonoa yovepa mia yoivaĩatõsho, kakĩ mĩ merakatsa ẽ vakẽ aĩ.

⁸ Askámaĩnõ aĩvo mivé okatsikímaro, roase, vana tavámatima ivõ ea mĩ aká ivo enéstso. Askámaĩnõ ẽ vakero ea ewẽvaĩroa, ari ea yonokatsikíma”, akĩ.

⁹ Askái ãwẽ vanamaĩnõ, ãwẽ mee ima ivo yorã, ãwẽ kichi teró atxisho, tavámatima ivo vanã akĩ.

¹⁰ Askái avé vanavaíki, ãwẽ ivõ 10 camelo atxishoí, awe roapa ivo vii, avaí, Naor anõ nipawa shavá Mesopotámiakiri kaí.

¹¹ Askákaĩi nokókaĩi, yãtã kanívenarasĩni wakapasha atõ vii vẽvẽa varinamã. Askái ano cidade kesotõ vaná wakapashanamã ãwẽ camelorasĩ maĩ ato metĩ ipamavaí

¹² Yavénĩ vanai. “Yavepá miaro ẽ ivo Abraãone Yové, askásho ẽ chinã ivorasĩ ea ashõtso, ẽ ivo askásevi, anõ noípakĩ ea vesoshotso.

¹³ Neno vaná wakapasha tsaóa kesó ẽ niá. Askáki naaivo cidadenamã shokoyavõ vake kanívenarasĩ, wakapasha vinõ iinã atõ vemaĩnõ

¹⁴ wetsase neská akĩ ẽ vana akatsai, ‘chomo tsaopaké. Wakapasha ẽ anõ’, ẽ akátõsho, ‘mã ase arí, mĩ camelorasĩ mia amaoshonõ’, ikí vanaya kanívena ivo itikĩ, Isaque mĩ kavẽshoáro. Aská ẽ oĩa ivoro, ẽ ivo anõ noípakĩ mĩ vesoa ikĩ ẽ tanakatsa”, akĩ.

¹⁵ Askánamãsho Yavénĩ vana iski ãwẽ oĩa Rebeca chomo iánisho ipákarãi. Aaro Betuel meráshavo. Ãwẽ ochtxóro Naor, ãwẽ aĩ Milcaro ã paĩtxó, askámaĩnõ Naorro Abraãone take.

¹⁶ Rebecaro kanívena ichnámachta, venẽ merama. Askái oshõ vaná wakapasha tsaóanamã chomõ wakapasha weawani ãwẽ iinakaĩmaĩnõ,

¹⁷ Abraãone mee ima yorã atxõ erékaĩki meramavaikĩ aská akĩ, “mĩ chomõ wakapasha ama ea”, ãwẽ akátõsho,

¹⁸ “mã ase arí”, avaikĩ, ãwẽ iáa ivo tsaõpakesho amaki.

¹⁹ Anosho amavai vanai. “Mĩ camelorasĩ ato wakapasha weaoshonõ, ave anõ yaninínõvo”, akĩ.

²⁰ Aská avaikĩ erékawãki chomõ anõ inárasĩni wakapasha ati tsaóatõ manekevaíki, erésho vaná wakapasha ato weashonõ iinã iokaĩi.

²¹ Ãwẽ aská ashõa oĩinã, venẽ vanainámamẽkĩ matsíkashóse kanívenákase oĩki, “Yavepa anõkĩse ea imavarãrívi ẽ oĩa”, ikĩ chinãki.

²² Aská akĩ camelorasĩni wakapasha akĩ atõ mashtevaĩmaĩnõ, venẽ, ouro rechpi ãwẽ ewe tanati 6 grama, ouro meneshti ravévakĩ 120 grama aatii vivaikĩ aĩvo sawemakĩ.

²³ Aská avaikĩ, “mianã tsoã vakerkĩ? Mĩ papã shovonamã shanẽ wetsa yamará? Anosho evé shokoyarasĩnĩsho yamé ẽ tenenõ”, akĩ.

²⁴ Ãwẽ aská akatõsho, revíníki. “Earo Betuel vaketsikĩ. Ẽ ochtxóro Naor, ãwẽ aĩ Milcaro ẽ paĩtxó”, akĩ.

²⁵ Aská avaikĩ, “noke wasi aya, vaná wetsa aya, inapa pitirasĩ, anõ mã oshati ayasevi aká”, akĩ.

²⁶ Ãwẽ aská nĩkãinã, aaivo venẽ vetĩ ipásho Yavé ravii

²⁷ askái vanai. “Yavepá, miaro ẽ ivo Abraãone Yové, askásho mia roapa. Ẽ ivomẽ noípai nishõ, petxitima chinãsho vesoshoaya. Askámaĩnõ earo, Yavepa ea vesokõvarãki, Abrãone wetsamavorasĩni shavapa ea nokómaai”, ikí.

²⁸ Ã askámaĩnõ, kanívena oĩwani kayasho ãwẽ ewã wetsamavorasĩ katseki ato yoãshoi kakĩ.

²⁹ Aská, ãwẽ take Labão aská nĩkãvaí aa yora ẽ meranõ iinã vaná waka tsaóakiri kayai.

³⁰ Awesáma, ãwẽ takẽ rechpi, meneshti aká ãwẽ sawea oĩi, ãwẽ vana katseki ãwẽ yoã nĩkãi avainii, kaí vaná wakapasha kesó camelorasĩ tavá ãwẽ niá meratachísho

³¹ vanai. “Yavepa roapa ashõya ivó, neno niroa, kawã. Shanẽ wetsa mia kashma ashõai, mĩ anõ camelorasĩ shokõti askásevi aká”, akĩ.

³² Aská avaikĩ shovõ ewevaĩkĩ, ãwẽ camelorasĩ papíro keyoki potapakevaíki wasi inãi, vaná wetsa inapa piti ivo inãi avaikĩ, avé veayavorasĩro avé tatxó inõ iinã wakapasha weasho inãvo.

³³ Aská avaikĩ, piti ato ãwẽ setẽvarãshoatõsho Abraãone yonoa yora vanainái. “Matonĩpari ẽ vananõ, askávaíki txipo ẽ pinõ”, ãwẽ imaĩnõ, “ase irí, vana”, akĩ Labãone.

³⁴ Ãwẽ aská akatõsho, vanainái. “Earo Abraãone yonoa yora ea.

³⁵ Yavepa ẽ ivo Abraão roapa ashõkõvarãki, yora kakataiya shovimashõ nitxĩsho, prata, ouro, ãwẽ mee ima vene aĩvorasĩ, ãwẽ yoini inárasĩ txivorasĩ, txasho anikarasĩ, camelorasĩ, jumentorasĩ aatii inãmtá.

³⁶ Ãwẽ aĩ Sara aatiã yõshayamẽkĩ anõsho vake meramtá. Aaro ãwẽ papã mekẽya awerasĩ viakekatsaiya ivo vake.

³⁷ Ẽ ivõ ‘vana tavámatima ivo ea ashõtso’, iinã ea yonoki, ‘ẽ vake neno ẽ anõ vesokaĩa shavánamã cananeu shavorasĩ ea oĩmakãroa’, iinã.

³⁸ ‘Ẽ papã shavapa ẽ wetsamavorasĩ shokoanamãkase shavo merasho vishõta’,

³⁹ ea ãwẽ amaĩnõ, ẽ ivonĩ neskái ẽ vanavai. ‘Askámaĩnõ aĩvo evé okatsikíma ivororá, ẽ awesakatsai?’ iinã ẽ nĩkãtõsho,

⁴⁰ ‘roase, Yavepa ãwẽ vana anõ akí ẽ niá ivõ ãwẽ Yonoa Yové mia yonoshoatõsho ãatõ mia peshót avaĩsho mia ashõkatsa, ẽ papã wetsamavorasĩ shokoanamã shavo ẽ vake mĩ ewevarãshokatsai.

⁴¹ Askámaĩnõ kashõ ẽ wetsamavorasĩ mĩ yokáa atõ aví iyamamaĩnõrívi tavámatima ivo vana enéstso, aĩvo yamase mĩ oa roase ikatsai’, ivai.

⁴² Askákarãi oí rama vaná waka tsaóa kesó nii oshõ ẽ neskái. ‘Yavepá, ẽ ivo Abraãone Yovepá, ẽ chinãvarãa ivorasĩ roakakĩ ea ashõtso.

⁴³ Ea neno vaná waka tsaóa tavá ẽ niá, kanívenapa wakapasha vii omaĩnõ neskái ẽ vanakatsa. “Mĩ chomõ wakapasha ama ea”, akĩ ẽ yokáatõsho,

⁴⁴ “mã ase arí”, ivaikĩ, “mĩ camelorasĩ mia amaoshonõ”, ikí vanaya ivo ikatsai, ẽ ivõ vakẽ aĩ akatsai ivo mĩ merashoáro’, ẽ aka.

⁴⁵ Askái Yavénĩ vanai mashtékaĩkatsiinã ẽ oĩase Rebeca chomo iásho ipákarãi, vaná wakapasha weanõ iinã. Ãwẽ askámaĩnõ, ‘wakapasha ama ea’, iinã ẽ yokáatõsho,

⁴⁶ ãwẽ chomo iáa ivo tsaõpakevai vanai. ‘Naĩ, arí, mĩ camelorasĩ mia amaoshonõ’, ivaikĩ ẽ amaĩnõ, ẽ camelorasĩ ea amaoshoa.

⁴⁷ Ãwẽ aská amaĩnõ, ‘mĩ papanã tsoarkĩ’, iinã ẽ nĩkãatõsho ea revínii vanai. ‘Earo Betuel vaketsikĩ. Ẽ ochtxóro Naor, ãwẽ aĩ Milcaro ẽ paĩtxó’, ea ãwẽ amaĩnõ, rechpi meneshti ravévakĩ aká sawemavaikĩ

⁴⁸ maĩ vetĩ ipásho Yavé ẽ raviai. Yavé, ẽ ivõ ravia ivo Yové roapa. Ãatõ roaka akĩ yoivarãki ẽ ivõ takẽ aweshavo ea merashoa, ãwẽ vakẽ ave aĩ anõ iinã.

⁴⁹ Ramaro ea tanamana, ẽ ivo anõ noípakĩ vesoki, petxitima ivo chinã mã ashõkatsa? ‘Akáma’ mã imaĩnõro awesátiraki ẽ chinãnõ erí”, ato akĩ.

⁵⁰ Ato ãwẽ askámaĩnõ, Labãonĩsho Betuelpa revívo. “Neská ivorasĩro Yavepa yonorívi. Awesa ikíkata nõ vanaikĩ?

⁵¹ Rebeca neno rakáa ewevaĩta. Mĩ ivõ vakẽ ave oĩnõ, Yavepa chinã keská akĩ”, akávo.

⁵² Atõ askái vana nĩkãinã Abraãone nitxĩa ivo yora maĩ vetsek ipásho Yavé raviki.

⁵³ Anosho pratanĩ ouro awerasĩ, õporasĩ aká vivaikĩ Rebeca inãki, aská avaikĩ ãwẽ takenĩ ãwẽ ewa awe oraka ivorasĩ ato inãpakeóki.

⁵⁴ Ato aská avaí ãwẽ avé vovaiya venerasĩnĩsho, pivai, oshavai, shavá nakoi vesokaĩvai vanai. “Ẽ ivõ shavapa arimẽse ẽ iokaĩotanõ, ramaro”, ato ãwẽ akátõsho,

⁵⁵ ãwẽ take ãwẽ ewa aatii askái vanavo, “aaro ave 10 shavákase nokenĩ neno ave nioi inõ, askávai txipo votanoshõ”, akávo.

⁵⁶ Atõ aská akatõsho, “ea atxiketsomároa. Yavepa ẽ ivõ chinã ivo ea ashõai. Arimẽse ẽ ivõ shavapa ẽ iokaĩtanõ”, ãwẽ imaĩno,

⁵⁷ “Rebeca kenana, awesá ikatsíki nõ nĩkãnõ”, akávo.

⁵⁸ Anosho kanívena kenavaíki nĩkãóvo, “waa venenĩnã mĩ kakatsai”, atõ akátõsho, “ẽe, ẽ katãnõ”, ikĩ ato revíki.

⁵⁹ Anosho Rebeca, ãwẽ vesoya aĩvo, Abraão nitxĩa yora, ãwẽ avé vevaiyavorasĩ aatiinĩ ashõ yonovo.

⁶⁰ Askáki Rebeca vana roapa ivo netãi vanavo. “Ase také, minõsho itãtima revotikĩra, atonĩ ranokasmananãyavõ shavárasĩ ato ave viakenõvo”, akávo.

⁶¹ Aská nĩkãvaíki Rebeca ãwẽ shokõkena aĩvorasĩnĩsho atõ awerasĩ roa avaikĩ camelõ kãtxínivai, Abraão nitxĩa yora shotovaĩi voávo. Askáki aĩvo viwãti.

⁶² Askái aatiã Isaque Beer-Laai-Roinamã oĩtani oí Neguebenamã nii oí.

⁶³ Askáki yãtã, “iná shokoanamãsho oĩki nishõ ẽ chinã chinãvãnõ”, iinã kakĩ camelorasĩ veá meraki.

⁶⁴ Arishõ askásevi, okĩ Rebecã patáináki Isaque meraovaíki camelõsho nipávaíki,

⁶⁵ Abraão nitxĩa yora nĩkãki. “Waanã tsoa venerkĩ, noke chinãvarãyanã”, ãwẽ akátõsho, “ẽ ivotsikĩ”, ãwẽ akátõsho anoshose ãwẽ õpo vevãkatõ vepãtmeinái.

⁶⁶ Askái nokókaĩsho Abraão nitxĩatõ Isaque keyoki yoãshokĩ. “Ẽ askátavai”, iinã.

⁶⁷ Anosho Isaquẽ Rebeca ewevaĩki, ãwẽ ewa Sara anõ rakákaĩkaĩchna peshepa. Aská akĩ ninivarãsho anõ noíki, anõsho ãwẽ ewamẽ ã rona tãti akĩ.