Wenía 23 - Yové Koĩni Vana

Sara vopiti ivo yoã

¹ Askái aatiã Sara 127 vari tsaósho,

² Canaã mai naki Hebrom shavánamãsho yamati. Aaivo maĩ ane wetsaro Quiriate-Arba. Askái ãwẽ vopimaĩnõ, Abraão ãwẽ aĩmẽ ronai.

³ Askávai ãwẽ yora shaká enevaĩi kaí, heteu yorarasĩnĩ vananõ iinã tachikaĩsho,

⁴ “earo matopamarívi askámẽkĩ mai kashke wetsa ea inãna, anõ ẽ aĩ ẽ roa anõ”, ãwẽ imaĩnõ,

⁵ anõ eséyakĩ revívo.

⁶ “Ase neská nĩkãtso, miaro nõ oĩtana Yové Koĩni yorarvi. Askásho, arí, mĩ aĩ roa arí, roapanamã, ‘ano mĩ aĩ aská aroa’, mia noke akátĩpa”, akávo.

⁷ Atõ aská akatõsho, ato veyó maikiri vetĩ ipai kaí.

⁸ Askávai vanaói. “Ase, ‘mĩ aĩ neno roa arí’, iinãro Efrom Zoarnẽ vake ea mato nĩkãshoatĩpará?

⁹ Shasho pepi ãwẽnáse ẽ viãkãnõ. Naa Macpela mai kesoanamã ea ave inãnõ, anõ yora oneti. Aatishõ akĩkase ẽ kopímakatsai”, ikí vanai.

¹⁰ Ãwẽ askámaĩnõ, Efrom cidade kepoti orakama atonĩ tsaósho, vanainái, aaparasĩni nĩkãne.

¹¹ “Mã ase, aská akáma mia akátĩpa, nĩkãtso. Mai, shasho pepi aká mia ẽ inãnõ, ẽ avé shaváyavorasĩni nĩkãne, mĩ aĩ anõ onenoshõ”, akĩ.

¹² Ãwẽ aská nĩkãinã, atõ kãtxía veyó maikiri vetĩ ipaovaíki

¹³ Efrom tanamakĩ, ashkãsho atõ nĩkãne. “Askáma neskáinã ẽ ikí, eãro mia kopímashõ mia ẽ viãkãkatsikírvi. ‘Aatishõ’ ea arí, mia kopímanõ. Aská akĩ vivaikĩro anõ ẽ aĩ ẽ roa atãnõ”, akĩ.

¹⁴ Ãwẽ askámaĩnõ, Efromne revíki.

¹⁵ “Mã ase naatishõ nĩkãtso mairo, 400 prata, askámẽkĩ ichnárvi, roa atã mĩ aĩ”, akĩ.

¹⁶ Anosho Abraão, Efromnĩ askái vanã mekikinanãvaíki aatishõ akĩ ãwẽ ewe tanáshokĩ, ashkãsho atõ nĩkãne. Aaivo ewe tanáa askásevi, aatiã awe viananãa ivo keskái ãwẽ ikí.

¹⁷ Aská akĩ Efromne mai Macpelanamã ãwẽnakéi. Mai, shasho pepi, niirasĩ aká õsiki viãkãki, Manre mainamã orakama.

¹⁸ Askái heteu yorarasĩ ano cidade kepotinamã kãtxívarãsho atõ vana ashkãsho nĩkãvo.

¹⁹ Askáki Abraãone ãwẽ aĩ ano roa akĩ, Hebrom shavá orakama, Canaã mai naki.

²⁰ Askáti, heteu yorarasĩni mai, shasho pepi aká Abraãonakéi.