Wenía 22 - Yové Koĩni Vana

Yové Koini Abraão onãtati ivo yoã

¹ Askávai txipo Yové Koĩni Abraão onãtakatsiinã kenaki, “Abraãó”, ãwẽ akátõsho, “awerá? Neno ẽ niá”, akĩ revíki.

² Ãwẽ askámaĩnõ, “mĩ vake nané westíchta, mĩ anõ noípa ivo Moriá maikiri ewevaĩta. Ano mia ẽ yoikatsa ivo matopashõ ea maki ashõta”, akĩ.

³ Ãwẽ askávaitõsho, shavá oá merasho, anõ maki ati ivo karo tosha toshavaíki jumento papimavaí ãwẽ yonoa yora ravévakĩ, ãwẽ vake Isaque aatii voávo, Yové Koĩni yoivaikirí.

⁴ Askákaĩi kakĩ, 3 shavánamãsho orasho oĩtakĩ ãwẽ oĩa aaivo mató meraki.

⁵ Askáki anoshose ãwẽ yonoa yorarasĩ ato tanamakĩ. “Nenoshóse jumentonĩsho ea manátsoma, askámaĩnõ ea, naa verone akáro waa matopashõ Yové Koĩ nõ ravitáinã. Askátaníro nõ iovarãkatsa”, ato akĩ.

⁶ Askáki anõ maki ati karo ãwẽ vake iámai avaí aaro txii, senoti aká toĩnivai voávo. Askávaĩi atõ voánamãsho,

⁷ ãwẽ vakẽ, “papá”, ãwẽ amaĩnõ, “awerá”, akĩ revíki. “Naa txii, karo aya akámẽkĩ nõ maki akatsiki ivo txivõ vakero atorá?” ãwẽ imaĩnõ

⁸ ãwẽ papã revíki. “Yové Koĩni noke merashokatsai, yomé”, akĩ.

⁹ Askákõvaĩi voí Yové Koĩni ato yoivai ivo mató nokovaĩsho, ãwẽ papã anõ maki ati tapo avaikĩ, matxi karo potanivaíki ãwẽ vake neshavaíki tapo matxi rakãníki.

¹⁰ Aská avaikĩ senoti ninivarãvaíki ãwẽ vake ãwẽ yamamakatsímaĩnõ

¹¹ naĩsho Yavepa Yonoa Yovepa kenaníki. “Abraãó! Abraãó!” ãwẽ imaĩnõ, “awerá? Neno ẽ niá”, akĩ revíki.

¹² “Mĩ vake meskoroa, aská aroa. Ramaro onãtakĩ mia ẽ oĩai, Yové Koĩ rakéshoi mĩ niásho, mĩ vake westíchtamẽkĩ anõsho mia itãma ẽ oĩai”, akĩ.

¹³ Ãwẽ askámaĩnõ anosho oĩtakĩ ãwẽ oĩa, txivo vene võko nakosho ãwẽ mãshõne otékésho niá meraki. Askávaíki txivo atxivaíki ãwẽ vakẽ shanẽneshõ maki akĩ.

¹⁴ Askáki aaivo mató aneki, “Yavé Yiré” akĩ aneki. Aská akĩ ãwẽ aneti rama anõ anéi isa, “Aaivo matopashõ nõ anõ mãa Yavepa noke ashõkatsa”, imískavo.

¹⁵ Askávai naĩsho Yavepa Yonoa Yovepa Abraão kenanióki.

¹⁶ “Mĩ vake westíchtamẽsho ea mia akáma oĩinã, tavámatima ivo vana ea ẽ anemẽsho vanai.

¹⁷ Mia roapa ivorasĩ ashõkatsa. Mĩ revomaa yorarasĩ ato ẽ ãtsamakatsai, naĩ masoya ichi, waka kayã machi poto akátíi. Atonĩ ranokasmananãyavõ shavá ato viakekatsaivo.

¹⁸ Askái mĩ revokaĩamẽsho maitioi shokoa yorarasĩ vana roapa netãnákatsa, ẽ vana ea mĩ anõ akákiri chinãsho”, akĩ tanamakĩ.

¹⁹ Anosho Abraão arimẽse ãwẽ shokõkenavonamã itãi kaí Bersebanamã shokokei voávo. Askái ano inopai shokovo.

²⁰ Askái nishõ ãwẽ nĩkãa, ãwẽ take Naor, ãwẽ aĩ Milcamẽsho ãwẽ vakeya ikí nĩkãki.

²¹ Askái ãwẽ vake vevoké ivoro Uz, atxõyaro Buz, wetsaro Quemuel, Arãne papa.

²² Askámaĩnõ txipo meráyavoro Queséde, Hazo, Pildas, Jidlafe, Betuel aatíi.

²³ Betuel ivoro Rebeca meraya. Askásho naa 8 vakerasĩro, Naor, Abraãone takẽ Milcamẽsho merati.

²⁴ Askámaĩnõ Naorpa, ãwẽ rakãa aĩvo Reumámẽsho ãwẽ vake iáaro naatii, Teba, Gaã, Taás, Maaca aatíi.