Wenía 20 - Yové Koĩni Vana

Abraãone Gerar maĩ kakáya parãti ivo yoã

¹ Askái Abraão Manrenamãsho Canaã mai naki Neguebenamã kaí, shavá wetsa Cadesnĩ Sur rakáa tõovakĩ nii kaí. Ano nii aatishõkamase Gerar mainamã nioi kaí.

² Ano nishõ ãwẽ aĩ Sara yoãki “ẽ aweshavo”, ato amíska, askásho Abimelequẽ Gerar mainamã kakáyatõ, ato yonoki. “Sara neno ewevarãna, eã oĩnõ”, ato akĩ.

³ Aská anosho Abimelequẽ oshapakéki namáki ãwẽ oĩa, Yové Koĩni tachikarãsho, “aĩvo veneyamẽkĩ mĩ ewetana. Ramaro mia yamakatsa”, akĩ yoãshokĩ.

⁴ Ãwẽ askámaĩnõ Abimeleque avé meenanãmasho vanainái. “Yora Ivó, eamarívi, ashkã akĩse noke mĩ keyokatsa?

⁵ Ã vene ‘Sara ẽ aweshavo’, ikí vanai, ã aĩ askásevi vanaói avai. Ichná akĩ chinãki ẽ akámarívi”, akĩ revíki.

⁶ Ãwẽ askámaĩnõ, “aská akĩ mĩ chinã ẽ tanasai, ẽ vana mĩ tavámamísi iinã eãvisi mia ea meemáma.

⁷ Ramaro aĩvo ãwẽ vene arimẽse yonosho. Mia vopimísi iinã ãatõ ea tanamashõkatsa, aaro ẽ vana teki akaya yora. Ãwẽ aĩ mĩ yonoshoama ivoro aská, mĩ wetsamavorasĩnĩ mia vopikatsa”, akĩ Yové Koĩni.

⁸ Aská namátani vesosho, Abimelequẽ shavá nakoki ãwẽ yora eséyavorasĩ kãtxivarãsho ãwẽ namátana ivo ato ãwẽ yoãshoatõsho rakéi kavima ikívo.

⁹ Aská anosho Abimeleque, Abraão kenavaí avé vanai. “Awesainã ea mĩ aská avaira? Awesa ivo itimatõ mia ẽ ishõatõsho, ẽ shokõkenavonĩ ashõ ea mĩ ichná akára? Askátimatõ ea mĩ aka”, akĩ.

¹⁰ Anosho nĩkãnióki, “Awesakĩ chinãinã ea mĩ aská avaira”, akĩ?

¹¹ Ãwẽ aská akatõsho, “erí chinãki, ‘neno shokoyavõ Yové Koĩmẽ eséyama shokosho ẽ aĩmẽsho ea yamamísivo’, iinã ẽ ivairívi.

¹² Askámaĩnõ Sararo ẽ papakiri chinãsho ẽ evé meráshavo, askámẽkĩ nokẽ ewaro wetsavakĩakiri chinãsho ẽ ninivarãmtá.

¹³ Yové Koĩni ẽ papã shavapashõ ea yonokõmaĩnõ, Sara ẽ tanamavai. ‘Noípakĩ ea vesosho neská akĩ ea yoãtso shavátii iakekaĩki. “Ẽ aweshavo”, ea atso’, iinã ẽ yoãshovai”, akĩ.

¹⁴ Ãwẽ aská nĩkãvaíki, Abimelequẽ arimẽse Abraão ã aĩ eneshokĩ. Askávaíki ãwẽ txivorasĩ, txashorasĩ, ãwẽ mee imaa venerasĩ, aĩvorasĩ aká õsiki ravé inãki.

¹⁵ Aská avaikĩ Abraão tanamaóki. “Ea mai ayavere. Atonamã mĩ nikatsai mirí oĩtso”, akĩ.

¹⁶ Askávaíki Sara askásevi aoki, “mĩ take, 1000 kopímati shasho prata ẽ inãai, anõsho mia ẽ ewevaĩtávaikiri chinãsho kopímakĩ. Aská ivo kopímatimẽsho ‘aa ivaimarívirá’, iinã mia ave tananõvo”, akĩ.

¹⁷ Askávai txipo Abraãone Yové Koĩ ato tanamashõatõsho, Abimeleque roa akĩ. Ã aĩ, mainamã toĩnaa aĩvorasĩ askásevi akĩ ato roa aoki.

¹⁸ Awesáma, vevõro Saramẽsho, Yavepa aĩvorasĩ katsése revotĩpa akĩ ato shokõasho ã ikí.