Wenía 2 - Yové Koĩni Vana

¹ Aská akĩ naí shavá, mai shavá aká ãwẽ aweyakĩ shovimakĩ mashteki.

² Anosho 7 shavánamã teneki.

³ Aská ashõ aaivo shavánamãsevi “anõ eséyati”, ikĩ chinãsho vana roapa ivo netãsho eneki. Awesáma, naaivo shaváro katsése shovimakĩ mashtevai anõ ãwẽ teneti.

Yora askái shoviti ikĩ yoã

⁴ Naaivo yoã vanaro, wenía yoã, naí askái shoviti ikí, mai askái shoviti ikí aká ivo yoã. Aatiã, mai, naí aká shovimatiãro Yavé ivo Yovepa

⁵ oi imama, yora piti vanaya yama akátõsho, piti vaná yama, nii akárasĩ yama aká.

⁶ Askásho mai okeshose niskã tachiinainaki mai metxá apawa.

⁷ Askánamãsho Yavé ivo Yovepa, maĩsho vene shovimashõ wenímakĩ. Aská avaikĩ ãwẽ rekĩnamã veshõ akĩ chinã vimaki. Ãwẽ aská aká vene ãwẽ chinãyai weníi.

⁸ Askávai txipo wai “Eden” atõ aká ivo vari oákiri shovimashõ, vene ãwẽ wenímaa ivo anõ nitxĩki.

⁹ Nitxĩvaíki iwi õsi õsipakĩ shokõki, wetsarasĩro yoíkavo, wetsarasĩro piá ivorasĩ aká. Aaivo wai matxi, vimi ravévakĩ nakika shokõki, wetsaro awetima akaya vimi, vimi wetsaro, roapatõ yosĩyase, ichnárasĩni yosĩyase aká ivo.

¹⁰ Aaivo wai Edennamã anõ vanárasĩ vestẽa waka revo vosoa, aaivo enépakéro, waka 4 ashá asháa.

¹¹ Txitákairo waka ãwẽ ane Pisom, aaivoro Havilá mainamã tapia, machi siro ouroyãwa ivonamã.

¹² Aaivo mainamã mai siro ichnámavo, askánamã karovi pae keská, bdélio ivo aya, shasho ichnáma onix ivo aya aká.

¹³ Waka wetsaro Giom, aaivoro Cuxe mainamã tapia.

¹⁴ Askámaĩnõ, waka wetsa ivoro Tigre, aaivoro Assíria mainamã vari oátõ tapia. Askámaĩnõ waka wetsaro Eufrates aká.

¹⁵ Aská ashõ Yavé ivo Yovepa vene Eden wainamã vesomashõ nitxĩki, piti ave merámanõ iinã.

¹⁶ Askávai aa vene tanamakĩ. “Vimirasĩ katsése mĩ piá roase,

¹⁷ askámaĩnõ vimi, roapa ãwẽ yosĩyase, ichnárasĩ ãwẽ yosĩyase aká ivoro piroa. Awesáma, aaivo mĩ piáro, mia vopikatsa”, akĩ.

¹⁸ Askávai txipo, “vene arí niá anõmase ẽ oĩa, ãwẽ avé niti aa keská ivo ashõnõ”, ikí.

^19-20 Aská akĩ, katseki maĩ yoinavorasĩ, yoini peiyavorasĩ aká shovimashõ, ave ane netãpakenõ iinã Adão kawivarãshokĩ. Aská akĩ ãwẽ kawivarãshomaĩnõ, yoinikã anerasĩ netãpakéki, iná aká, yoini peiyavo, nĩi yoinavo aatíi. Askámẽkĩ, ãwẽ avé niti yama.

²¹ Askáinã, Yavé ivo Yovepa Adão oshá naíka imavaíki, oshai ãwẽ rakámaĩnõ, ãwẽ pichi wetsa tsekãkãvaíki namĩ vestoki.

²² Aská ashõ ãwẽ pichi wetsa ãwẽ tsekãkãa ivõ aĩvo shovimashõvaíki vene ewevaĩshoki.

²³ Aská oĩinã Adão vanai. “Naaro ẽ shaõsho wenía, ẽ namĩsho wenía aká. ‘Aĩvo’ akĩ anenõ. Awesáma, enõsho shoviasho ẽ ikí”, ikí.

²⁴ Askásho, vene, aĩyashõ ãwẽ papa, ãwẽ ewa aká enekésho ãwẽ aĩnĩ yora westíse keskámtsãwa.

²⁵ Askái vene ãwẽ aĩ aká, ravé txĩto, ravĩi tanaimai shokovo.