Wenía 19 - Yové Koĩni Vana

Sodomanĩ Gomorra keyóti ivo yoã

¹ Yãta vakíchivakĩmaĩnõ, yonótaya yové ravévakĩ, Abraão pokéshoyavorasĩ, Sodomanamã nokóvaĩvo. Aská oĩinã Abraãone epashko, Ló, ano ikoti veyó tsaósho ato meravaí, weniinávaí, atomẽ mekíkaĩi, kochikaĩi, maĩ vetsek ipásho

² atomẽ eséyakĩ vana ainakĩ. “Ẽ shovõ voãna. Anosho tatxó ivaí tenei yamévãvaí, shavá nakoirívi votãnoshõ”, ato ãwẽ akátõsho, “roase, neno ikotĩ wenẽneshõse nõ yamévãkatsa”, akávo.

³ Askáki Lópa akirishõka ato ewevaĩkatsiki oĩinã ãwẽ vana anõ avainii ãwẽ shovonamã voávo. Aská akĩ ato kawivaĩsho Lópa ato pitĩ yonoki. Aská avaikĩ pão fermento yama ivo “naí akí”, avaikĩ ato pimaki, aa pokeyavorasĩ.

⁴ Askái ano atõ oshavaĩkatsímaĩnõ, aaivo cidade shokoyavõ, venerasĩ, veronevorasĩ, sheniwetsarasĩ, aká ashkãsho shovo teavaĩvo.

⁵ Askáki Ló kenasho nĩkãvo, “ato voraía, yãtã venerasĩ neno mĩ shovonamã weiyavonã? Neno ikotĩ noke ato ewevarãsho! Ato nõ ichná anõ”, akávo.

⁶ Atõ askái vanamaĩnõ Ló ikotĩ kayakaĩsho kepovaĩvaí,

⁷ vanainái. “Evé shaváyaivorasĩní, chinã askátõ itsomároa.

⁸ Nĩkãna, ea vake aĩvake ravévakĩ venẽ merama ivo aya. Atovo mato yonoshonõ, mã chinãtõrvi atonĩ inosho. Askámaĩnõ naa venerasĩro meskotsomároa, ea atõ pokéshoi vemaĩnõ, ato ẽ vesorívi”, ato akĩ.

⁹ Atõ ãwẽ aská akatõsho, “miaro sherékawãta”, iinã oi shokonívo. “Naa yorã, nokepa yoramamẽkĩ, neno oshõ noke yonokatsiki. Ramaro mĩ shovõ oshaya yorarasĩ akátõchta noke mia akátĩpa, miaro ichná tavákepatõ mia nõ akatsai”, akávo. Askáki kepoti txevévaĩkatsiinã Ló shotõkévo.

¹⁰ Atõ aská amaĩnõse ano pokéi veayavorasĩni, Ló atxisho erékomavaikĩse shovo kepovo.

¹¹ Anosho ikotĩ shokoya veronevorasĩ, sheniwetsarasĩ aká ato keyoki vesho apáki. Atõ aská akatõsho, kepoti itimamavãvo.

¹² Askái anosho aa poketaiyavorasĩni Ló nĩkãvo. “Miapa yora wetsanã yamará nenonã? Mĩ vakerasĩ, mĩ vake rakãyavo venerasĩ, mĩ wetsamavorasĩ wetsa aká ato kawivaĩta.

¹³ Naaivo shavá nõ keyokatsiki. Yavepa atõ ichnávaĩa kaká nĩkãsho, ‘oĩvaíki ato keyotana’, noke amaĩnõ ato nõ chinãvarãvai”, akávo.

¹⁴ Aská nĩkãinã Ló ãwẽ vake rakãyavo venerasĩ ato tanamai kakĩ. “Shairó, rayávaĩtana, Yavepa naaivo cidade keyokatsiki”, ato ãwẽ akátõsho wesi ise ikiravã akávo.

¹⁵ Askái shavá naóvakĩmaĩnõ, yonótaya yovevõ Ló akirishõka, “shairó, mĩ aĩ, mĩ aĩvake ravévakĩ akáse ato ewevaĩta shairó, naaivo shavapashõ mato keyómísi”, akávo.

¹⁶ Anosho ãwẽ inomaĩnõ, Ló, ãwẽ aĩ, ãwẽ vakerasĩ aatiinĩ ashõ, mepákevai voshõ cidade orakamasho ato enevo, Yavepa Ló onísíse oĩinã.

¹⁷ Anosho, yonótaya yové wetsã Ló tanamakĩ. “Ramaro kayata. Mia yamamísi, txipokiri oĩroa, naaivo mató sapakatõ niakeroa, matopa katãtso. Mĩ askámaro mia vopikatsa”, akĩ.

¹⁸ Ãwẽ askámaĩnõ anõ eséyakĩ vana ainakĩ. “Ea aská akatĩpa.

¹⁹ Roakakĩ ea mĩ ashõai. Enõ noípakĩ vesoki ea mĩ shavá amai. Askámẽkĩ matopa ea kaatĩpá. Oĩvaĩi kaí, ichnák pakéi ea yamarívi.

²⁰ Waaka cidade ichtóchta rakánã mĩ oĩai? Aa orakama. Ari ẽ katãnõ. Mĩ oĩai, aatióchta ivonã? Anoro ea vopima ikatsaivere”, akĩ.

²¹ Aská nĩkãinã yonótaya yové vanai. “Roase mia anõ anõ askáro. Aaivo cidade ea keyoma ikatsai.

²² Ramaro rayákaĩta, ano mĩ nokóatishõki shavá wetsarasĩ ea keyotĩpá”, akĩ. (Anosho Lópa yoã ivo cidade ichtóchta oĩinã “Zoar”, akĩ anevo.)

²³ Askái Ló, shavá maiki pakémaĩnõ, Zoarnamã nokókaĩi.

²⁴ Anoshose Yavepa akĩvisi rateki naí shavapashõ txii shasho, “enxófre” aká para akĩ Sodomanĩ Gomorranamã.

²⁵ Anõsho ato keyoti, cidade ravévakĩ, mató sapakanamã shaváyaivorasĩ, niirasĩ aatíi.

²⁶ Askái kakĩ Lópa aĩni txipokiri patákesho ãwẽ oĩáse katxi vorókéi.

²⁷ Anosho aaivo shavapásevi, Abraão weníinavaí Yavénĩ ãwẽ vanavainamã chinãvaĩi kaí.

²⁸ Anosho Sodomanĩ Gomorra rakákiri mató sapaka keyoki oĩketakĩ ãwẽ oĩa, maitioi koĩ tachiináa, txii ee ikí pichtama oĩki.

²⁹ Askáti, aaivo cidaderasĩ Yové Koĩni ato keyosho, Abraãomẽsho, ãwẽ epashko ivoro ewesho pashamati.

Lópa aĩvakevõ atõ papa vake meramati ivo yoã

³⁰ Askásho txipo Ló, Zoar shavá rakéshoinã mató chinãvaĩi kaí, ãwẽ aĩvakevonĩ shasho pepi teró shokokei voávo.

³¹ Askáki shavá wetsã ãwẽ vake aĩvake vevoketõ, txipoke ivo aská akĩ vana akĩ, “nokẽ papa ma sheni wetsai, neno nokẽ shavapa vene wetsa yama, yora wetsa ikítõ noke ikítĩpá.

³² Rama nõ neská anõ. Vinho amaki nõ vetsamatimarã. Aská ashõ avé mĩtxiki vake nõ meramanõ”, akĩ.

³³ Atõ askái vana ivo yãtapakémaĩnõ atõ papa vinho amavaíki, ãwẽ meráshavo vevoke ivo avé oshai. Askámẽkĩ ã papa vetsai kavimasho tanama.

³⁴ Askávai shaváma vesokaĩki ãwẽ vevoke ivõ txipoke ivo yoãshokĩ. “Ea shaváma yamé papanĩ ẽ oshavai. Rama yamé vetsamaoskámarakĩ, mia avé oshaonoshõnã, ravé akĩ noke ãwẽ vake merashoatõsho ave revovaĩnõvo”, akĩ.

³⁵ Askáki yãta wetsã, atõ papa vinho amaovaíki, ãwẽ meráshavo txipoke ivo avé oshaói. Askámẽkĩ vetsai kavimasho tanaómasevi.

³⁶ Aská anosho ãwẽ aĩvake ravése toonívo, atõ papãse ato toomaa.

³⁷ Askásho vevoke ivonapari pakémaĩnõ, “Moabe”, akĩ aneki. Naaro Moabe yorarasĩ meraya rama.

³⁸ Txipokena ivo pakéomaĩnõ, “Ben-Ami”, akĩ aneki, amonita yorarasĩ meraya rama.