Wenía 18 - Yové Koĩni Vana

3 venerasĩni Abraão pokéshotivo ivo yoã

¹ Askávai txipo Yavepa Abraão meramatachíki, iwi carvalho Manrena ivonamã orakama ãwẽ nimaĩnõ. Askái vari isĩinámaĩnõ shanaka tanainã ãwẽ peshé ikoti veyó tsaókaĩi.

² Askái ano tsaósho patáináki ã oĩa, 3 yora oramachta shokoa meraki. Askái atõ shokoa merainã erékaĩi kaí ato veyó pakéi kashõ maĩ vetsek ipái kaí.

³ Askái westímẽse eséyakĩ vana ainakĩ. “Ase, ‘shavá ichnátõsho mĩ vesokaĩmatsẽrã’, iinã mia ẽ ravĩshoasmẽkĩ, ea manátso.

⁴ Nenosho tenetsoma, iwi tavá kãtxíshóse. Mato wakapasha ẽ yonoshóinã, mã anõ tatxó inõ.

⁵ Ea mã pokéshoi vemaĩnõ matomẽ mekíai ea. Mato pitichta pimanõ, anõ vestẽinavaí iovaĩtánosho”, iinã ato ãwẽ akátõsho revívo, “mã ase, noke ashõ askáro”, ikívo.

⁶ Askávaíki Abraãone erékaĩi kashõ ãwẽ peshepa ikosho ãwẽ aĩ Sara yonoki. “Trigo poto roapa ivo 10 kilos vivaikĩ, teyóvaíki, pão arí, rayá”, akĩ.

⁷ Askávai anoshose Abraão erékawãkíse txasho shokoanamã ãwẽ peshkó roapa ivo kavẽsho atxivaíki aa mee ishõya inãki, “rayá naí arí, ave pinõvo”, iinã.

⁸ Askái piti naíkaĩmaĩnõ, Abraãone “coalhada” atõ aká ivo, leite, nami naí ikitáya aatii veayavorasĩ setẽshokĩ ato pimaki. Aská akĩ atõ pimaĩnõ, ato vesoi nii, iwi tavá.

⁹ Anosho, “Abraãó, mĩ aĩ Saranã atorá?” akĩ nĩkãvotõsho, “peshepa rakáa”, ato akĩ.

¹⁰ Askámaĩnõ westíkase vanainái. “Waa vari wetsa oáyatõ mia ẽ pokéki oĩói omaĩnõ, naaivo oshenamãsevi mĩ aĩ Sara vakeyakatsai”, ãwẽ akátõsho Sarã ato petxirisho nishõ peshé ikoti veyósho nĩkãki.

¹¹ Aatiãro Abraão ma sheniya, Sara ma yõshaya, vakeyati taváyavo.

¹² Askáinã Sarã osã ikí chinãki. “Ea shavo yomemakaĩmaĩnõ, ẽ vene sheniwetsayashonã ea mekímatirá? Nokẽ metsá ma keyóya”, ikĩ chinãki.

¹³ Ãwẽ aská akĩ chinãmaĩnõ Yavepa Abraão nĩkãki. “Awesainã ãwẽ osãrakĩ, mĩ aĩninã? Awesainã ‘ea vakeyaotĩpá, ea ma yõsha mashtéya’, iinã ãwẽ ikírá?

¹⁴ Eanã ẽ akátĩpa ivorasĩ ayará? Mia ẽ tanáshoanamã ea neno iokarãmaĩnõ, Sara vakeyakatsaivere”, akĩ.

¹⁵ Ãwẽ aská nĩkãinã Sarã rakéinã parãki. “Awesa ea osã ikimakatá”, ãwẽ imaĩnõ, “Yoa iroa, mĩ osãaivere”, akĩ Yavepa.

¹⁶ Anosho, aa pokéi veayavorasĩ wenínivaĩi voshõ, Sodomakiri nõ oĩnõ iinã shokovaĩsho oĩvo. Askái Abraão kochikaĩsho ato enei kakĩ.

¹⁷ Askái ã kamaĩnõ, Yavepa arí chinãi vanai. “Ẽ akatsiki ivorasĩnã Abraãonã ẽ pãtemaspá?

¹⁸ Ãwẽ yora shoko wetsa mestẽkatõ papa ikatsai. Anõsho, maitioi shokoa yora wetsarasĩ vana roapa netãnákatsa.

¹⁹ Aaro kavẽnáya ivo yora. Ãwẽ vakerasĩ, ãwẽ revomarasĩ aká aská akĩ ato ave yononõ, ‘Yavé anõ atsoma chinã mekiyai shokotsoma’, iinã. Askái Abraão ẽ tanamayãtá ivo vana katsése ẽ ashõkatsa”, ikĩ chinãki.

²⁰ Aská avaikĩ Yavepa Abraão yoãshokĩ. “Sodomanĩ Gomorra yorarasĩ vana tavámai ichnápatõ ikí kakámtsãwa.

²¹ Ano ẽ oĩpakéi kakatsai, atõ yoã ẽ nĩkãvaĩvaĩa, ‘yoa vanará, anõserá’, iinã”, ikí.

²² Askávai anoshose pokéi veayavo ravévakĩ pashkávaĩi voávo Sodoma shavákirí, askámaĩnõ Yavéro anose Abraãonĩ niakéi.

²³ Askái Abraãone aa kesópáchta nii kashõ nĩkãki. “Awesára, yora chinã mekiyavo, ãwẽ ichnárasĩ aká õsikíse ato mĩ keyokatsa?

²⁴ Ano aaivo cidadenamã 50 chinã mekipa yora ayamaĩnõnã, atomẽ noísmẽinã ano shavapa shokoyavorasĩ katsése ato mĩ keyoskatsa, ato mĩ shokõskatsa?

²⁵ Õsikéki ato mia keyoma ikatsai taíse, katsékase mĩ vana tavámaipatsĩkĩ. Mia aská akátĩpa taíse. Miaro maitioi shokoyavo ato chinã meki ashõyarvi, Askáshovísi mekika akĩ ato mĩ chinãshoti”, akĩ.

²⁶ Ãwẽ askámaĩnõ Yavepa revínióki. “Sodomanamã 50 chinã mekipa yora ẽ meraa ivoro atomẽsho aaivo shavá ea keyoma ikatsai”, akĩ.

²⁷ Anosho Abraão nĩkãnióki. “Neskátõ mivé ea vana vanatĩpamẽkĩ ẽ vana isai, miaro Yové ivo, askámaĩnõ earo ichnárvi, michpo, mai poto aká keskárvi.

²⁸ Askámaĩnõ ano 45 yora aská ayamaĩnõ, naa 5 yorachtase pashkámẽkĩ shavátióse mĩ aoskatsa keyokinã?” ãwẽ imaĩnõ, Yavepa revíóki. “45 ato ẽ meraa ivoro ea ato keyoma ikatsai”, akĩ.

²⁹ Askámaĩnõ Abraão ioinaósi. “Askámaĩnõ 40 ayamaĩnõrora?” “40 ato ẽ meraa ivoro ea ato keyoma ikatsai”, akĩ.

³⁰ Askámaĩnõ Abraão ioinaósi. “Eki ichnákeroa Yavepá, mia ẽ nĩkãómaĩnõ. 30chtase ayamaĩnõrora?” ãwẽ akátõsho, “30 ato ẽ meraa ivoro ea ato keyoma ikatsai”, aoi.

³¹ Askámaĩnõ Abraão aonióski. “Nĩkãsmẽinã mia nĩkãoirívi. 20kase ayamaĩnõrora?” “20 ato ẽ meraa ivoro ea ato keyoma ikatsai”, akĩ.

³² Askámaĩnõ Abraãone anõkasho enevaĩkatsiinã vanaoníki. “Ichnákeroa Yavepá, naaro anõkasho enékaĩa ivo mia ẽ nĩkãrívi. Askámaĩnõ 10namãchtarorá?” ãwẽ aská akatõsho, “naatii 10 ato ẽ meraa ivoro, ea ato keyoma ikatsai”, akĩ.

³³ Askái Yavé Abraãonĩ vanai mashtékaĩvaí ãwẽ kamaĩnõ, Abraãoro arimẽse ã shavapa iokarãói.