Wenía 17 - Yové Koĩni Vana

Kayã neea tanáti ivo yoã

¹ Askái Abrão, 99 varinamãsho, Yavepa meramatachiósho aská akĩ tanamakĩ. “Earo Yové Weeya Ivo. Ẽ vana anõ ashõ, chinã mekiyai nitso.

² Neská tanáti tavámakĩnanãimai nõ shokonõ. Mĩ revomaa yorarasĩ westíma ẽ mia ashõkatsa”, akĩ.

³ Anosho, Abrão maĩ vetsek ipámaĩnõ, Yové Koĩ askái vanai.

⁴ “Neská tanáti tavámakĩnanãimai nõ shokonõ. Minõsho yora shoko wetsa, yora shoko wetsa, yora shoko wetsa aká ipákatsavo.

⁵ Mĩ ane askásevi ikatsai, ‘Abrão’ ivo eneki, ‘Abraão’ ikatsai mĩ anõ kenáa. Awesáma, yora shoko wetsarasĩni papa mia ẽ shovimai iinã mia ẽ aká.

⁶ Minõsho yora ãtsai, kakáyarasĩ shovii akatsai. Mĩ revomarasĩro yora shoko wetsa ikatsai.

⁷ Askatase naa tanáti tavámakĩnanãimai nõ shokonõ, mia, mĩ revomarasĩ akánĩ. Neská ivo vana mato ẽ ashõa. Ea Yové mináse, mĩ revomarasĩnáse aká ikatsai.

⁸ Askávaíse rama mĩ anõ niá mai, Canaã, miapámavorasĩ nakosho mĩ niá ivo mairo mia, mĩ revomaa yorarasĩ aká mato ẽ inãkatsa. Atonase ikatsai, askámaĩnõ, earo atõ Yové ikatsaivere.

⁹ Askámaĩnõ miaro neskátso. Naaivo tanátinĩ ikí nitso, mĩ revomarasĩnĩsho.

¹⁰ Aaivokiri chinãsho, neská atsoma, mia, mĩ revomarasĩ aká. Mato venerasĩ katsése mã ina repã retás itivere.

¹¹ Anõsho aaivo tanáti nõ chinãnanãkatsa.

¹² Nenosho ori mã revovaĩarasĩro matõ vake venevakerasĩ pakémaĩnõ, 8 shavánamã retás atsoma. Yora wetsa kopímashõ viyãtáyavo, matopáma yorarasĩ aká, askásevi aotsoma.

¹³ Yora westíchta tõo akĩma, katsése retás itsoma. Matõ kayã neea ivoro anõsho tanáti nõ chinãti.

¹⁴ Yora wetsa retás ikíma ivoro mato nakosho shaváyatĩpá, kayãkõtsoma. Awesáma, aaivo tanáti ãwẽ anõ eseimasho ã ikí”, akĩ.

¹⁵ Askái anosho Yové Koĩni Abraão tanamaóki. “Rama nenosho mĩ aĩ ‘Sarai’, ikaikainamẽkĩ, eneki anõ kenaóroa. Rama anekiro ‘Sara’, atso.

¹⁶ Eã roapa ivo ẽ ashõkatsa, askávaíse aa mĩ aĩmẽsho venevake mia ẽ inãkatsa. Mia parãma, roapa ivo ẽ ashõkatsa. Aamẽsho, yora shoko wetsa, kakáya mestẽka aká shoviókatsavo”, akĩ.

¹⁷ Abraão anosho maĩ vetsek ipásho arí chinã oke chinãsho osãki. “Yora vari 100 ayanamãshonã, vakenã meratirá? Saranã ãwẽ vari 90 aya tsaóshonã ãwẽ vakeyatirá”, ikĩ chinãki.

¹⁸ Anosho Yové Koĩ aská akĩ vana akĩ. “Ase, Ismael ivõ mia ẽ inãkatsiki ivo ave ivokénõ”, akĩ.

¹⁹ Ãwẽ askámaĩnõ, “askáma, mĩ aĩ Saramẽsho, vake merasho ãwẽ pakémaĩnõ Isaque akĩ mĩ anekatsa. Aaivo tanáti tavámakĩnanãimai avé nõ shokokatsa, aa, ãwẽ revomarasĩ akánĩ.

²⁰ Askámaĩnõ, Ismaelro, roapa ivo ẽ ashõókatsa, ea mĩ yokáa keská akĩ. Aamẽsho, ãwẽ revomaa westíma ikatsai, yora shoko wetsa shoviókatsa aká. Askávaíse ãwẽ vakerasĩro 12 kakáyavo ikatsai.

²¹ Askámaĩnõ aaivo tanátiro ea Ismael ashõma ikatsai, Isaque ivorvi ẽ ashõkatsa. Aaro Saramẽsho waa vari oáyatõ oshe neskásevimaĩnõ pakékatsa”, akĩ.

²² Askái Yové Koĩ Abraãonĩ vanai mashtékaĩvaí, weníkaĩi.

²³ Anosho Abraãone aaivo shavapase Yové Koĩni yonoatõ ashõki, ãwẽ vake Ismael retás avaikĩ, venerasĩ katsése, avé shaváyaivorasĩ, ãwẽ kopímashõ viá ivorasĩ aká ato keyoki retás apáki.

²⁴ Askái aatiã Abraão, 99 varinamãsho arí retás iti.

²⁵ Ãwẽ vake Ismael ivoro 13 vari aya.

²⁶ Aaivo shavapa, ãwẽ vakenĩ retás ikí.

²⁷ Askái tsasiyarasĩ, vakerasĩ, ãwẽ shavánamãsho pakéya ivorasĩ, ãwẽ kopímashõ viá ivorasĩ aká ashkã Abraãonĩ retás itivo.