Wenía 16 - Yové Koĩni Vana

Ismael vaketi ivo yoã

¹ Abrão ãwẽ aĩ Saraimẽsho vakema niá. Ãwẽ aĩni mee ima aĩvoro, Hagar, Egito shavo.

² Askáki shavá wetsã Saraĩ ã vene tanamakĩ. “Yavepa vake noke inãmaka, askásho ẽ mee ima aĩvo oĩtso, anõshoro taíse vake mĩ meramaĩnõ, enákékatsa”, akĩ. Ãwẽ aská akatõsho, ãwẽ aĩni vana anõ akĩ.

³ Aská akĩ ãwẽ mee ima aĩvo, ã vene eneshokĩ. Aatiã ã vene Canaã maĩ 10 vari tavái nii.

⁴ Askái ã vene Hagarnĩ ãwẽ meenanãase, tooinái. Ãwẽ tooa tanainã, aa toĩya ichnakéki.

⁵ Askámaĩnõ Saraĩ ã vene aská akĩ. “Mĩ chinãneshõ Hagarpa ea ranokasmakésai. Eãvisi mia ẽ eneshochĩamẽkĩ, tooináki ea aská aka. Yavepa noke ave oĩnõ, tsoaraki kanéya, ea taíse, mia taíse”, akĩ.

⁶ Ãwẽ askámaĩnõ ã venero, “roase, aa yonoya miarvi, mĩ awesakatsíki mirí chinãtso”, akĩ. Anosho Saraĩ ã mee ima ivo roa atãtãmatõsho kayai.

⁷ Askái ãwẽ kamaĩnõ Yavepa Yonoa Yovepa askata wenẽ, Sur vai kesó vaná wakanamãsho meramashõ

⁸ nĩkãki. “Hagarpá, Saraĩ mee ima ivó, atonamãsho oshõ, awetokiri mĩ kaarkĩ?” ãwẽ imaĩno, “ea toĩya ẽ kayashovarãai”, akĩ.

⁹ Ãwẽ aská nĩkãinã, “iokaĩta, arimẽse mia toĩyanamã. Mia ãwẽ yonoarasĩ katsése ashõtso, ãwẽ vana tavámaóroa”, akĩ.

¹⁰ Askái vanaóki. “Minõsho revokaĩyarasĩro eã ato ẽ ãtsa akatõsho, yorã ato tanátĩpa ikatsai.

¹¹ Naa mĩ too nanéa venevake pakékatsavere. ‘Ismael’ akĩ anetso. Awesáma, onís awei mĩ txakar imaĩnõ Yavepa mĩ oi nĩkãyasho ikí.

¹² Askái naaivo vake yoini rawema keská ivo ikatsai. Nerishõ atonĩ ãwẽ ichnánanãmaĩnõ, orishõ atovõ ichnáókatsavo. Arí ãwẽ wetsamavorasĩnĩ roaka ikinãnãiamai nikatsai”, akĩ Yavepa.

¹³ Askámaĩnõ Hagarpa Yavé ane wetsã aneóki. “Miaro katsése oĩya ivo Yové”, akĩ. Askái, “ii anõserá, ãatõ ea oĩvaĩvaĩa keskásevi akĩ eã ẽ oĩóaisevi”, akĩ.

¹⁴ Askásho aaivo vaná waka Cadesnĩ Berede tõovakĩ tsaóa ivo anémtaro “Beer-Laai-Roi”, akĩ anemtá.

¹⁵ Askávai txipo, Abrãone Hagarmẽsho venevake merasho, “Ismael”, akĩ aneki.

¹⁶ Aatiã Abrão 86 vari aya.