Wenía 15 - Yové Koĩni Vana

Yavepa vana tekísma ivo Abrão eneshoti ivo yoã

¹ Askávai shavá wetsã Abrãone namáki oĩatõ akĩ ãwẽ oĩa, Yavepa tachikarãsho vana akĩ. “Rakéroa, eã vitxi toĩa keská akĩ rakéka ivorasĩ mia ẽ teashokatsai, roapa ivorasĩ mia ẽ ashõkatsa”, akĩ tanamakĩ.

² Ãwẽ askái vanamaĩnõ, “Yavepá, aská akĩ awe roapa ea mĩ inãkatsikimẽkĩ ea vake yamarvikatá. Ea vake yamasho, ẽ mekẽya awerasĩro, ea mee ishõya, Eliézer, Damasco yorã ivokekatsa.

³ Ea vake mĩ inãpaitsĩkĩ. Askásho ẽ mee ima ivõse ẽ mekẽya awe vikatsai”, akĩ.

⁴ Ãwẽ askámaĩnõ Yavé askái vanainaói. “Askáma, mĩ vakesekatá mĩ mekẽya awe ivokekatsaiyanã, mia mee ishõya Eliézer ivomarívi”, akĩ.

⁵ Aská avaikĩ Abrão ikotĩ ewevaĩsho tanamaóki. “Ramaro naí shavári patáinásho ichi awetii naĩ masoraki tanáta, mĩ keyoki tanátiraki oĩ. Waa ichi masoatii ikatsai ato mĩ revomarasĩ”, akĩ.

⁶ Askái Abrãone Yavé anõ akátõsho, yora chinã mekika oĩki.

⁷ Askái txipo vanaói. “Earo Yavévere. Ur, caldeu yorarasĩni shavánamãsho, mia neno ẽ ewevarãmtá, ‘mai ivokétso’, iinã”, akĩ.

⁸ Ãwẽ askái vanamaĩnõ, revíóki. “Yavepá miaro mestẽpá, mai ivokéki aweshõ ẽ tanakatsa”, ãwẽ imaĩnõ,

⁹ “neskátõsho mĩ tanakatsa, txasho aĩ, cabra aĩ, txivo vene aatii ea kawivarãshotso, atõ vari katsé 3 tanátimamẽse. Askávaíki noma, oshko aká vivarãótso”, akĩ.

¹⁰ Ãwẽ askámaĩnõ yoinavorasĩ kawivarãsho, naki txari apásho masõvakĩvarãki. Askámaĩnõ yoini peiyavorasĩro aská akĩ naki txari apáma.

¹¹ Anosho shete tachivarãa oĩinã, ato posha poshaki.

¹² Askávai yãtakawãmaĩnõ, oshá ranóimaki namáki ã oĩa vakíchi tsaopakéa oĩinã rakéi kavima.

¹³ Askámaĩnõ Yové Koĩni aská akĩ. “Anõpakĩ ea onãtatso, minõsho revovaĩyavorasĩro, yora wetsã mainamã shokoi vokatsaivo. Askái ano atõ shokomaĩnõ ato ati akĩ onís awemakĩ 400 vari tavámaki shokõkatsavo.

¹⁴ Mĩ revomaa yorarasĩ atõ askámaĩnõ aaivo yorarasĩ eãse ato ẽ yostakatsa. Askámaĩnõ minárasĩro awe roapa ivorasĩ aya vekatsaivo.

¹⁵ Askámaĩnõ miaro sheniwetsa mashtésho raké oĩtaníma mia roakitákatsa, mĩ papavonĩ.

¹⁶ Askái aaivo yora wetsarasĩni maĩ shokosho, atõ shokovõ shokórasĩ arimẽse iovarãókatsavo. Awesáma, amorreu yorarasĩ, naa mai mia ẽ inãkatsa ivo naki shokosho, ichnái mashtémasho ã ikí. Aatiã atõ ichnái mashtémaĩnõrívi, minárasĩ iovarãkatsavo”, akĩ.

¹⁷ Askái yãta vakíchikawãmaĩnõ, Abrãone ano nishõ ãwẽ oĩa yoá mashkõsho koĩ tokóinái. Oĩtakĩse ã oĩase amo shekó ketĩya tachivarãi. Askávai yoini tosha masovakĩanamã vevavaĩi vowãvo.

¹⁸ Askái anosho Yavepa vana tekísma ivo Abrão eneshokĩ. “Naa mai, Egito mainamãsho kesowani kaí Eufrates wakanamã kesoketaná masoa ivo,

¹⁹ anõ queneurasĩ, quenezeurasĩ, cadmoneurasĩ,

²⁰ heteurasĩ, ferizeurasĩ, refainrasĩ

²¹ amorreurasĩ, cananeurasĩ, girgaseurasĩ, jebuseurasĩ aatii anõ shokoa ivo mai mĩ revomarasĩ ato ẽ ivomakatsai”, akĩ.