Wenía 14 - Yové Koĩni Vana

Abrãone ãwẽ epashko shavá amati ivo yoã

¹ Aatiã shavapa Anrafelro Sinar shavapa kakáya, Arioquero Elasar shavapa kakáya, Quedorlaomer ivoro Elão shavapa kakáya, Tidal ivoro Goim shavapa kakáya aká.

² Kakáyarasĩ aatiisho, Bera, Sodoma shavapa kakáya, Birsa, Gomorra shavapa kakáya, Sinabe, Admá shavapa kakáya, Semeber, Zeboim shavapa kakáya, Belã shavapa kakáya akárasĩ atonĩ pakã ikinanãvo.

³ 5 kakáya ivorasĩ mató sapaka Sidim atõ akánamã, Katxi Iã kesó ashkã kãtxívaĩvo.

⁴ Askái kakáya Quedorlaomer 12 vari pakã raket ashõ, “noke kopímakõvaĩtsoma”, ikĩ ato ãwẽ shokõatõsho, 13 vari tavákeanamãsho nerishõ ato kopiki ichnákeóvo.

⁵ Askái 14 varinamã, kakáya Quedorlaomerni ãwẽ avé pakã takéarasĩnĩ nerishõ Refain yorarasĩ Asterote-Carnaimnamã keyovo. Aská avaikĩ Zuzin yorarasĩ Hãnamã aovo, Emin yorarasĩro Savé-Quiriataimnamã askásevi akávo.

⁶ Aská avaikĩ Horeu yorarasĩ keyoóvo. Atõ mainamãro Seir matórasĩnamãsho kaí El-Parãnamã kesoketaná, askata wenẽ orakama.

⁷ Askátani vesokevai veí, shavá Cadesnamã vevotiã, Mispate akĩ atõ anepaóanamã, amalequitanĩ amorreurasĩ Hazazon-Tamarnamã atõ shokomaĩnõ pakã ashõ mai ato viãkéki.

⁸ Askámaĩnõ kakáyavorasĩ Sodoma, Gomorra, Admá, Zeboim, Bela aatii õsíkesho pakayai voávo, Sidim mató sapakanamã.

⁹ Ano Elão shavapa kakáya, Goim shavapa kakáya, Sinar shavapa kakáya, Elasar shavapa kakáya naatiinĩ pakã ikinanãvo, wetsarasĩro 4 kakáya, wetsarasĩro 5 kakáya aká.

¹⁰ Ano mató sapaka Sidim atõ akánamã, pae shãtó ranóma. Askái atonĩ pakã ikinanãvaí Sodomanĩ Gomorra yorarasĩ atõ poshókatsikimẽkĩ ravé aaivo shãtó naki para ivaĩvo, ravéro mató keyáka matxi poshóvo.

¹¹ Atõ askámaĩnõ 4 kakáya ivorasĩni Sodomanĩ, Gomorra yorarasĩ atõ awe roapa, atõ piti aká viãkãvo.

¹² Viãkãvaíki, Abrãone epashko Sodomanamã niá ivo, aa, ãwẽ awe roapa ivorasĩ aká atxisho vivaĩóvo.

¹³ Askámaĩnõ yora wetsa arí westípakekeyatõ tachikaĩsho Abrão, hebreu yora, katseki yoãshokĩ. Aatiã ã niáro iwi carvalho, Manre, amorreu yoraná ivo orakama niá. Askái Manre, ãwẽ take Escol, Aner aatíiro Abrão avé takéarasĩ.

¹⁴ Askái ãwẽ epashko atxisho vivaĩvaivo ikí nĩkãinã, 318 yora pakayai tsasiyavo ato kawivaĩki. Aaivo yorarasĩro ano shavapashõ vake kaniavorasĩ. Askáki atonĩsho, kakáya 4 txivãvaĩi voí Dãnamãsho nokovo.

¹⁵ Askáki ãwẽ yorarasĩ ravé akĩ oshkevakĩsho, yamé ato pakã akávo. Askái, 4 kakáya atõ shokõkenavonĩ ashkã poshómaĩnõ, Hobá shavákiri Damasconamãsho kaí, mekiri paróri ato txivãvaĩsho, ãatõse ato akĩ.

¹⁶ Anosho keyoki arimẽse ato kawivarãóki, ã epashkó, aĩvorasĩ, yora viatávai ivorasĩ, awe roaparasĩ aatíi.

¹⁷ Askái, Abrão, Quedorlaomer, kakáyavo wetsarasĩ aká ato paketani oshõ, Sodoma kakáya Savé mató sapaka, “Kakáyatõ Mató”, atõ akánamãsho veyánanãvo.

¹⁸ Askámaĩnõ Melquisedeque, Salem maĩ kakáyatõ kakĩ, pãonĩ vinho Abrão vishõvaĩki. Aaivo yoraro Matxi Niaya Yové vevoshoaya yora.

¹⁹ Askáki vana roapa ivõ Abrão netãi vanai. “Matxi Niaya Yové naí, mai aká shovimaiya ivõ Abrão roapa ivo ave ashõnõ.

²⁰ Askái mĩ ranokasmaya ivorasĩ mia yomẽ ashõvaiya, Matxi Niaya Yovéro roapa”, akĩ Melquisedequẽ. Ãwẽ askámaĩnõ, Abrãone ãwẽ awe vivarãa ivo, 10tíi pashka pashkavaíki westíkase Melquisedeque inãki.

²¹ Askámaĩnõ Sodoma kakáyatõ Abrão vana aoki. “Yora atxívai ivorasĩro ea ato enesho, askámaĩnõ, awe mĩ vitãvai ivorasĩro miãse vitso”, akĩ.

²² Ãwẽ askámaĩnõ, “Ea aská akatĩpa. Yavé, Matxi Niaya Yové naí, mai aká shovimaiyamẽsho tekítĩpa vana mia ẽ ashõai.

²³ Askáma, awe westíchta, mayáchtase, taríti patichta askárasĩchta ea mia viãkekatsikíma. ‘Abrão enõsho aweyai kakáya mestẽkai shovisho niá’, ea mĩ amísi.

²⁴ Earo viáma askámẽkĩ ẽ shokõkenavo atõ pivai ivoro roase, askávaíse evé votãvai ivo yorarasĩ Aner, Escol, Manre aatíishoro ato mĩ inãkatsiki awe ave vinõvo”, akĩ Abrãone.