Wenía 13 - Yové Koĩni Vana

Abrão ãwẽ epashko Lónĩ pashkánanãti ivo yoã

¹ Askái ano Egitonamãsho Abrão ãwẽ aĩ, ãwẽ epashko Ló aatíi, atõ awe roa avaí, arimẽse Neguebekiri iovaĩóvo.

² Abrãoro kakáya mestẽkasho kopimatiyãwaka ivo yora. Iná, ouro, prata akárasĩ aya.

³ Askásho ano Neguebenamãsho, Betelkiri kaí, Betelnĩ Ai tõovakĩ nokókaĩi, ãwẽ peshé avawãtachĩanamã.

⁴ Ano nokókaĩsho anõ maki ati tapo ãwẽ achĩanamãshósevi Yavé ravióki.

⁵ Askái ãwẽ epashko, avé kachĩa ivo ãwẽ inárasĩ, peshérasĩ aatii arí ayasevi.

⁶ Ano ravé atõ shokomẽkĩ wasĩ mashkávo, atõ inárasĩ westímashõ.

⁷ Aská aatiã cananeu yorarasĩ, ferezeu yorarasĩ aatii ano aaivo mai naki shokoóvo. Askáinã anosho Abrãonĩ ãwẽ epashkopa iná vesoyavorasĩ arímamẽ vatxinanãvo.

⁸ Askáki shavá wetsã Abrãone ãwẽ epashko tanamakĩ. “Nokero mĩ wetsamakoĩmẽkĩ, nokẽ inárasĩ vesoyavo arímamẽ atõ vatxinanãa roakamáse.

⁹ Nõ norí pashkávakĩnõ. Atokiri mĩ roa aka? ‘Ea mechmiri ẽ katãnõ’, mĩ imaĩnõro, ea mekiri ẽ kakatsai. Askámaĩnõ, ‘ea mekiri ẽ katãnõ’, mĩ imaĩnõro, ea mechmiri ẽ kakatsai”, akĩ.

¹⁰ Ãwẽ askámaĩnõ ã epashkopa patákaĩsho ã oĩa, Jordão waka kesó itãi, mató sapaka kaí Zoar shavánamã kesoa oĩki. Ano mai roaka, teã kesó, Yavepa wai ayãta keská, Egito mai keská aká. Aatiã Sodomanĩ Gomorra shavá ayase, Yavepa ato keyoti vevo.

¹¹ Askái Jordão maikiri kavẽvaí vari oátõ kaí. Anosho oshkévakĩtivo.

¹² Abrãoro Canaã mainamãse niakéi, askámaĩnõ ãwẽ epashkóro Sodoma oramachta, cidade nakosho rakáa, mató sapakanamã niakéi.

¹³ Aská Sodoma yorarasĩro askata ichnárasĩrvi, Yavepa vana tavámai isĩpatõ ikí shokovo.

¹⁴ Askásho ãwẽ epashko arí pashkákaĩvaitxinĩ, Yavepa Abrão tanamakĩ. “Ano shaváyashõ naí paróri, naí paró wetsã, vari oátõ, vari kaatõ oĩi, atso.

¹⁵ Mai naa rakáa mĩ oĩa ivo, mia, mĩ revomarasĩ aká keyoki mato ẽ inãkatsa, matonase ikatsai.

¹⁶ Aská akĩ atovoro mai pototíi, tanátĩpa ikatsai.

¹⁷ Askái ramaro weníinavai kashõ, naaivo mai ãwẽ kesoketanatióki oĩkéta, vari oátõ, vari kaatõ, naí paróri, naí paró wetsã, akánamã oĩketátso”, akĩ.

¹⁸ Aská nĩkãinã ãwẽ peshé txoyo avaí, Hebrom shavá orakama, iwi “carvalho” atõ aká ivorasĩ shokoanamã niakéi kaí. Aaivo iwiro Manre yoraná. Askái anosho anõ maki ati tapo Yavéravĩki ashõóki.