Wenía 12 - Yové Koĩni Vana

Yavepa Abrão yonoti ivo yoã

¹ Askáki txipo Yavepa Abrão tanamakĩ. “Mĩ mai, mĩ wetsamavorasĩ, mĩ papa aká ato enevaĩi katã. Mĩ anõ nikatsai ivo mai mia ẽ yoikatsa.

² Minõsho yora shoko wetsa ẽ revomakatsai. Roapa ivo mia ẽ ashõkatsa. Yora kakataiyakĩ mia ẽ shovimakatsai. Roapa ivo mia ẽ ashõatõsho yora wetsarasĩ askásevi netãnákatsa.

³ Yora ãwẽ vana roapatõ mia netãya ivoro, eã ato ẽ askásevi aokatsa. Askámaĩnõ yora mia veí vana netãya ivoro eã ẽ ato askásevi aokatsa. Maitio yorarasĩ askásevi, minõsho vana roapa netãnaókatsa”, akĩ.

⁴ Askái Yavepa yonoatõse ikí, Harã mai enevaĩi kaí. Askái ãwẽ kamaĩnõ, Ló avé kaí. Aatiã Abrão 75 vari aya.

⁵ Askái kakĩ, ãwẽ aĩ Sarai ewei, ãwẽ epashko Ló ewei, Harãnamãsho ãwẽ viá ivo awerasĩ keyoki vii, ãwẽ shokõkenavo akárasĩ ato kawivaĩi, Canaã mai chinãvaĩi voí ano nokói voávo.

⁶ Voí, aaivo mai kashke naki Siquémnamã nokóvo, iwi carvalho, Moréna ivo kesó shokokévo. Aatiã aaivo mainamã Cananeu yorarasĩ shokopaóa.

⁷ Askái txipo Yavepa Abrão meramatachísho tanamakĩ. “Mĩ revomaa yorarasĩ, naaivo mai ato ẽ inãkatsavere”, akĩ. Aská akĩ meramatachiatõsho, anosho anõ maki ati tapo akĩ.

⁸ Askávai anosho vari oátõ iokaĩi kashõ, mai matóyãwanamã peshé akĩ. Ano ãwẽ peshé akáro Betel, Ai aká tõovakĩ rakáa. Betel ivoro vari kaatõ, Airo vari oátõ aká. Anosho anõ maki ati tapo Yavéravĩki avaikĩ, ravióki.

⁹ Askávai txipo iokaĩki, Neguebekirí.

Abrãone Egito maĩ kakáya parãti ivo yoã

¹⁰ Aatiã ano Canaã mainamã piti makiatõsho pikatsikivo oĩinã, Abrão Egito maĩ nii nii ikí kaí.

¹¹ Askái kakĩ, Egito mai omakaĩki ãwẽ aĩ Sarai vana akĩ. “Oĩ, mianã aĩvo ichnámachta ivo.

¹² Egito yorarasĩni mia oĩvaíki, ‘waanã ãwẽ aĩmarakĩ’, iinã minõsho ea yamamavaikĩ miase tsaõkemísivo.

¹³ Askáinãro, ‘ẽ aweshavo’, itso, minõsho yamamakĩma roaka akĩ ea ave vesonõvo”, akĩ.

¹⁴ Askávai Egitonamã atõ nokóvaĩmaĩnõ ãwẽ aĩ “shavo yoí roakarkĩ”, ikĩ oĩvo.

¹⁵ Askáki Egito maĩ kakáyatõ mee ima yora wetsã “shavo roapa”, iinã Faraó yoãshotãi oshõ, ãwẽ shovonamã ewevaĩshokĩ.

¹⁶ Aská avaikĩ Saraimẽsho Abrão roaka akĩ vesosho, txivorasĩ, txasho anikarasĩ, jumento vene, ãwẽ aĩ, camelo vene, ãwẽ aĩ, ãwẽ mee imati venerasĩ aĩvorasĩ aká inãki.

¹⁷ Askánamãsho Saraimẽsho Yavepa kakáya, ãwẽ shokõkenavo aká isĩ ichnátõ ato imaki.

¹⁸ Askámaĩnõ kakáyatõ Abrão kenasho nĩkãki. “Awesainã ea mĩ neská akára? Mĩ aĩmẽkĩ awesainã ea mĩ pãtevairá?

¹⁹ Awesainã ‘ẽ aweshavorvi’ mĩ ivaira, mĩ aská nĩkãinã ẽ aĩ avairívi. Naĩ, ewevaĩta, votãna”, akĩ.

²⁰ Askáki Faraopa, ãwẽ shokõkenavo tanamaatõsho, atovõ Abrão, ãwẽ aĩ, ãwẽ awerasĩ akánĩ ashõ poshakõvo.