Wenía 11 - Yové Koĩni Vana

Babelnamã mai shovo tokopáma iti ivo yoã

¹ Vevotiã yorarasĩ ashkã atõ anõ ipawa vanaro westíkase.

² Askái yorarasĩ vari oátõsho shokosho voí, Sinar mainamã mató sapa roaka merasho shokokévo.

³ Askái ano arí katxívaĩsho chinãmakinanãvo. “Tijolo avaikĩ nõ shoinõ”, ikívo. Naaivo mainamãro shasho mashko anõ shovo amísmavo, tijolo apawavo. Anõ vestoti askásevi, massa amísma, karovi pae apawavo.

⁴ Askávai arímamẽ vanaóvo. “Cidade shovimashõ, mai shovo tsaõníki ainavaĩki, naí nõ nokonõ. Askái ora mai wetsã peás itãimai, ashkã nõ shokomaĩnõ, noke ave kakanõvo”, ikívo.

⁵ Aská akĩ yorarasĩni cidade, mai shovo aká atõ shovimamaĩnõ, Yavepa “awesáraki oĩnõ”, iinã ato chinãpakei okĩ.

⁶ Aská oĩinã, “ii yorarasĩ chinã westíse, vana westítõse ikí shokovo. Rama atõ txitavirívi askámẽkĩ txipo atõ akátĩpa yama ikatsai”, ikĩ chinãki.

⁷ Askátani oí, vanaói. “Shokopakésho nõ oĩnõ voãna. Ato nõ vana wetsa apánõ, arímamẽ ave tanatima ikinanãnõvo”, ikí.

⁸ Askáki Yavepa ato vana wetsa apáki, maitio akĩ ato peás akĩ. Ato ãwẽ aská akatõsho, atõ cidade shovimaa mashtema enevo.

⁹ Askái anosho shavá ane “Babel”, ikí meráti, Yavepa ato vana wetsa apátõsho ikí. Askáki anosho maitioki ato peás akĩ.

Semni revomati ivo yoã

¹⁰ Naarasĩro Semni ato revomaa. Enẽ ato txivãchna txipo vari ravévakĩ tavákemaĩnõ, Sem ãwẽ vari 100namãsho ãwẽ vake venevake Arfaxade merati.

¹¹ Arfaxade meravaí, 500 vari tavái nishõ, venevakerasĩ, aĩvakerasĩ aká meraóti.

¹² Arfaxadero 35 varinamãsho ãwẽ vake Salá merati.

¹³ Salá merasho, 403 vari tavái nishõ, venevakerasĩ, aĩvakerasĩ aká meraóti.

¹⁴ Saláro 30 varinamãsho, vake venevake Héber merati.

¹⁵ Héber merasho, 403 vari tavái nishõ, venevakerasĩ, aĩvakerasĩ aká meraóti.

¹⁶ Héberro 34 varinamãsho, ãwẽ vake venevake Pelegue merati.

¹⁷ Pelegue merasho, 430 vari tavái nishõ, venevakerasĩ, aĩvakerasĩ aká meraóti.

¹⁸ Peleguero 30 varinamãsho, ãwẽ vake venevake Reú merati.

¹⁹ Reú merasho, 209 vari tavái nishõ, venevakerasĩ, aĩvakerasĩ aká meraóti.

²⁰ Reúro 32 varinamãsho, ãwẽ vake venevake Serugue merati.

²¹ Serugue merasho, 207 vari tavái nishõ, venevakerasĩ, aĩvakerasĩ aká meraóti.

²² Seruguero 30 varinamãsho, ãwẽ vake venevake Naor merati.

²³ Naor merasho, 200 vari tavái nishõ, venevakerasĩ, aĩvakerasĩ aká meraóti.

²⁴ Naorro 29 varinamãsho, ãwẽ vake Tera merati.

²⁵ Tera merasho, 119 vari tavái nishõ, venevakerasĩ, aĩvakerasĩ aká meraóti.

²⁶ Teraro 70 vari tavái nishõ, ãwẽ vake venevakerasĩ Abrão, Naor, Harã aatii merati.

Terã revomati ivo yoã

²⁷ Naatíiro Terã ato revomarasĩ, Abrão, Naor, Harã aatíi. Harãne ivõro vake venevake Ló merati.

²⁸ Ló meravai, nii niisho, ãwẽ anõ vaketi ivo mai, “Ur”, atõ akánamãsho vopiti. Aaivo mairo, caldeu yorarasĩni mai. Aská ã vopiatiã, ã papa Teraro vopima, niisa.

²⁹ Askámaĩnõ Abrãonĩ Naor ravéshóse shavo ninivarãvo. Abrãone aĩro Sarai. Naorpa aĩro Milca aká. Milca ãwẽ take Iscá akáro Harãne vake aĩvakerasĩ.

³⁰ Askámaĩnõ Sarairo revosma.

³¹ Askái txipo, Tera, ãwẽ vake Abrão, ãwẽ vakẽ aĩ Sarai, ãwẽ shokó Ló aatíi, Ur, caldeu yorarasĩni mainamãsho ato kawivaĩi, Canaã mai chinãvaĩi kaí. Askái ano atõ voámẽkĩ Harã shavapáse shokokétivo.

³² Askái Tera, Harãnamã nishõ, ãwẽ vari 205 nokóanamãsho vopiti.