Wenía 10 - Yové Koĩni Vana

Noepa merávõ revomati ivo yoã

¹ Noémẽsho revoarasĩ yoãnáro neskáti, Sem, Cam, Jafé aatíi. Askái naatiimẽsho enẽ ato txivãvai txipo vake wetsarasĩ revovaĩóti.

² Naatíiro Jafepa vakerasĩ, Gomer, Magogue, Madai, Javã, Tubal, Meseque, Tiras aatíi.

³ Askámaĩnõ naatíiro Gomernĩ vakerasĩ, Asquenaz, Rifate, Togarma aatíi.

⁴ Naatíiro Javãne vakerasĩ, Elisá, Társis, Quitim, Dodanim aatíi.

⁵ Askái naatii arí pashkákéi voíro waka kesó, mai voró ii itãnamã shokovo. Askái arí vakeyashõ atomamẽ shokoi, atõ vanãrvi ikí, atõ arí maĩ shokoi akávo, yora shoko wetsa.

⁶ Askámaĩnõ naatíiro Camne vakerasĩ, Cuxe, Mizraim, Pute, Canaã aatíi.

⁷ Askámaĩnõ naatíiro Cuxẽ vakerasĩ, Sebá, Havilá, Sabtá, Raamá, Sabtecá aatíi. Askámaĩnõ Raamapa vakerasĩro Sabá, Dedã aatíi.

⁸ Askámaĩnõ Cuxepa vakero Ninrode. Aaro aapari yora kakáya mestẽka shovisho niti, naaivo maĩ.

⁹ Yavepa oĩro yora chinã ravéma, askáinã yora ashkãsho yoãki, “Ninrode keská onika”, ipawavo.

¹⁰ Askái txitavíro aaro Babel mainamã kakáya shovisho nii. Askávai Sinar mainamã shavá wetsarasĩ Ereque, Acade, Calné akárasĩ ivosho niói.

¹¹ Anosho ãwẽ anõ niá ivo mai enevaĩi kaí Assíria mainamã tekii, askái ano nii kashõ shavá wetsa Ninive, Reobote-Ir, Calá, Resém aatii shavá shovimakĩ.

¹² Resém ivoro Ninive, Calá aká naki rakáa, askámaĩnõ “Calá”, atõ akáro “cidade anipa.”

^13-14 Askámaĩnõ Ludita, Anamita, Leabita, Naftuita, Patrusita, Casluita, Caftorita yorarasĩro Egitõ merávo. Askámaĩnõ Casluitarasĩni revomaaro filisteu yorarasĩ.

¹⁵ Askámaĩnõ Canaãro Sidom, Hete aatii meraya. Ãwẽ vake vevokéro Sidom.

¹⁶ Naarasĩ askásevi, Canaãne revomarasĩ, jebuseu, amorreu, girgaseu,

¹⁷ heveu, arqueu, sineu,

¹⁸ arvadeu, zemareu, hamateu, yorarasĩ aatíi. Askái txipo cananeu yorarasĩni merávo peás itivo.

¹⁹ Askái atõ anõ peás iki mairo Canaã. Askái ãwẽ kesoketanáro Sidomnamã iaketãi kawãi, Gerarnamã kesoa. Anosho Gazanamã ioketani kawãi, Sodoma, Gomorra, Admá, Zeboim akánamã kesoóa. Anosho kaí Lasanamã kesoa.

²⁰ Naaivo yorarasĩro Camne ato revomaa, arí vakeyashõ atomamẽ shokoi, atõ vanãrvi ikí, atõ arí maĩ shokoi akávo, yora shoko wetsa.

²¹ Askámaĩnõ Semro Jafepa take vevoké ivo. Aaro Héber yorarasĩ ato revomaiya.

²² Askámaĩnõ naatíiro Semni merávo, Elão, Assur, Arfaxade, Lude, Arã aatíi.

²³ Askámaĩnõ naatíiro Arãne vakerasĩ, Uz, Hul, Geter, Más aatíi.

²⁴ Askámaĩnõ Arfaxadero, Salá meraya, Saláro Héber meraya aká.

²⁵ Askáki Hébernẽ vake ravévakĩ merati. Aatiã shavapa mai pashkánanãmaĩnõ, ãwẽ vake aneki “Pelegue”, akĩ. Askávaíki wetsa anekiro “Joctã”, akĩ.

²⁶ Askámaĩnõ, Joctãro naarasĩni papa, Almodá, Selefe, Hazar-Mavé, Jerá,

²⁷ Hadorão, Uzal, Dicla,

²⁸ Obal, Abimael, Sabá,

²⁹ Ofir, Havilá, Jobabe aatíi. Naatíiro Joctã vakerasĩ katsése.

³⁰ Askái atõ anõ shokoa mairo, Messanamã itãi kaí, vari oákiri, mató keyáka Sefarnamã kesoa.

³¹ Naaivo yorarasĩro Semni ato revomaa, arí vakeyashõ atomamẽ shokoi, atõ vanãrvi ikí, atõ arí maĩ shokoi akávo, yora shoko wetsa.

³² Naarasĩro Noepa vakerasĩni ato revomaa yora. Wetsã wetsa revomaí, wetsã yora shoko wetsa shovimaí ato apávo. Atomẽsho, yorarasĩ maitioi peás ivaĩtivo, enẽ ato txivãti txipo.