Wenía 1 - Yové Koĩni Vana

Mai shoviti ivo yoã

¹ Txitavíki, Yové Koĩni naí shavá, mai shavá akápari shovimakĩ.

² Mai tanatĩpa rakáa, ãwẽ awe yama, vakíchise tsaóa. Askánamã Yové Koĩni Chinã waka matxise ronóa.

³ Askánamãsho Yové Koĩ, “shaváiná”, ãwẽ imaĩnõ, shaváinái.

⁴ Aská ashõ ãwẽ oĩa, roaka oĩki. Shavá, vakíchi aká ãwẽ pashkavakĩa.

⁵ Aská ashõ, shavá aneki “variké”, akĩ aneki. Vakíchi anekiro “yamé”, akĩ aneóki. Askámaĩnõ, yamékawãvai, shavákawãti, anõsho shavá txitavía ivo iti.

⁶ Askávai txipo, vanainaói. “Anõ verák ati nẽenõ, waka ave teanõ. Waka wetsaro, aa matxi rakãi, wetsaro aa teró rakãi avévakĩnõ”, ikí vanai.

⁷ Aská akĩ anõ verák ati nẽeki. Anõsho waka wetsa aa matxi rakãi, wetsaro aa teró rakãi avévakĩki. Ãwẽ aská aká, askái.

⁸ Aská ashõ anõ verák ati ivo aneki, “naí shavá”, akĩ aneki. Askámaĩnõ, yamékawãvai, shavákawãti, anõsho shavá ravévakĩ ivo iti.

⁹ Askávai vanainaói. “Naa mai shavapa waka rakákoĩkéna. Waka, mai aká ave pesokoĩkénõ”, ikí. Askái ãwẽ vanamaĩnõse, ãwẽ chinã keskái iyakéi.

¹⁰ Aská avaikĩ “mai”, akĩ aneki. Askámaĩnõ waka rakãkoĩkevaíki anekiro “waka kayarasĩ”, akĩ aneóki. Aská ashõ ãwẽ oĩa, roaka oĩki.

¹¹ Askávai, “Maĩsho koayavo õsi õsipa ave shovinõ”, ikí. Askái ãwẽ vanamaĩnõse, ãwẽ chinã keskái iyakéi.

¹² Maĩsho koayavo õsi õsipa shovii. Aská akĩ shovimashõ ãwẽ oĩa, roaka oĩki.

¹³ Askámaĩnõ, yamékawãvai, shavákawãti, anõsho 3 shavá ivo iti.

¹⁴ Askávai, Yové Koĩ vanainaói. “Naĩ masosho naóyavorasĩ masõnõ, anõsho shavá, yamé, shavá tekía, vari shavá tekía aká tanati.

¹⁵ Askásevi akĩ mai shavá naómái ave anõvo”, ikí. Askái ãwẽ vanamaĩnõse, ãwẽ chinã keskái iyakéi.

¹⁶ Askáki naóya ravévakĩ anipa shovimakĩ, naó anipa ivoro shavá naómái, naó animase ivoro yamé naómái akĩ. Aská akĩ ichirasĩ shovimaói.

¹⁷ Aská akĩ katsése shovimashõ, naí shavapa masõki, anõsho mai shavá naómái,

¹⁸ shavá, yamé, shavá tekía, varishava tekía aatii tanati. Aská ashõ ãwẽ oĩa, roaka oĩki.

¹⁹ Askámaĩnõ, yamékawãvai, shavákawãti, anõsho 4 shavá ivo iti.

²⁰ Askávai vanainaói. “Enẽ yoinavorasĩ wakateãtimanõ. Peiyavo shovimaónõ”, ikí.

²¹ Aská akĩ enẽ yoini venepavo shovimaí, ãwẽ potochta shovimaí akĩ. Askávaíki yoini peiyavorasĩ õsi õsipa shovimaóki. Aská ashõ ãwẽ oĩa, roaka oĩki.

²² Aská avaikĩ vana roapa atomẽ netãki. “Revoi, ene shavátiótsoma. Yoini peiyavorasĩní, revoótsoma”, akĩ.

²³ Askámaĩnõ, yamékawãvai, shavákawãti, anõsho 5 shavá ivo iti.

²⁴ Askávai, “naa mai shavapa shokoa yoini õsi õsipavo, iná ati, nĩi shokoya, maĩ noyõ ikiyavo, maĩ meshoyavo akárasĩ ave shovinõvo”, akĩ. Askái ãwẽ vanamaĩnõse, ãwẽ chinã keskái iyakéi.

²⁵ Aská akĩ nĩi yoini, iná ati ivo yoini, maĩ noyõ ikiyavo, maĩ meshoyavo, aká õsi õsipakĩ shovimakĩ. Aská ashõ ãwẽ oĩa, roaka oĩki.

²⁶ Askávai, “ramaro yora nokẽ yora vimaki, noke keská akĩ nõ shovimanõ. Ãatõ enẽ yoinavo, yoini peiyavo, iná ati, maĩ noyõ ikiya, maĩ meshoya akárasĩ katseki ave ivonõ”, ikí.

²⁷ Aská akĩ ãwẽ yora vimaki, yora shovimakĩ. Aa keská akĩ vene, aĩvo aká shovimakĩ.

²⁸ Aská akĩ, shovimakĩ mashtevaĩvaíki vana roapa ivo atomẽ netãki. “Revotsoma. Maitioi peás itsoma. Enẽ yoinavo, yoini peiyavo, maĩ noyõ ikiyavo, maĩ meshoyavo, aká vesosho shokotsoma”, ato akĩ.

²⁹ Aská ashõ ato vana aoki. “Maĩsho koayavo õsi õsipa mato ẽ ashõai, naaro matõ pitivere.

³⁰ Askámaĩnõ, mani peirasĩro, maĩ yoinavo, yoini peiyavo, maĩ noyõ ikiya, maĩ meshoya akárasĩni pitivere”, ato akĩ. Askái ãwẽ vanamaĩnõse, ãwẽ chinã keskái iyakéi.

³¹ Aská akĩ mashtevaíki ãwẽ oĩa, roa roaka oĩki. Askámaĩnõ, yamékawãvai, shavákawãti, anõsho 6 shavá ivo iti.