João 9 - Yové Koĩni Vana

Jesusnẽ yora vesho pakéti roa ati ivo yoã

¹ Aská txipo Jesus ãwẽ shokõkenavonĩ vokĩ atõ oĩa yora veshoya pakéti ivo niá oĩinã

² ãwẽ shokõkenavorasĩni Jesus nĩkãvo. “Yosin ikiyá, naa vesho pakétinã, awesásho ãwẽ ikírkĩ? Itimatõ ikiyanã aará, ãwẽ papanĩ ãwẽ ewará?”

³ atõ akátõsho “askámarívi. Aa, ã papa ã ewa akámẽsho ikímarívi. Anõsho Yové Koĩni mestẽ ave onãtakĩ oĩnõvo iinã ãwẽ ikírvi.

⁴ Neská shavásmaĩnõ ea yonoyatõ mee iti nõ ashõti roaka. Askámaĩnõ ma yãtakatsíki. Askámaĩnõro mee ikitĩpá chinãtsoma.

⁵ Naa ivo mai shavapa nishõ, earo yorarasĩ ato naóya amo keská”, ato akĩ.

⁶ Askái vanavaikíse Jesusnẽ kemo maĩ tochpá avaikĩ wachpo ayakeshõ veshoya ivo ãwẽ veronamã voyãki.

⁷ Aská avaikĩ “Siloénamã wakapasha tsaóatõsho vepanóta”, akĩ. (“Siloé” ikíro “yonótáa”.) Askái ano vepanotani oshõ ma oĩníya tachikarãi.

⁸ Ãwẽ aská oĩinã avé vesovaĩyavo, ãwẽ kopímatĩ yokak ikí oĩi kawáyavo aatíi vanai. “Waanã tsaósho kopímatĩ yokak ikiya ivomarívirá?” ikívo.

⁹ Wetsarasĩ “aaserívi”, imaĩnõvo, wetsarasĩniro “aa keskápáchta nõ oĩa”, atõ imaĩnõ arí vanainái, “eanã aasekatá”, ato akĩ.

¹⁰ Ãwẽ askámaĩnõ, “aweshõ roasho mĩ oĩníaikĩ?”

¹¹ atõ akátõsho, “yora ‘Jesus’, akĩ atõ aneatõ ãwẽ kemõ mai wachpo ayakevaikĩ ẽ veronamã voyãvaíki, ‘Siloé wakapasha tsaóatõ vepanóta’, iinã ea ãwẽ yonoa kashõ vepanovaikíse ẽ oĩníaikatá”, ato aoki.

¹² “Aa yoraro ato karaaí?” atõ imaĩnõ “aavĩ, tanama ea”, ato akĩ.

¹³ Askávai txipo, aa yora fariseurasĩ ewevaĩshoávo.

¹⁴ (Aská Jesusnẽ mai aská ashõ yora vesho ãwẽ roa aka shaváro sábadonamã.)

¹⁵ Askáki fariseurasĩni aa yora nĩkãvo. “Aweshõ mĩ oĩníaikĩ?” atõ akátõsho “yorã ãwẽ kemõ mai wachpo ayakevaikĩ ẽ veronamã ea ãwẽ voyãmaĩnõ kashõ vepanovaikíse ẽ oĩníaikatá”, ato akĩ.

¹⁶ Aská nĩkãinã, fariseu wetsarasĩ “aa yora Yové Koĩnamarívi, sábado shavámẽ eséyamísma”, atõ imaĩnõ yora wetsarasĩ arímamẽ vanavo. “Aweshõ yora anõ itimatõ ikiya ivõ aská akĩ ãwẽ yové atirá?” ikinanãki tanatĩpa akĩse chinãvo.

¹⁷ Askáinã arimẽse iovaĩsho yora nĩkãóvo. “Mia ãwẽ vesho roa akatõshonã awesakĩ mĩ chinãai?” akávotõsho “aanã Yové Koĩni vana teki akayatsikĩ”, ato akĩ.

¹⁸ Aská nĩkãsmẽinã judeu vevokerasĩni anõ ayamakĩ “veshoma, ramachta ãwẽ oĩnímarvi taíse”, ikĩ chinãinã ãwẽ papa ãwẽ ewa aká kenasho nĩkãvo.

¹⁹ “Naanã matõ vakeserá? Veshoya pakéa mã ivaivainamẽkĩ ramaro awesásho oĩníkĩ?”

²⁰ atõ akátõsho ãwẽ ewanĩsho ãwẽ papã “nokẽ vake, vesho pakéchnáya ivose,

²¹ askámẽkĩ ramaro ‘aweshõ oĩníkĩ’, nõ iki. ‘Tsoã roa akatõsho ãwẽ oĩnírkĩ?’ ikĩ chinãai nõ aka. Ã ivo arína nĩkãki, vakemarívi. Ãatõ mato yoãshokatsai, meki akĩ”, akávo.

²² Aaro awesáma, judeu vevokerasĩ ato rakéshoinã atõ ikí. Atovo arímamẽ mekivaivo “yora wetsase vanai ‘Jesusro Cristo kakáya nõ manávaĩvaĩ ivo’, ikí atõ vanamaĩnõ sinagoga shovõsho ato nõ kayãkõnõ”, ivaivo.

²³ (Askáinãvísi ãwẽ ewanĩsho ãwẽ papã “ã ivo arína nĩkãki, vakemarívi, ãatõ mato meki akĩse yoãshokatsai”, iinã atõ ikí.)

²⁴ Askáinã judeurasĩni vesho ikaikaina ivo arimẽse kenaovaíki nĩkãvo. “Yové Koĩkiri chinãsho anõpai vanatso. Mia roa akaya yoraro anõ itimatõ ikiyaserívi”, atõ akátõsho

²⁵ “aavĩ, ãwẽ anõ itimatõ ikí niáro ea tanama. Erí ẽ tanaro vesho ẽ nikaikainamẽkĩ ramaro oĩsho ẽ nia”, ãwẽ imaĩnõ

²⁶ “mia awesara avaí? Awesá ashõ roa akĩ mia vechpínimáai?”

²⁷ atõ akátõsho “ma ẽ yoãaikatá askámẽkĩ eakiri mato nĩkãmaka. Awesakĩ ea mã nĩkãokatsikírá? Ãwẽ shokõkena yorasevi mã shoviokatsikírá?”

²⁸ ato ãwẽ askátõsho ichnáitãki revívo. “Miarvi ãwẽ shokõkena yoraro. Nokero Moisésnárvi.

²⁹ Yové Koĩ Moisésnĩ vanatiro nõ tanaya, askámaĩnõ aa yoraro ‘awetosho oárkĩ’, ikĩ noke tanamavísi”,

³⁰ atõ imaĩnõ, “wetsakarkĩ! ‘Awetosho ãwẽ oárkĩ’, ikĩ mã tanamamẽkĩ ẽ vero roa akĩ oĩnimáai ea.

³¹ Yové Koĩni yora itimatõ ikiya ivokiri nĩkãsma nõ tanasaitĩ, askámaĩnõ aa rakéshoi, ãwẽ chinãne ishõi akí shokoya ivoro, nĩkãmtsãwa.

³² Yora vesho pakésho oĩsma ãwẽ nimaĩnõ yorã aská roa akáro nĩkãnásmarvi.

³³ Askámaĩnõ Yové Koĩnamashõro aská akatĩpa ikenkeãai”, ato akĩ.

³⁴ Ãwẽ askámaĩnõ “itimatõ ikiya pakésmẽinã noke mĩ yosĩkatsikírá?” iinã sinagoga shovõsho kayãkõvo.

³⁵ Aská akĩ atõ kayãkõa nĩkãinã Jesusnẽ avé meránanãsho nĩkãki. “‘Yorã Vake’ ikí anéa ivõ vananã ma mĩ anõ aka?”

³⁶ ãwẽ akátõsho, anõ eséyakĩ vana ainakĩ. “Atorkĩ Yorã Vakenã, ãwẽ vana ẽ anõ anõnã”, ãwẽ imaĩnõ

³⁷ “mĩ oĩaikatá, eatsikĩ neskái mivé vanayanã”, iinã Jesusnẽ aská akatõsho,

³⁸ “Yora Ivó, mia ẽ anõ aka”, iinã aa veyó maĩ vetsek ipásho raviki.

³⁹ Ãwẽ askámaĩnõ Jesusnẽ “naaivo mai shavapa yorarasĩ ‘ato ẽ awesavevakĩtiskárki oĩnõ’, ikĩ chinãinã, veshoyavorasĩ ato oĩnímaí, veshomarasĩ ‘ave tanamasnõvo’ iinã ato vesho akí, avévakĩnõ iinã ẽ oá”, akĩ.

⁴⁰ Ãwẽ aská nĩkãinã fariseurasĩni ano shokosho, “‘veshoya’, iinã noke mĩ akára”, atõ akátõsho,

⁴¹ “mato veshoyaro matomẽ ichná neea ivo yama ikenkeãai, askámẽkĩ ‘noke veshoyamarívi’, mã ikítõshovísi matomẽ ichná neea ivorasĩ iskatsa”, ato akĩ.