João 8 - Yové Koĩni Vana

¹ Askámaĩnõ Jesusro “Oliveira Matxi”, akĩ atõ aneanamã chinãvaĩi kaí.

² Askávai shavá nakoi vesokaĩki Yové Koĩni shovonamã ãwẽ iokaĩmaĩnõ yora ashkãsho chinãvaĩósho aa kesó atõ kãtxíketámaĩnõ tsaópakesho ato yosĩki.

³ Aská akĩ ato ãwẽ yosĩanamãsho Moisésnĩ esepa ato yosĩarasĩ, fariseurasĩ aatíisho aĩvo veneyamẽkĩ vene wetsamẽsho ãwẽ merámaĩnõ ewevaĩvo, yora ashkã kãtxívonamã.

⁴ Aská avaikĩ “yosin ikiyá, naa aĩvo veneyamẽkĩ vene wetsamẽsho meráai.

⁵ Moisésnĩ eséro aĩvo askámaĩnõ shashõ tsakaki yamamáa. Askámaĩnõ miã mĩ chinãro awesatirá mĩ chinãnã?” akávo.

⁶ Askámẽkĩ Jesus parãsho atõ nĩkãrívi, “awesá irakatsíki nõ nĩkãnoshõ”, iinã. Atõ askámaĩnõ vetĩ ipásho mevĩ mai wichai, wetsapa isi.

⁷ Ãwẽ askámaĩnõ nĩkãki atõ ãtsã akatõsho Jesusnẽ weníinavaíki ato revíníki. “Askáro, tsoa anõ itima ivõ imísmará? Ãatõ shashõ ave tsakanõ”,

⁸ ato avaí arimẽse tsaópakeósho vetĩ ipásho mevĩ mai wichaóki.

⁹ Ãwẽ aská nĩkãinã vevoke ivopari kaa oĩinã wetsa atxõse, wetsa atxõse, wetsa atxõse akí voávo. Askámaĩnõ Jesus westíse tsaókémaĩnõ aĩvo aa veyó niináshõ ãwẽ nimaĩnõ

¹⁰ weníinavaíki nĩkãki. “Ato voraía? Mia aská akatsikiya wetsachta niakeámará?”

¹¹ ãwẽ akátõsho “yama ikivo, Yora Ivó”, ãwẽ imaĩno “ea askásevi, eã aská, mia aotĩpásevi. Kao, anõ itimatõ ioroa”, akĩ Jesusnẽ.

Jesus “ea mai shavapa amo”, iti ivo yoã

¹² Askásho txipo Jesusnẽ yorarasĩ ato vana aoki. “Earo naaivo mai shavapa amorvi. Yora etxõya ivoro vakíchinamã niá keskái ichnái nioma ikatsai. Awetima chinãyai, amoyai nikatsai”, ato akĩ.

¹³ Ãwẽ askámaĩnõ fariseurasĩni “mirí ‘ea aská’, ikí mĩ vanarívi. Nokẽ tanátikiri chinãsho, yora ravésho yoã anõkasemẽkĩ mirí mĩ yoãmaĩnõro mia noke anõ akatĩpá”, akávo.

¹⁴ Atõ askámaĩnõ “erí ẽ yoãnamẽkĩ, ẽ vanaro anõkase. Ẽ oánamã ẽ tanasa, ẽ kakatsainamã ẽ tanasa aká, askámaĩnõ matõro ‘anosho oá’, ikĩ ea tanama, ‘ano kakatsai’, ikĩ tanamasevi aká mato.

¹⁵ Matõro yorã tanátikiri oĩsho ea mã oĩrívi. Earo yora aská amísma.

¹⁶ Eã yora ẽ aská akáro anõpakĩ ẽ akárvi, erí ẽ niámashõ. Ea yonoya ẽ Papã ea peshót akásho.

¹⁷ Moisésnĩ mato inãti esé vana neero yora ravésho meki tsakaki yoãmaĩnõ anõ akĩ.

¹⁸ Aská akĩ meki tsakaki yoãyaro ea, ẽ Papa aká, ea yonoya”, ato akĩ.

¹⁹ Ato ãwẽ aská akatõsho “atorkĩ mĩ papanã?” akĩ nĩkãvotõsho, “ea, ẽ papa aká mato onãtakĩ oĩma. Ea mã aská akáro, ẽ papa askásevi akĩ mã onãtakĩ oĩkeãai”, ato akĩ.

²⁰ Jesus askái vanaro Yové Koĩni shovonamã anõ kopímati tĩi iki kavõ tsaóa kesó nishõ ãwẽ iyãtá. Aská akĩ ato ãwẽ yosĩmẽkĩ kepoma ikívo, anõ atõ askáti ivo nokómasho.

²¹ Askávai vanainaói. “Ẽ kakatsai. Ẽ kamaĩnõ ea itimashõ anõ itimatõ ikí shokosho vopisho ẽ kakatsainamã mato voátĩpá”, ato akĩ.

²² Ãwẽ aská nĩkãinã judeu vevokerasĩ “‘ẽ kakatsainamã mã voátĩpá’, ãwẽ ikínã awesainã ãwẽ ikírkĩ? Arí yamakatsi ãwẽ ikírá?” ikívo.

²³ Atõ askái vanamaĩnõ Jesusnẽ ato revíki. “Matoro neno teró aaivorasĩrvi. Earo matxi ivorvi. Neno mai shavapa aarasĩrvi mato. Earo neno aaivo maĩ yoramarívi.

²⁴ Askáinãvísi mato ẽ yoãshoatĩ, ‘marí anõ itima ivõ ikí shokosho mã vopikatsa’, iinãnã. ‘Earo earvi’, ẽ imaĩnõ ea mã anõ ayamáro, anõ itima ivõ ikí shokosho mã vopikatsa”, ãwẽ imaĩnõ

²⁵ “tsoarkĩ mianã?” akĩ nĩkãvotõsho ato revíoki. “Txitavikíse mato ẽ yoãshoinati ivorvi.

²⁶ Mã anõ itima ivo ãtsaka eã mato yoãshoi ‘awesakatsíaki oĩnõ’, ikĩ mato chinãshoí, ati roakamẽkĩ mato ea aská akatĩpá. Ea yonoyatõ vanavísi ẽ vivarãrívi. Ãwẽnáro anõ anõka ivorvi”, ato akĩ.

²⁷ Askáki ãwẽ papa ãwẽ yoãmaĩnõ ashkãsho tanashoama ikívo.

²⁸ Askái vanainaói, Jesus. “‘Yorã Vake’, ikí anéa ivo ronõnikirívi ‘earo earvi’, ikĩ tanai, ‘arí chinãne ãwẽ ikíma’, ikĩ tanaói mã akatsai. Ẽ papã ea yosĩatõ ẽ vanarívi.

²⁹ Aská ea yonoyatõ ea peshót aká ẽ niárvi. Aaro ea enekésma, askatase ãwẽ roa aká keská ivorasĩse ẽ ashõatõsho”, ato akĩ.

³⁰ Jesus askái vana nĩkãinã yorarasĩni ãtsashósevi anõ ayakeávo.

³¹ Aská atovo Jesusnẽ ato aská akĩ. “Ẽ vana enekima mã toĩa ivoro, aská, mato ẽ shokõkena anõpa ivo yora mã shokokatsa.

³² Askáki chinã anõka ivo mã tanakatsa, anõsho yorarasĩ ati ikitái shokoa ikítõ ikí mã shokoa ivo enékatsa”, ato akĩ.

³³ Ãwẽ askámaĩnõ judeurasĩni “nokero Abraão revomásho yora wetsãchta ati akĩ noke toĩmarvi. Awesatõsho ‘noke enemakatsí’, mĩ ikírá?” akávotõsho,

³⁴ Jesusnẽ ato revíki. “Neskávere nĩkãtsoma. Yora anõ itimatõ ikí shokoyavoro yorã ati akĩ yonoatõ ikí atõ shokorívi.

³⁵ Yora noke mee ishõyaro nokẽ shavapa nikonkoĩsmarvi chinãtso. Askámaĩnõ nokẽ vakero askata ano shavá aaivorvi.

³⁶ Askásho atikitái mã shokomaĩnõ, eã mato enemáro, anõpai atikitaóimai mã shokokatsa.

³⁷ Mato ẽ tanasai. Abraão mato revomáa askámẽkĩ ea mã yamamakatsiki, ẽ vana matõ chinãnamã ikomasho.

³⁸ Neskái ẽ vanarasĩro ẽ papanĩ nishõ oĩsho ẽ ikírvi, askámaĩnõ matõ papã vana nĩkãshósevi mã iorívi”, ato ãwẽ akátõsho,

³⁹ “noke merayaro Abraão”, atõ imaĩnõ, “mato Abraão vakeshoro ãwẽ ipawatõ mã ikenkeãai.

⁴⁰ Askámẽkĩ anõka ivo Yové Koĩni vana nĩkãsho mato ẽ yoãshoasmẽkĩ ea mã yamamakatsiki. Abraãoro askái ãwẽ nitimarívi.

⁴¹ Matõ papã mee itĩvísi mã ikírvi”, ato ãwẽ akátõsho, “nokero vesãkara shavõ toámarívi. Nokẽ paparo westíserívi, Yové Koĩ”, akávo.

⁴² Atõ aská akatõsho Jesusnẽ ato vana aoki. “Matõ papa Yové Koĩshoro enõ mã noíkeãai, aamẽsho oshõ neno ẽ niásho. Erí ẽ oámarívi. Ãatõ ea yonorívi.

⁴³ Awesainã ẽ vana mã tanaimará? Ẽ yosin ikirasĩ mã nĩkãkatsikímashõ mã ikítsikĩ.

⁴⁴ Mato merayaro yochĩ ichnátõ kakáyarvi. Mato ãwẽnárvi, ãwẽ chinãtõ mã ishõa. Txitavianamãshóse yora ãwẽ yamamaináti. Anõka ivorasĩ ichnayarvi, ãwẽ anõ ikímashõ. Parã vanã ikí kawáyasho, yoa vanã papasho ãwẽ ikí.

⁴⁵ Askámaĩnõ eãro anõpakĩ mato ẽ vana akamẽkĩ ea mato anõ akáma.

⁴⁶ Mato wetsãse anõ itimatõ ẽ ikínã ea ayará mã oĩinã? Eãro anõpakĩ mato ẽ yoãshoamẽkĩ awesainã ea mã anõ ayamárá?

⁴⁷ Yora wetsase Yové Koĩnáshoro ãwẽ vana anõ amíska. Ãwẽ vana mã anõ ayamáro awesáma, ãwẽnamashõ mã ikí”, ato akĩ.

⁴⁸ Ãwẽ askámaĩnõ judeu vevokerasĩni “‘aaro Samaria ichnárasĩpárvi, yora yochĩ ichnátõ tasaa’, nõ ivaivainatĩ”,

⁴⁹ atõ akátõsho, “earo yochĩ ichnátõ tasamarvi, ẽ papamẽ eséyamíska ea. Askámaĩnõ matoro enõ mato eséyamísma.

⁵⁰ Erí ravítakatsí ẽ ikímarívi. Enõ eséyakatsai ivoro aya. Ãatõ ‘ato ivo anõpáraki oĩnõ’, ikĩ noke chinãshokatsai.

⁵¹ Neskávere nĩkãtsoma. Yora wetsa ẽ vana anõ akaya ivoro veísma ikatsai”, ato aoki.

⁵² Ãwẽ aská nĩkãinã judeu vevokerasĩni aská akávo. “Rama nõ tanaai. Yochĩ ichnátõ mia tasaaserívi. Abraão, Yové Koĩni vana teki akayavorasĩ aká vopitivo, askámaĩnõ miaro ‘ẽ vana anõ akaya ivoro veítĩpá’, mĩ iki.

⁵³ Miaro nokẽ papa Abraão keskapárá? Abraãonĩ Yové Koĩni vana teki akayavorasĩ keyótivo. Askámaĩnõ miaro tsoasho mĩ ikírkĩ?”

⁵⁴ atõ akátõsho “erí ẽ ravítáro, ichnárvi. Askámaĩnõ ‘nokẽ Yové’ mã ikí ivoro ẽ papaserívi. Aa enõ eséyamíska.

⁵⁵ Matõro mã oĩmarvi aa, askámaĩnõ eãro ẽ oĩya. Ea vanai ‘ẽ oĩmarvi’, ẽ ikíro, mato mã yoatõ ẽ ikenkeãai. Askámaĩnõ eãro oĩsho ãwẽ vana ea anõ amíska.

⁵⁶ Matõ papa Abraão ẽ anõ okatsai shavá chinãsho mekípaóa. Ea oĩsho enõ mekí ranóma iti”, ato akĩ.

⁵⁷ Ãwẽ aská akatõsho “mia 50 vari yamamẽkĩ ‘Abraão ẽ oĩya’, mĩ ikikĩ?”

⁵⁸ atõ akátõsho “ase, neskávere nĩkãtsoma. Abraão merámatiã earo earvi, eaparírvi”, ikĩ atõ ãwẽ revíatõsho,

⁵⁹ judeurasĩni shasho mashko toĩnívo, tsakatsiinã. Atõ askámaĩnõ Jesus ano onévaí Yové Koĩni shovõsho kayakaĩi.