João 7 - Yové Koĩni Vana

Jesus ãwẽ takevõ yoã tanati ivo yoã

¹ Aská txipo Jesus Galileianamã kaí, Judeianamãro niokatsikíma atõ yamamakatsikitõsho.

² Aatiã judeurasĩni “Arí Peshé Aká” atõ aká ivo saí ikí omakaĩi.

³ Askáki Jesus ãwẽ takevõ aská akávo. “Nenosho Judeiakiri katã. Mĩ shokõkenavorasĩni anosho mĩ akárasĩ ave oĩnõvo.

⁴ Yorã oĩtanáka nikatsiinãro, askátõ mĩ pãté itimarívi. Aská ato mĩ oĩmatirvi”, akávo.

⁵ (Askámẽkĩ ãwẽ takevo anõ aosmasevi.)

⁶ Askámaĩnõ Jesusnẽ “ramachta askánamã ea niátĩpá. Matoro vokatsiinã mã voá roaserívi.

⁷ Matoro yorã ichnatĩpá, askámẽkĩ earo awesáma, atõ ichnaa, itimatõ atõ imaĩnõ ẽ vanamaĩnõ.

⁸ Matõro oĩtana saí ikí. Earo ramachta kaama. Aaro awesáma, askánamã ẽ niti nokóma”, ato akĩ.

⁹ Askái vanavaí ano Galileianamãse nikawãi.

¹⁰ Askávaĩi ãwẽ takevo saí ikinamã vovaitxinĩ, Jesus askásevi txipo onésho iokaĩi.

¹¹ Aská ano saí ikinamãsho judeu vevokerasĩni manái shokosho nĩkãkenávo. “Ato niárá aanã?” ikívo.

¹² Askái yora ãtsa kãtxíanamãsho arí yoãketanávo. Wetsarasĩ vanai “aa yora roaka”, wetsarasĩ vanairo “ato parãai ãwẽ ikírvi”, ikívo.

¹³ Askámẽkĩ ashkãsho nĩkãnevo yoãma, judeu vevokerasĩ rakéshoinã.

¹⁴ Askái saí ikí potxinikaĩanamãsho Jesusnẽ Yové Koĩni shovo chinãnii kashõ ato yosĩki.

¹⁵ Askámaĩnõ judeu vevokerasĩ ravii vanavo. “Yosíkarkĩ, aweshõ aská yosikĩ, wichá tsasimasmẽkĩnã?” atõ imaĩnõ

¹⁶ Jesusnẽ ato revíki. “Neskái erí ẽ vanamarvi, ea yonoyatõ vana ẽ yoãrívi.

¹⁷ Yora Yové Koĩni chinãne ikiyaro, ẽ yosĩa ivo ‘Yové Koĩnamãsho oárvi’, ikĩ tanai, ‘arí ãwẽ ikírvi’, ikĩ tanaói avévakĩkatsa.

¹⁸ Yora arí yoãnáyaro ‘ea yorã ravinõ’, iinã ãwẽ ikírvi, askámaĩnõ aa yonoya ‘ave ravinõvo’, iinãro anõkase, parã vana yama.

¹⁹ Moisésnĩ mato inãtimarívirá esé vananã? Askámẽkĩ wetsãchta aaivo vana mã anõ ayamáai. Askáinã awesa earvi mã yamamakatsikírá?” ato akĩ.

²⁰ Aská wetsarasĩni ano shokosho nĩkãinã “mia yochĩ ichnátõ tasaaivere. Tsoã mia yamamakatsíraí?” atõ akátõsho,

²¹ “yové ashõ sábado shavapa mato ẽ oĩmatõsho ‘wetsakarkĩ’, ikĩ chinãsho mã oĩvai.

²² Moisésnĩ ina repã retás ati ivo tanáti mato eneshoti. Awesa ikĩkororá, Moisésmarívi, Abraão, Isaque, Jacó aatíisho mato eneshotirvi chinãtsoma. Aská venevakerasĩ retás akáro, sábado shavapa aká roaserívi.

²³ Askáinã Moisésnĩ esé vana anõ ashõ venevakerasĩ sábado shavapa mã retás akámẽkĩ, awesainã aaivo shavapa yora ẽ roa amaĩnõ ea mã ichnakévairkĩ?

²⁴ Veyó chinãnese ikĩ ea oĩtsomároa, chinã mekipatõ ishõ ea oĩtsoma”, ato akĩ.

²⁵ Aská Jerusalémnamã shokoyavo yora ravé vanai. “Naa yoraserá, atõ yamamakatsikínã?

²⁶ Awesa ashkãsho nĩkãnevo ãwẽ vanamaĩnõ wetsapa ishõse oĩaivokatá, nokẽ vevokerasĩninã. Cristo, ‘nõ manávaĩvaĩa ivose’, ikĩ chinãsho oĩaivormẽ, atovõnã?

²⁷ Askámẽkĩ naaro ‘anosho oa’, ikĩ nõ tanasai, askámaĩnõ Cristo oá ivoro ‘anosho oa’, ikĩ noke tanatĩpá”, ikívo.

²⁸ Atõ askámaĩnõ Yové Koĩni shovõsho ato yosĩ yosĩi isi isĩinasho vanai. “Marí ‘ea oĩi, ẽ oá tanai’, akí mã ikírvi. Askámẽkĩ erí chinãne ikí ẽ oámarívi, ea yonoyaro anõpa ivorvi, mã oĩmarvi aaro.

²⁹ Askámaĩnõ eãro ẽ oĩya. Anõsho ẽ oárvi, ãatõ ea yonorívi”, ato akĩ.

³⁰ Atõ aská nĩkãinã atõ kepokatsikimẽkĩ atxima ikívo, anõ ãwẽ askáti ivo nokómasho.

³¹ Askámẽkĩ yora ravétõ anõ akí vanakenávo. “Cristo ivõ tachikarãsho yové akĩ nãatõ akátõ akĩ tavakeotĩpárvi”, ikívo.

³² Askánamãsho Jesus aská akĩ atõ yoã nĩkãinã fariseurasĩnĩ ashõ Yové Koĩ ato vana ashõya kakáyavõ teske akaya ano Yové Koĩni Shovo vesoyavorasĩ ato yonoki, “Jesus kepona”, iinã.

³³ Atõ aská akatsikitõsho vanai. “Ea inokamase matonĩ ẽ nikatsai, askávai ea yonoyanamã ẽ iokaĩkatsa.

³⁴ Ẽ askákaĩmaĩnõ itimakĩ ea mato meratĩpá, ẽ kakatsai ivo shavapa mã voátĩpásevi”, ato ãwẽ akátõsho

³⁵ arímamẽ vanavo. “Atonamã kakatsiinã ‘ea mato meratĩpá’, ãwẽ ikírkĩ? Grécianamã nokẽ wetsamavorasĩ ravé peás iki shokoarasĩ ato yosĩi kakatsi ãwẽ ikíra?

³⁶ Awesainã ‘itimakĩ ea mato meratĩpá, ẽ kaanamã evé mato iovaĩotĩpásevi’, ãwẽ ikínã?” ikívo.

³⁷ Askávai saí iki roapa ivo anõ enékaĩa shavapa, Jesus weníinavaí isĩinasho vanaói. “Tsoa wakapashã vetsaraí? Vetsayatõro ea chinãvarãsho akírí.

³⁸ Ea anõ akayatõ, vanã yoãtĩ ‘awetima wakapasha ãwẽ chinãneshõ waka avái ikítõ ikí avákatsa’, ikí neea”, ato akĩ.

³⁹ Waka avá ãwẽ yoãro Yové Koĩni Chinã ãwẽ yoãrívi, anõ akayavorasĩ txipo ãwẽ yonoshotirvi. Askámẽkĩ aatiã Yové Koĩni Chinã ato yonoshoama iti, vopivai, naí shavapa kaamashõ ãwẽ ikí.

⁴⁰ Aská ravé ãwẽ askái vana nĩkãinã arí neskái vanavo. “Naa yoranã Yové Koĩni vana teki akaya nõ manávaĩvaĩa ivotsikĩ”, imaĩnõvo,

⁴¹ wetsarasĩ vanairo “naaro Cristotsikĩ”, ãwẽ imaĩnõ, yora ravétõro, Galileianamã pakémta ravãki “Cristo Galileianamãsho oátĩpá.

⁴² Vana neea ivoro Cristo Davipa revomamẽsho okatsairvi, Belém ãwẽ anõ kaniti ivo maĩsho”, ikívo.

⁴³ Askái anosho yora arímamẽ vana anõkinanãma ikívo.

⁴⁴ Ravétõ Jesus kepokatsikívomẽkĩ atxima ikívo.

⁴⁵ Askái teske akaya Yové Koĩni shovo vesoyavorasĩ itãi atõ vemaĩnõ, fariseurasĩnĩ ashõ Yové Koĩ ato vana ashõya kakáyavõ ato nĩkãvo. “Awesainã atxisho mã vivarãimará?”

⁴⁶ ato ãwẽ akátõsho, “yora askátõ vana nõ nĩkãmarvi”, ikívo.

⁴⁷ Atõ askámaĩnõ fariseurasĩni “mato parãoraí?

⁴⁸ Nokepa kakáya wetsase, fariseurasĩse aatíishonã anõ araía mã oĩinã? Akáma.

⁴⁹ Askámaĩnõ yorarasĩ ichnáa esé tanamasho atõ ikírvi. Yové Koĩni ato yostakatsa”, ikívo.

⁵⁰ Askámaĩnõ Nicodemos, yamé Jesusnĩ vanachnaya ivo, atopamẽkĩ askái vanainái.

⁵¹ “Nokẽ esé, yora avé vanamasemẽkĩ ‘nõ aská anõ’ ikínã roasetirá?”

⁵² ãwẽ imaĩnõ “mianã Galileia yorasevirá? Tanatso! Vana neea ivo ‘Galileianamãsho Yové Koĩni vana teki akaya okatsai’, ikí yoãnáa yamarvikatá”, akávo.

⁵³ Askái vanai mashtévaí atõ shavátivaĩvo.