João 6 - Yové Koĩni Vana

Paõnĩ yapa ivo yoã

¹ Askávai txipo Jesus Galileia iã, ãwẽ ane wetsa Tiberíades atõ akánamã pokevaĩi kaí.

² Yora westíma atxõvaĩvo, yové akí isĩ teneyavo roa akí ãwẽ aká oĩinã.

³ Askái Jesus ãwẽ shokõkenavorasĩnĩ mató chinãnii voshõ ano kãtxívo.

⁴ Aatiã judeurasĩ anõ saí ikatsi shavá Páscoa ivo omakaĩchta.

⁵ Askáki Jesusnẽ patáinásho yora westíma veá oĩinã Filipe tanamakĩ. “Naa yorarasĩ atonamã pão merasho ato nõ pimakatsã?” akĩ.

⁶ Jesusnẽro ãwẽ akatsai tanasmẽinã “Filipenĩ awesakĩ ea revíkatsíki nĩkãnoshõ”, iinã ãwẽ aká.

⁷ Ãwẽ askámaĩnõ Filipenĩ revíki. “Kopímati 200 prata noke ayaro pãochta ato nõ inãpakemẽkĩ anõmasevi iokeãai”,

⁸ ãwẽ imaĩnõ ãwẽ shokõkena wetsa Simão Pedrõ take André askái vanai.

⁹ “Naa vake wetsa, 5 pão cevada, yapa ichtóchta ravévakĩ aká aya. Askámẽkĩ yora naatíika aatíichta anõtĩpá”, akĩ.

¹⁰ Ãwẽ aská akatõsho Jesusnẽ “‘yorarasĩní, setépakéna’, ato arína”, ato akĩ. Aská aaivo matónamãro wasise rakáa. Ano shokoya venerasĩkase tanatáro 5000namãpáchta.

¹¹ Askánamãsho Jesusnẽ pão viakevaikĩ Yové Koĩ tanamavaikĩ kãtxíyavorasĩ ato inãpakevaíki yapa ato ãwẽ askásevi aoa ashkã yanivo.

¹² Askái pivai atõ enévãmaĩnõ Jesusnẽ ãwẽ shokõkenavo tanamakĩ. “Ãwẽ teshéarasĩ ichnámísi, roa arína”, ato akĩ.

¹³ Ãwẽ askámaĩnõ 5 pão cevadamẽchtasho teshéa ivo atõ kãtxikéa 12 kokí matá ikí.

¹⁴ Aská Jesusnẽ yové aka aská oĩinã, “naatsikĩ ‘Yové Koĩni vana teki akaya naaivo mai shavapa nipái okatsai’, nõ ivaivainanã”, akávo, ano shokoyavõ.

¹⁵ Atõ askámaĩnõ, Jesus anoshose akirishõ “aa nõ kakáyamanõ”, ikĩ chinãshokatsikívo tanainã, arimẽse matopa aríchta iokaĩói.

¹⁶ Askávai yãtakawãmaĩnõ Jesusnẽ shokõkenavo Galileia iãnamã voshõ

¹⁷ nõtĩ keyónivaí, Cafarnaumkiri voávo. Aská vakíchikawãmẽkĩ Jesusro tachima.

¹⁸ Askánamãshóse, niwe mestẽkatõ tachikarãki iã tsĩki avarãki.

¹⁹ Atovo winávaĩi voí nakivaĩki 5, 6 quilômetros akánamãpáchtasho atõ oĩa Jesus oí, waka matxi kochikarãi nõti chinãvarãki. Aská ãwẽ shokõkenavo rakévo oĩinã,

²⁰ “rakétsomároa! Eavere”, ato akĩ.

²¹ Askái Jesusmẽ mekívaíki nõtĩ nanenivai voí, inói nokói voáma ikívo, atõ chinãvaĩanamã.

Jesus “ea awetima pão”, iti ivo yoã

²² Askávai shaváma yorarasĩ iã okiri kesó shokovãyavorasĩni “Jesus aweshõ pokékaĩkĩ? Nõti westísemẽkĩ ãwẽ shokõkenavonĩ kaama, aríse vovaivotserã”, ikĩ chinãvo.

²³ Atõ askánamãsho yora ravé Tiberíadesnamãsho nõtĩ veayavo nokói veávo, Jesusnẽ Yové Koĩ tanamavaikĩ yora westíma ato ãwẽ pimavai orakama.

²⁴ Aská ano Jesus itimai shokoyavorasĩ aa, ãwẽ shokõkenavo aká yama oĩinã nõtĩ setépakevai iovaĩvo, Cafarnaumnamã Jesus merakatsiinã.

²⁵ Askávaĩi vokĩ iã okiri kesó Jesus niá meratachísho “yosin ikiya, awetiã neno mĩ nokóaikĩ?” akĩ nĩkãvotõsho

²⁶ ato revíki. “Neskávere nĩkãtsoma. Pão mato ẽ pimavaitõsho ea mã itimárvi. Ẽ yové akarasĩ tanaki ea mã akámarívi.

²⁷ Neno aaivo pitiro ichnárvi. Aaivokiri chinãtsomároa. Awetima akaya ivokiri chinãtsoma. Aaivo chinã ‘Yorã Vake’, ikí anéa ivõ mato inãkatsa. Aaro awesáma, ẽ papa Yové Koĩni chinãnevísi ẽ akõvaĩrívi”, atõ akĩ.

²⁸ Ãwẽ askámaĩnõ “‘awesátsoma’, iraí Yové Koĩnã?” ikĩ revívotõsho,

²⁹ “aaro aská. Ãwẽ yonoya ivo ea yoí ‘anõ arína’, iki”, ato akĩ.

³⁰ Ãwẽ askámaĩnõ atovõ “askáinãro, yové ashõ noke oĩma. Mĩ aská aka oĩvaikirívi mia nõ anõ anõ. Awesáivo mĩ akatsai?

³¹ Vana neea ‘naĩsho pão para ashõ ato pimapaóa’, iti vana keskátõ ikí nokẽ shenirasĩni askata wenẽnamãsho maná pipawavo”, atõ amaĩnõ,

³² Jesusnẽ ato revíki. “Neskávere nĩkãtsoma. Moisésmarívi aa ivo pão naĩsho ato inãpaóya, ẽ papã atirvi. Rama askásevi, pão koĩ mato inãyaro aasevi.

³³ Aaro awesáma, pão ãwẽna ivoro naĩsho nipái oshõ ato awetima akatsaiya yora”, akĩ ato yoãshokĩ.

³⁴ Ãwẽ askámaĩnõ, “Yora Ivó, aaivoka noke inãvaĩvaĩtso askáro”, atõ akátõsho,

³⁵ Jesusnẽ “easetsikĩ awetima ivo pãonã. Ea chinãvarãya ivoro shopĩ tanaóma, ea anõ akaya ivo txipokiri wakapashã vetsa aoma aká ikatsai.

³⁶ Askámẽkĩ ‘ẽ yové akarasĩ oĩsmẽinã ea anõ ayamai mã tapikasai’, mato ẽ avaitĩ.

³⁷ Askámaĩnõ ẽ papã ea inãa yorarasĩro ea chinãvarãmaĩnõvo, ea ato ichnama ikatsai.

³⁸ Aaro awesáma, naĩsho oshõ ‘erí chinãne inõ’, iinã ẽ oámarívi. Ẽ papã ea yonoa ãwẽ chinã mashtéshonõ iinã ẽ oárvi.

³⁹ Askáinã ea yonoyatõ chinã neská. ‘Ato veímáma, keyókaĩa shavapa ashkã akĩ ato wenímaóti’, ikĩ ea chinãshokĩ.

⁴⁰ Ãwẽ chinãro awesáma, yorarasĩ ãwẽ vake oĩsho anõ akayavorasĩro awetima ikitákatsavo. Keyókaĩa shavapa ato ẽ wenímaókatsa”, ato akĩ.

⁴¹ Ãwẽ askái vanamaĩnõ judeu vevokerasĩ arímamẽ Jesuski vanavo, “ea naĩsho oá ivo pão”, ãwẽ ikí vanaa nĩkãinã.

⁴² “Naa Jesusnã Josepa vakemarívira? Ãwẽ papa ãwẽ ewa aka nõ oĩmarvirá? Awesainã ‘ea naĩsho oárvi’, ikí vanaaikĩ?”

⁴³ atõ imaĩnõ Jesusnẽ “eki mã vanaketanaa enéna.

⁴⁴ Ẽ papã ea yonorívi. Ãatõ kawivarãma ivoro ea chinãvarãtĩpá ikivo. Enékaĩa shavapa ato ẽ wenímaókatsa.

⁴⁵ Yové Koĩni vana teki akayavorasĩni nẽeti vana neea aya. ‘Yové Koĩni ashkã akĩ ato yosĩkatsa’, ikí neea. Askásho, ãwẽ yosĩa ivorasĩ nĩkãsho yosisho ea chinãvarãkatsavo.

⁴⁶ Yorã ẽ papa oĩmarvi. Ea westíse yonótáyasho ẽ oĩrívi.

⁴⁷ Neskávere nĩkãtsoma. Ea anõ akaya ivoro awetima chinã aya.

⁴⁸ Eatsikĩ awetima pãonã.

⁴⁹ Matõ sheni wetsarasĩni askata wenẽnamãsho maná pipawavo askámẽkĩ keyótivo.

⁵⁰ Askámaĩnõ naaivo pão naĩsho oaya ivo piayaro vopitĩpá.

⁵¹ Earvi awetima pão naĩsho oaya ivo. Aa ivo pão piaya ivo yoraro awetimai nikatsai. Aaivo pãoro ẽ kaya. Aaivo ẽ kaya ato ravĩi vopikatsa, ashkã akĩ ato ave awetima anõ iinã”, ato akĩ.

⁵² Ãwẽ askámaĩnõ, judeu vevokerasĩ arímamẽ vanaketanávo. “Awesainã naa yorã ãwẽ nami noke ãwẽ yani amatsikírá?” atõ imaĩnõ,

⁵³ Jesusnẽ ato revíki. “Neskávere nĩkãtsoma. ‘Yorã Vake’, ikí anéa ivo ãwẽ nami mã yani akáma, ãwẽ imi akáma, mã akáro mato awetima ikitatĩpá.

⁵⁴ Ẽ nami yani akí, ẽ imi akí akaya ivoro awetima chinã ayasho keyókaĩa shavapa ẽ weníomákatsai.

⁵⁵ Aaro awesáma, ẽ namiro piti koĩ, ẽ imi enero anõ yaniti koĩ.

⁵⁶ Ẽ nami yani akí, ẽ imi akí akaya ivoro aa enõ txiwái, ea anõ txiwái nõ avévakĩkatsa.

⁵⁷ Ẽ awetima papã neno ea yonoatõsho ẽ awetima aorívi. Askásevi akĩ yora wetsa ẽ nami yani akaya ivo enõsho awetima aokatsa.

⁵⁸ Earvi naĩsho oaya pão koĩ ivo. Aaivo piayaro matõ sheniwetsarasĩni maná pishõ keyótivo keskáma ikatsai, awetimai nikatsai”, ato akĩ.

⁵⁹ Aatiã aská akĩ ato ãwẽ yosĩmtáro Cafarnaum sinagoganamãsho.

⁶⁰ Ãwẽ askái vana nĩkãinã ãwẽ shokõkenavo arímamẽ vanavo. “Vana aaivo yomãka, anõ ikítĩpá”, ikívo.

⁶¹ Aská akĩ atõ chinã onãtakĩ oĩi, atõ aki vana nĩkãi avaikĩ ato nĩkãki. “Neskái ẽ vananã ichnáserá mã nĩkãnã?

⁶² ‘Yorã Vake’, ikí anéa ivo naĩ ãwẽ niánamãsevi iokaĩmaĩnõ mã awesákatsa?

⁶³ Awetima chinã inãya ivoro Yové Koĩ Chinãrvi. Yorãro aská akátĩpá. Naaivo vana ẽ yoãro Yové Koĩni Chinãmẽsho oshõ, awetima akaya ivo vanarvi.

⁶⁴ Aská nĩkãsmẽinã wetsãchta mato anõ akáma”, ato akĩ. (Aaro awesáma, Jesus vevo askái vanaa anõ amísma ivo askákatsa tanasai, aa yomẽ akatsaiya ivo askásevi aoki.)

⁶⁵ Askái Jesus vanainaói. “Askáinãvísi mato ẽ yoãshovai. Yora wetsase ea chinãvarãyaro ẽ papã chinãmárvi”, ato akĩ.

⁶⁶ Ãwẽ askái vana nĩkãinã ãwẽ shokõkenavo wetsarasĩni enevo.

⁶⁷ Atõ aská oĩinã Jesusnẽ ãwẽ shokõkenavo 12 yora ato aská akĩ. “Matõ askásevi akĩ ea mã eneókatsa?” ãwẽ imaĩnõ

⁶⁸ Simão Pedrõ revíki. “Yora Ivó, tsoakata nõ atxõikĩ? Miarvi awetima vanaya.

⁶⁹ Nokẽro mia anõ akĩ, ‘Yové Koĩna awesá ivorvitserã’, ikĩ mia nõ tanasai”, ãwẽ akátõsho

⁷⁰ “eã mato kavẽrívi, 12 yora, askámẽkĩ matonĩ niá ivo wetsase yochĩ ichnátõ kakáya keská”, ato akĩ.

⁷¹ Aaro awesáma, Simão Iscariotesnĩ vake Judas yoí ãwẽ ikí. Aa 12 yora kavẽnaya ivo wetsase, Jesus yomẽ akaya.