João 5 - Yové Koĩni Vana

Jesusnẽ ma nii enéya yora roa ati ivo yoã

¹ Aská txipo, Jerusalémnamãsho judeurasĩ atõ saí imaĩnõ Jesus oĩnõ iinã kaí.

² Ano Jerusalém naki “Txivõ Ikoti”, atõ aká ivonamã orakama waka rakáa, Hebraicõ akáro “Betesda.” Ano paró repã ikitáya 4 iyaketã, naki shatévakĩa.

³ Aská ano isĩ teneyavo kãtxía, veshoyavorasĩ, txãtorasĩ, ma nii enéyavo aká.

⁴ [Askái askatase ano õo õmamẽkĩ, yonótaya yovepa, okĩ aaivo waka tsĩki amíska. Tsĩki ivai ãwẽ enépakémaĩnõ, isĩ teneya wetsase, aapari naki ãwẽ pakékaĩáse, roamtsãwã].

⁵ Aská ano isĩ teneya wetsa ramama ãwẽ rakáináti, 38 vari.

⁶ Askánamãsho Jesusnẽ vari aatíi isĩ tanai ãwẽ rakáa onãtakĩ oĩinã meratachísho, “mia roakatsiraí?” ãwẽ akátõsho,

⁷ “Yora Ivó, ẽ roakatsikísmẽkĩ tsoãkata ea ewevaĩkĩ, waka tsĩki imaĩnõ? Ãwẽ tsĩki imaĩnõ kakatsiinã ẽ atimamaĩnõse wetsarasĩni vevo para ivaĩki ea mashkãvaĩvaĩvo”, akĩ.

⁸ Ãwẽ aská akatõsho Jesusnẽ “weníiná. Mĩ anõ vekásho rakáti vivai kochikawãta”,

⁹ iinã ãwẽ aská akanamãshóse, rateise isĩ roavaí, ãwẽ anõ rakáti vivai nivetaníi. Ãwẽ aská atiro sábado shavapa.

¹⁰ Askái aaivo yora ãwẽ anõ rakáti vivai ãwẽ nimaĩnõ, judeu vevokerasĩni oĩvaíki aská akávo. “Rama anõ tenea sábado shavásho askátimamẽkĩ, mĩ anõ rakáti mĩ kawivaĩai”,

¹¹ atõ akátõsho ato revíi vanai. “Yora ea roakaitõvísi ‘mĩ anõ rakáti vivai kochikawãta’, iinã ea ãwẽ yonorívi”, ato akĩ.

¹² Ãwẽ askái vanamaĩnõ, “tsoa yorará, mia aská akĩ yonoyanã?” akávo.

¹³ Askámẽkĩ ãatõ tanaómasevi, aa yora ãwẽ isĩ roa akaya ivo. Aaro awesáma, ano yora ãtsa aya, Jesus ma kaayásevi aká.

¹⁴ Askávai txipo Yové Koĩni shovonamãsho Jesusnẽ meratachísho aská akĩ. “Oĩ, mia ma roai. Txipokiri anõ itimatõ ioroa, isĩ wetsa tavákepatõ mia iomísi”, akĩ.

¹⁵ Ãwẽ aská aka kashõ judeu vevokerasĩ ato yoãshoi kakĩ, “Jesustsikĩ, ea roa avayanã”, iinã.

¹⁶ Aská sábado shavapa yora ãwẽ aská aka oĩinã judeu vevokerasĩni Jesus meskoi shovivo.

¹⁷ Atõ aská akatõsho Jesusnẽ ato tanamakĩ. “Ẽ papa mee iti tenesma, ea askásevi mee iti teneósmasevi”, ato akĩ.

¹⁸ Jesus askái vanamaĩnõkavísiro judeu vevokerasĩni ranokasmaki yamamakatsíkavo, sábado shavapa yora ãwẽ roa avai westímẽshoma, “Ẽ papa Yové Koĩ”, iinã ato ãwẽ yoãoshoatõsho “‘ea aa keskásevi’ iki”, ikĩ chinãshoávo.

¹⁹ Atõ askámaĩnõ, Jesusnẽ ato aská aoki. “Neskávere nĩkãtsoma. Ãwẽ vakẽ arí akátĩpárvi, ãwẽ papa ikí oĩsho ikiyarívi. Aaro awesáma, ẽ papã aká keskásevi ea aoyarvi.

²⁰ Papa enõ noíkasho, ẽ akárasĩ katseki ea oĩmaiya. Roa tavákepa ivorasĩ ea ãwẽ oĩmamaĩnõ, ‘roakarkĩ’, ikĩ chinãsho mã oĩkatsa.

²¹ Ẽ Papã vopiyavorasĩ ato wenímatõsevi akĩ ea askásevi aoya, yora erí ẽ kavẽa ivorvi.

²² Aská ẽ paparo anõ itimatõ atõ imaĩnõ ‘awesatiraki oĩnõ’, ikĩ chinãsmarvi. ‘Ẽ vakẽ ato ave aská anõ’, iinã ea ãwẽ nitxĩa.

²³ Aaro awesáma, ẽ papamẽ eséyatõsevi ikĩ enõ ave eséyaónõvo. Wetsase enõ eséyama ivoro, askásevi akĩ ẽ papamẽ eséyaóma. Ãatõ yonorívi ea.

²⁴ Neskávere nĩkãtsoma. Neská akĩ ẽ vana nĩkãi, ea yonoya anõ akí akayaro, ma awetima ikitáya, yostáma ikatsai. Veítĩpá, ma awetimaya.

²⁵ Neskávere nĩkãotsoma. Vana nĩkãyamai vopisho ikítõ ikiyavorasĩni Yové Koĩni vakẽ oi atõ nĩkãkatsa shavá omakaĩma, ma nokóai rama. Aská akĩ nĩkãyavorasĩro awetima ikitákatsavo.

²⁶ Ẽ paparo wenímaiyashõ, ‘ẽ vake ẽ ikítõsevi ikí ave nionõ’, iinã ea nitxĩki.

²⁷ Ẽ papã ‘awesatiraki ato ave chinãshonõ’, iinã ea nitxĩoki, ea Yorã Vakesho.

²⁸ Aská nĩkãinã ‘awesárkĩ?’ ikĩ chinãtsomároa. Aaro awesáma, neská ivo shavá omakaĩai. Vopiyavorasĩ ãwẽ oi nĩkãinã

²⁹ weníokatsavo. Anosho roai shokopaóyavorasĩro awetimasho shokokatsavo, Yové Koĩnĩ. Askámaĩnõ ichnái shokopaóyavorasĩro yostákatsavo.

³⁰ Ẽ erí chinãne ikí ‘neskáti roaka’, ikĩ ẽ akámarívi. Ẽ papã chinã nĩkãshovísi ‘yorarasĩ ẽ awesavevakĩtiskárki oĩnõ’, ikĩ ẽ chinãrívi. Aaivoro mekika, erí chinãne ikíma, ẽ papã ea yonoatõ ikísho.

³¹ Ea erí yoãnai neská vanã ẽ ikíro nokẽ tanátikiri chinãsho ea mã anõ akĩ chinãshoatĩpá. Aaro awesáma, yora ravésho yoãro anõkase, westítõ yoãro anõ akatĩpá.

³² Askámaĩnõ yora wetsã ea yoãki ‘aa aská’, ikĩ anõpakĩse ea ãwẽ yoãrívi.

³³ ‘João nĩkãtsoma’, iinã yorarasĩ mã yonoshochĩa. Aaro meki tsakaki ea yoãya.

³⁴ Askámaĩnõ yora ea yoãya ivomẽ ea tsakáma, askámẽkĩ ‘anõ ashõ ave awetima ikitánõvo’, iinã Joãone ea yoãti ivorasĩ mato ẽ yoãshoárvi.

³⁵ Joãoro amo ketimésho naóya ikítõ ikí. Inokamase mã anõ mekíchná.

³⁶ Ea ãwẽ yoãtiro mekikase. Askámaĩnõ ẽ papã ‘askátso’, iinã ea yonomaĩnõ ẽ yové akarasĩ Joãone yoã tavaai. Anõsho yorarasĩni ‘anõse, ẽ papa Yové Koĩni yonoáse’, ikĩ ea chinãshoavo.

³⁷ Ea yonoyatõ ẽ papã meki tsakaki ea yoãomtsãwasevi. Matõro ãwẽ oi nĩkãma, mã oĩmasevi akárvi.

³⁸ Ãwẽ vana mato toĩma, ãwẽ yonoa mã anõ akamashõ.

³⁹ Vana neea ivo vana oĩsho mato yosimtsãwa, ‘anõ awetima ikitáti neetserã’, ikĩ chinãsho. Askámẽkĩ ease ãwẽ yoãrívikatá.

⁴⁰ Askámẽkĩ ‘awetimai ninosho’, iinã ea mato chinãvarãvarãsma.

⁴¹ Yorã raviki ‘roakarkĩ’, ikíkiri ea oĩsma.

⁴² Mato onãtakĩse ẽ oĩai, Yové Koĩmẽ anõpakĩka noísho mã shokomarvi.

⁴³ Earo ẽ papã chinãneshõ ẽ oámẽkĩ ea mato anõ akáma. Askámaĩnõ wetsa ãwẽ arí chinãne ikí oaya ivoro mã anõ akenkeãai.

⁴⁴ Yorã mato raviakiríse mato chinãmtsãwa, Yové Koĩniro ‘awesakĩrmẽ’, noke chinãshoĩ imísma mato. Askásho mã ikítsikĩ, ea mato anõ ayakeatĩpánã.

⁴⁵ Eamarívi ẽ papa veyósho mã anõ itimatõ ikírasĩ yoãkatsaya. Mã anõ txipoa yora Moisésnĩrvi mato akatsai.

⁴⁶ Aaro awesáma, aa mã anõ akáro, ea askásevi akĩ mã anõ aokeãai. Easerívi ãwẽ wichashoti.

⁴⁷ Askásho ãwẽ wichatikiri vana mã anõ akámaro, aweshõkata ẽ yoã vana mã anõ aoikĩ?” ato akĩ.