João 4 - Yové Koĩni Vana

Jesus Samaria shavonĩ vanati ivo yoã

^1-3 Askái fariseurasĩni “Jesusnẽ ato morích akí, ãwẽ shokõkenavo merai akĩ João aká ivo tavakepáai”, ikí nĩkãvo. (Askámẽkĩ morích akayaro Jesusmarívi, ãwẽ shokõkenavorívi.) Aská akĩ fariseurasĩni nĩkãvo tanainã Jesus Judeianamãsho kaí arimẽse Galileianamã iokaĩói.

⁴ Askái ãwẽ anõ kaa vairo Samaria maĩ paíkaĩa.

⁵ Askái ano paíkaĩi Sicarnamã nokói, Jacopa ãwẽ vake José ãwẽ inãti ivo mai orakama.

⁶ Ano vaná wakapasha Jacopa pokĩti ivo tsaóoa. Askái vari matxiinakatsímaĩnõ Jesus yomeinã aa tava tsaókawãi.

⁷ Ano tsaósho ãwẽ oĩa, Samaria shavo wakapasha vinõ iinã tachikarãmaĩnõ Jesusnẽ “wakapasháchta ama ea”, akĩ.

⁸ (Askámaĩnõ ãwẽ shokõkenávoro cidadenamã piá vinõ iinã ma voáyavo.)

⁹ Ãwẽ aská akatõsho, aĩvõ revíki. “Awesakĩ wakapashã ea mĩ yokáarkĩ? Miaro judeu yorarvi, earo Samaria shavo noke avévakĩrívikata”, akĩ. (Aaro awesáma, askái ãwẽ vanaro judeu yorarasĩ Samaria yorarasĩnĩ ranĩnanãyavósho atõ ikí.)

¹⁰ Askái ãwẽ vanamaĩnõ Jesusnẽ revíníki. “Yové Koĩni mia ashõkatsiki ivo tanai, ‘tsoarkĩ wakapashã ea yokáyanã’, ikĩ chinãi avaikĩ, wakapasha ea mĩ yokámaĩnõro, aská, awetima wakapasha mia ẽ inãkeãai”, akĩ.

¹¹ Ãwẽ aská akatõsho “‘awetima wakapasha’, mĩ yoãnã atonamã mĩ weakatsikírkĩ? Mia anõ weati yamakatá, naa vaná waka okervi aká.

¹² Mia nokẽ sheniwetsa Jacó keskapárá? Ãatõ naa vaná waka noke ashõti. Aa, ãwẽ vakerasĩ, ãwẽ inárasĩ aatíisho apawavo, naa wakapasha”, akĩ.

¹³ Ãwẽ aská akatõsho “naaivo wakapasha akayaro wakapashã vetsai enétĩpá,

¹⁴ askámaĩnõ, wakapasha eã ẽ inãa ivo ashõro txipokiríchta vetsaotĩpá. Aaro awesáma, aská ivo ashõro, ene vero ikítõ ikí ãwẽ chinã naki tsaósho, awetima akatsai”, ãwẽ akátõsho

¹⁵ “naaivo wakapasha ea ama askáro. Aa avai, ea wakapashã vetsama tanainã neno ea weai õo õma ikatsai”, akĩ.

¹⁶ “Askáinãro mĩ vene eweta, iokarãnoshõ”, akĩ.

¹⁷ Ãwẽ askámaĩnõ, “ea venemarvi”, ãwẽ akátõsho “‘venema’, mĩ ikí, anõse.

¹⁸ 5 vene ma mĩ eneya, rama mĩ avé niá ivoro mĩ venemarívi. Anõkai mĩ vanai”, akĩ.

¹⁹ “Mã! Ramaro mia ẽ tanaai. ‘Askákatsa’, ikĩ vevo oĩsho yoãya ivo mia.

²⁰ Nokẽ shenirasĩni waa ‘Gerizim’ rakáa ivo matopashõ Yové Koĩ ravipaóvo, askámẽkĩ mato judeurasĩni yoãkiro ‘nenomarívi, Jerusalémnamãrvi Yové Koĩ ravia’, ivaivainavo”, akĩ.

²¹ Ãwẽ askámaĩnõ “aĩvaké, rama omakaĩi neskákaĩkatsavere, ẽ yoama. Ẽ papa Yové Koĩ raviro, naaivo matónamãchta, Jerusalémnamãshochta aká ravima ikatsaivo.

²² Mato Samaria yorarasĩro tanamasmẽkĩ mã ravirívi, askámaĩnõ nõ tanaai nokẽro. Aaro awesáma, awetima akaya ivo yoraro judeurasĩmẽsho oárvi.

²³ Askámẽkĩ ravia shavá omakaĩma, ma nokóai. Anõpakĩ ravikatsiki ivorasĩro, Yové Koĩni Chinãne ato imatõsho ẽ Papa anõpakĩ ravikatsavo. Neskárasĩrvi ãwẽ chinãshoa ẽ Papã.

²⁴ Awesáma aaro, Yové Koĩro Yovérvi, askásho aa raviavõ, ãwẽ Chinãne imatõsho anõpakĩka atõ raviti roaka”, akĩ.

²⁵ Ãwẽ askámaĩnõ, “Messias okatsai ẽ tanasai. Ãatõ oshõ keyoki roakakĩ noke yoãshoi okatsai”, akĩ. (“Messias” Gregõ vanãsho akáro “Cristo”.)

²⁶ Ãwẽ aská akatõsho, “eanã aasekatá Messiasnã, neskái mivé vanayanã”, akĩ.

²⁷ Ãwẽ askánamãshóse ãwẽ shokõkenavõ tachivarãki “awesainã aĩvonĩ ãwẽ vanarkĩ? Wetsakarkĩ”, ikĩ chinãvo, askámẽkĩ wetsã “mĩ aweskárkĩ?” ikí, “awesainã avé mĩ vanarkĩ?” akáma ikívo.

²⁸ Anoshóse aĩvõ ãwẽ chomo anose tsaõvai kashõ ãwẽ shavánamã yorarasĩ tanamai kakĩ.

²⁹ “Ẽ ikaikainarasĩ katseki ea yoãshoayanã tsoarkĩ oĩi voãna. ‘Naanã Cristo, kakáya nõ manávaĩvaĩa ivorá?’ ẽ iki”, ato akĩ.

³⁰ Aská nĩkãinã yorarasĩ poshóvarãi, “nõ oĩnõ”, iinã.

³¹ Atõ askávarãmaĩnõ anosho ãwẽ shokõkenavõ Jesus aská akávo. “Yosin ikiyá, naachta pirí”, atõ akátõsho

³² “piáro ayase, mã oĩma ivo”, ato akĩ.

³³ Ãwẽ askámaĩnõ arímamẽ vanavo. “Yora wetsãmará ma piti vishõvarãaikĩ?” ikívo.

³⁴ Atõ askámaĩnõ Jesusnẽ ato aská akĩ. “Eã ẽ pitiro ea yonoyatõ chinãnese ishõi, ea ãwẽ yonoa ivo mee iti mashteshói ẽ aká.

³⁵ ‘Nenosho kaí, 4 oshenamã piti ikaĩmaĩnõ nõ tovakatsa’, mato imíska. Askámaĩnõ yorarasĩro waa shokoaĩ. ‘Piti ikaĩatõ ma ikivo, tovati roaka’, iinã mato akátsikĩ.

³⁶ Aská akĩ tovaya ivoro ma kopítáai. Ãatõ tovaa ivoro anõsho yorã chinã awetima ikitáti. Aská aa piti vanaya, tovaya akánĩ mekívakĩkatsavo.

³⁷ Askáinã anõi atõ vanarívi ‘vanaya wetsarvi, tovaya wetsarvi’, amískavo.

³⁸ Piti matõ mã vanama ichĩmẽkĩ ‘tovatsoma’, ikĩ mato ẽ yonoa. Yora wetsarasĩni meechnárvimẽkĩ, ano voshõ mã tovãkãai”, ato akĩ.

³⁹ Askáinã Samaria shavõ “ẽ ikaikainarasĩ keyoki ea yoãshoa”, ikí nĩkãinã ano shavapa shokoyavõ ashkãsho Jesus anõ ayakeávo.

⁴⁰ Askáinã Jesus chinãvaĩsho “nokenĩ nii kawã”, atõ akátoshõ shavá ravévakĩkase tavái atonĩ nii.

⁴¹ Askáki anosho ã vana nĩkãinã yora ravétõ anõ ayakeóvo.

⁴² Askáinã aĩvo aská akávo. “Vevo mĩ yoãmaĩnõ mia nõ anõ avai, askámaĩnõ ramaro nokẽ noríka nĩkãsho nõ anõ aoai. ‘Yora ashkã akĩ shavá amayáse’, ikĩ nõ tanaóai”, akávo.

Jesusnẽ aaivo maĩ kakáyã shokõkenatõ vake roa ashõti ivo yoã

⁴³ Askávai shavá ravévakĩ nivai Galileianamã iokaĩi.

⁴⁴ (Aaro awesáma, “Yové Koĩni vana teki akaya yoraro ãwẽ maĩ eséyamísmavo”, ikĩ yoãvai.)

⁴⁵ Aská akĩ ãwẽ yoãvaimẽkĩ, Galileianamã ãwẽ nokókaĩmaĩnõ ano shokoyavo anõ mekívo, Jerusalémnamãsho Páscoa saí ikinamãsho ãwẽ yové akárasĩ atõ oĩvaikiri chinãsho.

⁴⁶ Askávai Galileia naki Canánamã iokaĩi, wakapasha vinho ãwẽ ayakechĩanamã. Ano nokókaĩmaĩnõ, aaivo maĩ kakáyã shokõkena yora, Cafarnaumnamã niaya, ãwẽ vake isĩ tenemaĩnõ,

⁴⁷ “Jesus Judeianamãsho oí, Galileianamã nokói oa”, ikí nĩkãinã chinãvaĩsho tanamakĩ. “Ẽ vake isĩ teneai, vopikatsiki. Ea oĩshoi kawã”, akĩ.

⁴⁸ Ãwẽ aská akatõsho, “yové akárasĩ oĩinãkachta mã anõ akárvi”, ãwẽ imaĩnõ

⁴⁹ nĩkãnióki. “Yora Ivó, rayákawã, ẽ vakẽ ea enemísi”, akĩ.

⁵⁰ Awẽ aská akatõsho “kao roase. Mĩ vake vopima ikatsai”, ãwẽ akátõsho Jesusnẽ vana anõ avaini kaí.

⁵¹ Askákaĩi ãwẽ kamaĩnõ, vai potxinishõ ãwẽ mee imarasĩni veyatachísho yoãshoávo. “Mĩ vake roasevere”, akĩ yoãshoávo.

⁵² Atõ aská akĩ yoãshoatõsho ato nĩkãki. “Vari awetia roavaí?” akĩ ã nĩkãtõsho, “shaváma vari keshkãkémaĩnõ 1 horanamã yoná ipávai”, akávo.

⁵³ Aská akĩ atõ yoãshomaĩnõ anosho ã papã chinãki “vari aatiástserã Jesusnẽ ea tanamavainã. ‘Mĩ vake roase ikatsai, vopima ikatsai’, ea ãwẽ avainã”, ikĩ chinãki. Askáki anosho ãwẽ wetsamavorasĩni ashkãsho Jesus anõ ayakeávo.

⁵⁴ Askámtá, Jesusnẽ yové aoa wetsa, Galileianamã Judeianamãsho ãwẽ kaa txipo.