João 3 - Yové Koĩni Vana

Nicodemosnẽ Jesus merati ivo yoã

¹ Fariseu yora ãwẽ ane Nicodemos ano niá. Aaro judeurasĩni kakáya.

² Askáki ãatõ Jesus yamé chinãvaĩsho aská akĩ. “Yosin ikiyá, Yové Koĩni ato ave yosĩnõ iinã mia yonoa mia nõ tanasai. Askátõ mia tasama ivoro askárasĩ mia yové akatĩpá”, akĩ.

³ Ãwẽ askámaĩnõ. “Neskávere nĩkãtso. Yora vake pakéoma ivoro, Yové Koĩ kakáyai ãwẽ nimaĩnõ oĩtĩpá”, akĩ.

⁴ Awẽ askámaĩnõ Nicodemosnẽ nĩkãki. “Aweshõkata yora sheniwetsa vake pakéoikĩ? Arimẽse ã ewã shakĩ naki nanéikoóinã ãwẽ itirá?” akĩ.

⁵ Ãwẽ aská akatõsho, “neskávere nĩkãtso. Yora wakapashãsho pakéi, Yové Koĩni Chinãne pakéi, ãwẽ akáma ivoro, Yové Koĩ kakáyai ãwẽ nimaĩnõ eréikotĩpá.

⁶ Yorã vake mĩ pakéro aaro yoranárvi, askámaĩnõ Yové Koĩni Chinãneshõ pakéaro Yové chinã viaya.

⁷ Askái ‘vake pakeótso’, ẽ imaĩnõ ‘awesármẽ’, ikĩ chinãroa.

⁸ Niwe arí shovi ikí, ãwẽ oi nĩkãnamtsãwa chinãtso, askámẽkĩ ‘atokirisho oí, atokiri kaíkĩ?’ ikĩ tanatĩpá. Aská keskáse Yové Koĩni Chinãmẽsho pakéa ivo yoraro”, akĩ.

⁹ Ãwẽ aská akatõsho, “aweshõ itirkĩ?” akĩ.

¹⁰ Ãwẽ askámaĩnõ Jesusnẽ revíki. “Mianã Israel yorarasĩ yosĩamẽkĩ, awesakĩ mĩ tanaimarakĩ?

¹¹ Neskávere nĩkãtso. Nõ tanaya, nõ oĩya aká ivo meki tsakaki mato yoãshoamẽkĩ, mato anõ aosmasevi.

¹² Naa mai shavapa nõ oĩkenarasĩ ẽ yoãmaĩnõ ea mato anõ akámaro, naí shavapa ẽ yoãkamaĩnõvísiro, ea mato anõ akáma ikatsai.

¹³ Aa naí shavapa kaiyaro ea westíse, ‘Yorã Vake’, ikí anéa ivo. Easevi arisho nipái oaya.

¹⁴ Aská, askata wenẽnamãsho Moisésnĩ iwi nitxĩsho mane rono yochĩ anõ ronõti, ari oĩsho ave keyómasnõvo iinã. Askásevi akĩ ea iwi mekóchkitinĩ ronõkatsavo.

¹⁵ Ea aská amaĩnõvo yora ea anõ akaya ivoro awetima ikitákatsa.

¹⁶ Aaro awesáma, Yové Koĩni yorarasĩmẽ noí noíkasho ãwẽ vake westíchtamẽkĩ yonoki, anõsho, ãwẽ vake anõ akaya ivorasĩro veímísivo, awetima ikitánõvo iinã.

¹⁷ Yové Koĩni ãwẽ vake yonoki, ‘yorarasĩ ato shavá amanõ’, ikĩ ãwẽ yonorívi, ‘enekima ato yostanõ’, ikíma.

¹⁸ Yora Yové Koĩni vake westíse anõ akaya ivoro yostátáma ikatsai, askámaĩnõ, anõ akãsma ivoro ma yostátáai. Aaro awesáma, anõ amísmasho ã ikí.

¹⁹ Yora yostátákatsaro neskátõsho ikí. Yorarasĩmẽ amo yora ikítõ ikí ma nokóyamẽkĩ noímaki vakíchise noívo, ichnávaĩi shokosho.

²⁰ Yora ichnái niaya ivoro amo roamísmarvi. Askái nishõ, amo oĩkatsikíma, ãwẽ ichnákawã ivo oĩmísi iinã.

²¹ Askámaĩnõ yora Yové Koĩni anõka ivo chinãne ikí niayaro, amo chinãvarãya. Aaro awesáma, Yové Koĩmẽsho atõ ikírasĩ ave oĩnõvo iinã”, akĩ Jesusnẽ.

Jesusnĩ João morích akaya ivo yoã

²² Askávai txipo, Jesus ãwẽ shokõkenavonĩ Judeia mainamã iovaĩóvo. Askái ano voshõ yorarasĩ morích akí nii, Jesusro.

²³ Askámaĩnõ Joãonero waka itãtĩpá oĩinã ato askásevi akĩ morích aoki, Enomnamã, Salim orakamasho. Askái ano ã nimaĩnõ, yorarasĩni “nõ inõ”, iinã chinãvaĩvaĩvo.

²⁴ (Aská aatiãro João kepóma.)

²⁵ Aská Joãone shokõkena wetsarasĩ judeu wetsanĩ vatxinanãi, anõ Yové tasati chinãsho txoa ikimẽsho.

²⁶ Askávai txipo ãwẽ shokõkenavõ voshõ João aská akávo. “Yosin ikiyá, Jordão okiri kesó yora mivé niá ivai ivo, mĩ yoãvai ivonã, ãatõ yorarasĩ ato morích akakatá. Aase ashkãsho chinãvaĩvaĩaivo”, akávo.

²⁷ Atõ askámaĩnõ Joãone ato revíníki. “Yora Yové Koĩni ashõasho ikírvi. Ãwẽ aská ashõma ivoro askái shovitĩpá.

²⁸ ‘Earo Cristomarívi, Yové Koĩni “aa vai roa ashõta”, iinã ã oti vevo ea yonomtá’, ikí ẽ vana mã nĩkãvaĩvaĩkatá.

²⁹ Yorarasĩ ashkãsho chinãvaĩvaĩmaĩnõ, ea Jesusmẽ mekíi awesatõrvi iki ea. Aĩya aská chinãtso. Aa aĩvoro aa oĩkatsikiya ivonárvi. Askámaĩnõ oĩkatsikiyatõ avé takéa ivoro anõ naíma. Manái nishõ ãwẽ oá nĩkãi, ãwẽ oi nĩkãi akí anõ mekítirívi, chinãtso. Askái niátõ iki ea.

³⁰ Ãatõ ea tavakétikĩ ẽ iki, earo keyópakekaĩsnõ.

³¹ Askávaíse, aa matxisho oaya ivoro noke ashkã akĩ viakéayarívi. Askámaĩnõ naa mai shavapa yoraro maĩ awerasĩmẽchta vanayai niárvi.

³² Aská matxisho oayatõ ãwẽ oĩya, ãwẽ nĩkãya aká ivo meki tsakaki ato ãwẽ yoãshoasmẽkĩ anõ akama ikívo.

³³ Askámaĩnõ anõ akaya ivoro ‘Yové Koĩ anõserívi’, ikĩ ato oĩmaiya.

³⁴ Aaro awesáma, Yové Koĩni yonoa ivo, ãwẽ vana yoãi niaya, Yové Koĩni Chinã yora akátõ akĩ wachíkima yonoshoaya.

³⁵ Ãwẽ Papa vakemẽ noíkasho, keyokise eneshoa, ãwẽ chinãtõ ‘ave inõ’, iinã.

³⁶ Askásho ãwẽ vake anõ akaya ivoro awetima ikitákatsa. Askámaĩnõ, ãwẽ vake veyãkãya ivoro awetima ikitatĩpá, Yové Koĩni enekima yostaya”, ato akĩ, Joãone.