João 20 - Yové Koĩni Vana

Jesus weníoti ivo yoã

¹ Askávai domingo shavá nakovaĩi vakíchinõse Maria Madalenã Jesus atõ onevainamã kakĩ ã oĩa anõ atõ kepovai shasho ma kepẽnáya meraki.

² Aská oĩinã arimẽse iokaĩsho, Simão Pedro, Jesus anõ noípa ivo yora aká ato yoãshokĩ. “Ãwẽ yora shaká ma viavo! ‘Vivaikĩ atonamã rakãyakĩ’ nõ iki”, akĩ.

³ Ãwẽ aská akatõsho Pedro, Jesus anõ noípa ivo aká ãwẽ onévainamã “nõ oĩnõ”, iinã poshóvo.

⁴ Ravése atõ erémẽkĩ Jesus anõ noípa ivõ Pedro nanã nanãvaĩi aapari nokókaĩi.

⁵ Nokókaĩsho, patápakésho ã oĩa anõ yora rakóvai ivo õpo kashkerasĩchtase masoa meraki, askámẽkĩ wenái eréikóma.

⁶ Ãwẽ askámaĩnõ Simão Pedro atxõse tachikaĩsho tavavaĩse eréikósho õpochtase masoa meraóki.

⁷ Askámẽkĩ ã õpo atõ anõ mapokiri rakovai ivoro katóshose ora masovakĩa.

⁸ Ãwẽ askámaĩnõ aapari onéanamã nokókaĩya ivo eréikoósho aská oĩinã “ii, anõse, weníoai”, ikĩ chinãki.

⁹ (Aaro awesáma, vana neea “aa vopivai weníokatsa”, ikĩ tanama atõ ikõvarãmekĩ anoshorívi tanavo.)

¹⁰ Aská oĩvaí atõ shavapa iovaĩóvo.

¹¹ Askávaĩi atõ vomaĩnõ Maria Madalenaro ãwẽ onéa ikoti veyó nishõ wai ikí. Askái wai ikĩ patápakésho ã oĩa

¹² yonótaya yové ravévakĩ õpo oshoka sawéyavo ãwẽ yora shaká rakávainamã setévo, wetsa ã taekirí, wetsa ã mapokirí ashõ.

¹³ “Awesainã mĩ wai ikírá, aĩvó?” akĩ atõ nĩkãatõsho, “ẽ Yora Ivo ea viãkãaivo. ‘Atonamãrmẽ rakãyã’ ẽ iki”, ikĩ ato revívaíki

¹⁴ patákekíse Jesus niá oĩsmẽinã onãma.

¹⁵ Ãwẽ askámaĩnõ “awesainã wai ikí mĩ ikí, aĩvó? Tsoa mĩ itimáara?” ãwẽ akátõsho, ãatõ chinãkiro “wai vesoya”, ravãki anõ eséyakĩ revíki. “Yora mĩ viá ivoro ea yoitso, ẽ vivaĩtanõ”, ãwẽ akátõsho

¹⁶ “Mariá!” ãwẽ akátõsho vesokeósho Hebraicõ vanã iinái. “Raboní!” akĩ. (“Raboni” ikíro, “yosin ikiya”.)

¹⁷ Ãwẽ askámaĩnõ, “ase, inokakĩ ea atxiroa! Aaro awesáma, ẽ papanamã ea kaamashõ ẽ ikí, askámaĩnõ miãro ẽ shokõkenavo ato yoãshotã. ‘“Ẽ papa, matõ papakeóa ivo, ẽ ravia ivo Yové, mã ravikeóa ivo akánamã ẽ kakatsai”, ikikatá’, ato atso”, akĩ.

¹⁸ Ãwẽ aská aka kakĩ nokókaĩki “Yora Ivo ẽ meraai”, iinã ãwẽ yoãshoa ivo ato yoãoshokĩ.

¹⁹ Askái yãtã Jesusnẽ shokõkenavo judeu vevokerasĩ rakéshoinã shovõ kepósho kãtxívo. Atõ askánamãsho Jesusnẽ tachikarãsho ato vana akĩ. “Chinã matsiyai mã shokotikĩra”, ato avaikĩ

²⁰ ãwẽ tsewe meviki, shavãteró aká ato oĩmakĩ. Ato ãwẽ aská aká Yora Ivo merainã mekívãvo.

²¹ Atõ askámaĩnõ, ato vana aoníki. “Chinã matsiyai mã shokotikĩra. Ẽ papã ea yonomtatõsevi akĩ mato ẽ yonoóa”, ato akĩ.

²² Askái anosho ato kocho avai vanai. “Yové Koĩni Chinã toĩkétsoma.

²³ Yora wetsãse mia ichná amaĩnõ ‘ari ea chinãomasnõ’, mĩ ikí ivoro, Yové Koĩni askásevi akĩ ato chinãoshoama ikatsai. Askámaĩnõ ari mã chinãsro, ãatõ askásevi akĩ ato chinãoshókatsai”, ato akĩ.

²⁴ Askái ano nishõ ãwẽ shokõkena wetsa Tomé, “Ravé Pakéa” atõ aká ivo manoki.

²⁵ Askáwani ã kaa txipo, ãwẽ tachikarãmaĩnõ yoãshoávo. “Yora Ivo nõ oĩai”, atõ akátõsho, “ii, ã mevi ravõ retévai tsewerasĩ oĩi, meei, ã shavãtero tsewe meeói, ẽ akáma ivoro ea anõ akatĩpá”, ato akĩ.

²⁶ Askávai 8 shavá tavákeanamãsho ashkãse kãtxíovo, askámaĩnõ aatiãro Tomé pashkákeóma. Aská katsése kepóketanáyamẽkĩ Jesus tachikarãósho atonĩ vanaóki ato aská akĩ. “Chinã matsiyai mã shokotikĩra”, ato avaikĩ

²⁷ Tomé vana akĩ. “Ẽ mevi oĩi, meei ẽ shavãtero meeói arí. ‘Yoã taná’ iroa, ea anõ atso”, akĩ.

²⁸ Ãwẽ aská akatõsho, “Yora Ivó, mia Yové Koĩ, ẽ ravia ivo!” akĩ.

²⁹ Ãwẽ askámaĩnõ, “miãro oĩsho ea mĩ anõ akárvi, askámaĩnõ ea oĩmamẽkĩ ea anõ akayavorasĩro, roã pakékésho shokokatsavo”, akĩ.

³⁰ Aská Jesusnẽ ãwẽ shokõkenavo, yové ashõ õsi õsipa akĩ ato oĩmayatá, askámẽkĩ naaivo papírinĩ katsékase wichátáma.

³¹ Askámaĩnõ naa wicháro “Jesusro Cristotserã, Yové Koĩni vakesevitserã”, ikĩ chinãinã mã anõ anõ iinã wichámtá. Aská ivo anõ ashõ mã awetimati.