João 18 - Yové Koĩni Vana

Jesus kepóti ivo yoã

¹ Askái Yové Koĩnĩ vanai mashtékaĩvaí, Jesus ãwẽ shokõkenavonĩ mató sapaka Cedrom ivo pokevaĩi amari kesó wai rakáanamã kaí.

² (Aská Judas yomẽ akaya ivõ oĩyasevi ano. Aaro awesáma, ano Jesus ãwẽ shokõkenavonĩ kãtxíi võ võmtsãwavo.)

³ Aská Judas “aa meranõ”, iinã waikiri ãwẽ kakatsimaĩnõ, Yové Koĩ ato vana ashõya kakáyavorasĩ, fariseurasĩ aatíisho “avé votãna”, iinã atõ teske akayavorasĩ, romano teske akayavorasĩ aká ato yonoatõsho amo, amo shekó, atõ toĩti aká vivaini avé voávo.

⁴ Atõ askámaĩnõ, Jesus askákatsa ivo arí tanaski, aská akĩvisi atõ veyavarãmaĩnõ ato nĩkãki. “Tsoa mã itimárkĩ”, ato akĩ.

⁵ Ato ãwẽ aská akátõsho “Jesus, Nazaré yora”, imaĩnõvo, “easekatá”, ato akĩ. (Aská Judas, aa yomẽ akaya ivo atonĩse.)

⁶ Askáki “easekatá”, ato ãwẽ akátõsho txichtikiri ivaĩi, maĩ para ikí voávo.

⁷ Askámaĩnõ Jesusnẽ ato nĩkãnióki. “Tsoa mã itimárkĩ?” ato ã akátoshõ, “Jesus, Nazaré yora”, akĩ revínióvo.

⁸ Atõ askámaĩnõ “mato mã ẽ yoãshoakatá ‘easekatá’, iinãnã. Ea itimai mã shoko taíse. Askáinãro naarasĩro meskotsomároa, ave votãnõvo”, ato akĩ.

⁹ (Askái ãwẽ vanaro ãwẽ vanavai keská nokói ãwẽ ikí, “ea mĩ eneshoarasĩ wetsachta ea pashkama”, ivai.)

¹⁰ Askáki anosho Simão Pedro, ãwẽ kewã tsekanivaíki, Yové Koĩ ato vana ashõya kakáyapatõ yonoa yora, Malco mekiri ã pãtxo shateki.

¹¹ Ãwẽ askámaĩnõ Jesusnẽ Pedro aská akĩ. “Mĩ kewã roa arí! Ẽ papã ‘mĩ askái onís awekatsa’, ea ati keskái ẽ ikírvi”, akĩ.

¹² Askánamãsho judeurasĩni teske akayavorasĩ, romanonarasĩ, atõ yonoya aatíisho, Jesus atxivaíki neshavo.

¹³ Askáki Anás, Caifásnẽ rayósenẽ shovonamãpari vivaĩvo. Caifásro aatiã Yové Koĩ ato vana ashõya kakáyapa niakeaya.

¹⁴ Aaivo Caifásro judeu vevokerasĩnĩ vanaya, “yora westíse ashkãmẽsho ikí ãwẽ vopiro roapáse”, ichĩya ivo.

¹⁵ Askái Simão Pedro, ãwẽ shokõkena wetsa aká Jesustxõvaĩvo. Naa ãwẽ shokõkena wetsaro Yové Koĩ ato vana ashõya kakáyapatõ oĩya. Askáshovisi Jesusnĩ aaivo kenéyatõ avé ãwẽ eréikorívi.

¹⁶ Askámaĩnõ Pedroro ikoti veyó kepoti kesó manái ãwẽ nimaĩnõ ã shokõkena wetsa ivõ kepoti vesoya aĩvo ãwẽ tanamatõsho Pedro eréikomakĩ.

¹⁷ Aská avaikĩ aa nĩkãki. “Mianã aa yorã shokõkenamarívirá?” akĩ ãwẽ nĩkãatõsho, “ea aamarívi”, akĩ.

¹⁸ Askái matsika tanainã ano mee ishõyavorasĩ, judeu teske akayavorasĩ aká txĩi iomaĩnõ Pedro atonĩ nioa.

¹⁹ Askái ano atõ shokomaĩnõ, Yové Koĩ ato vana ashõya kakáyapatõro, “mĩ shokõkenavo tsoarasĩrá? Awesatõ yorarasĩ mĩ yosĩvaĩvaĩa”, ikĩ Jesus nĩkãi tsaóa.

²⁰ Aská akĩ ã nĩkãatõsho Jesusnẽ revíki. “Yorarasĩ onéchtasho ea ato yosĩma ikaikaina. Noke Judeurasĩ anõ nõ kãtxía ivo sinagogarasĩ, Yové Koĩni shovo, akánamãsho ato ẽ yosĩvaĩvaĩrívi. Oné ivo pãtekéki ato ea yoãshoama ikaikainákatá.

²¹ Askámẽkĩ awesainã ea mĩ nĩkãará? Yorarasĩ ẽ vana nĩkãvaĩvaĩyavo ato nĩkãtso. Atovõro tanakoĩki tanaaivo ẽ yoãvaĩvaĩarasĩ”, akĩ.

²² Ãwẽ askái vanamaĩnõ, judeurasĩni teske akaya wetsã kesó nishõ Jesus tãpást akí askái. “Yové Koĩ ato vana ashõya kakáyapanĩnã askái vanativísirorá?” ãwẽ akátõsho

²³ “ẽ ichnái vanamaĩnõro meki tsakaki yoãta. Awesakĩ ea mĩ tãpást akárkĩ, anõpai ẽ vanamẽkĩnã?” akĩ.

²⁴ Askámaĩnõ Anásnẽ Jesus meneshméyase “Caifásnamã ewevaĩtana”, iinã yonoki, Yové Koĩ ato vana ashõya kakáyapa ivonamã.

²⁵ Aská Simão Pedro ano txĩi ioi ãwẽ nimaĩnõ, nĩkãvo. “Mianã Jesusnẽ shokõkenavo yoramarívirá?” atõ akátõsho “eamarívi”, ato akĩ.

²⁶ Ãwẽ askámaĩnõ Yové Koĩ ato vana ashõya kakáyapatõ yonoa wetsa, ã pãtxo shatẽa ivõ wetsamatõ Pedro nĩkãóki. “Mianã wai matxi avé niá ẽ oĩa ivomarívirá?” ikĩ ãwẽ nĩkãoa

²⁷ ãwẽ yoá iomaĩnõse takare keóinái.

Pilatosnamã Jesus atõ ewevaĩti ivo yoã

²⁸ Askái shavá mashtévakĩmaĩnõ, Jesus Caifásnẽ shovõsho ewevaĩvo, Romano kakáyarasĩ anõ kãtxía ivonamã. Askávaĩi voí judeu vevokerasĩ shovõ eréikoma ikívo. Aaro awesáma, “nokẽ esé tavámakĩ, Yové Koĩ tasatĩpásho Páscoa saí itĩ ikĩ nõ piamamísi”, iinã.

²⁹ Askáinã romano kakáya wetsa Pilatosnẽ kayakaĩsho ato nĩkãki. “Esé awesa ivo tavámashõ ãwẽ nimaĩnõ mã ewevarãará naa yoranã?”

³⁰ Ato ãwẽ akátõsho revívo. “Ichnátõ itãimai ãwẽ niáma ivoro, neskákĩ mia noke ewevarãshoama ikenkeãai”,

³¹ atõ imaĩnõ Pilatosnẽ ato aská aoki. “Askáro ewevaĩtana, matõ esepa arína”, ato ãwẽ akátõsho “matõ esékiri chinãsho nokẽkaro noke yamamatĩpá, mato romanorasĩnivísi arína”, akávo.

³² (Askái atõ vanaro ãwẽ vanavai keskái nokói, “ẽ neskái vopikatsa”, iinã.)

³³ Askái Pilatosnẽ arimẽse kakáyarasĩ anõ kãtxia shovõ eréikoósho, Jesus kenavaíki nĩkãki. “Mianã judeurasĩni kakáyará?” akĩ.

³⁴ Ãwẽ aská akátõsho Jesusnẽ revíníki. “Mĩ askái vananã mirí mĩ ikíserá? Yora wetsarasĩni mia yoãshoatõsho mĩ ikímará?” akĩ.

³⁵ Ãwẽ aská akátõsho Pilatosnẽ revíki. “Eanã judeurá? Miapa yora, Yové Koĩ ato vana ashõya kakáyavorasĩ aatíisho, ea mia eneshoi veavo. Mĩ ato awesá akatõsho atõ ikírá?” ãwẽ akátõsho

³⁶ Jesusnẽ revíníki. “Naaivo mai shavapa kakáya ivomarívi ea. Naa ivo mai shavapashõ kakáyai ẽ niáro aská, ẽ shokõnavo enõsho ikĩ, judeu yorarasĩ ea atximama ikenkeãaivo. Askáshovísi ea neno aaivo kakáyamarívi”, akĩ.

³⁷ Ãwẽ askámaĩnõ “askáro mianã kakáyará?” akĩ ãwẽ nĩkãoatõsho “miãrvi ‘kakáyá’, ea mĩ aka. Askámaĩnõ ‘anõpa ivo vana yoãnoshõ’, iinã oshõ ẽ pakémtárvi. Askái aaivo vana nĩkãsho ea anõ amískavo”, akĩ.

³⁸ Ãwẽ askámaĩnõ “awerkĩ, anõka ivo vananã?” aoki. Askái vanavai judeu vevokerasĩ shokoanamã iokaĩósho ato yoãoshokĩ. “Aa yora ãwẽ ichnátanáchta yama.

³⁹ Askámaĩnõ kepóya wetsa mato kepẽshoi ẽ avaivaina Páscoa saí itĩ ikí ivo shavapa. Askásho ‘judeurasĩni kakáya’, mã aká ivo mato kepẽshopá?” ato ãwẽ akátõsho

⁴⁰ oii shokonívo. “Aama, aaivoma. Barrabás ivo noke kepẽsho”, akávo. (Barrabásro yora ati akayarívi.)