João 16 - Yové Koĩni Vana

¹ Askávai vanainaói. “Askárasĩ mato ẽ yoãshoáro txipo anõ mã iyamamísi iinã mato ẽ yoãshoávere.

² Sinagoga shovõsho mato poshakõkatsavo. Askávaíki neská ivo shavá nokóki yora wetsã mato yamamashõ chinãki ‘Yové Koĩni chinãnevísi nõ ikí’, ikatsaivo.

³ Atõ askáro ẽ papa oĩma, ea oĩma akásho atõ ikí ikatsai.

⁴ Neskái ẽ vanaro aaivo shavá nokómaĩnõ anosho ‘aská akĩ noke vevo tanamachĩtserã?’ ikĩ mã chinãnõ iinã mato ẽ yoãshoávere. Akĩvísi mato ẽ yoãshoáma ichĩro ‘matonĩse ẽ niátserã?’ iinã ea mato yoãshoáma ichĩa.

⁵ Ramaro ea yonochnayanamã ẽ kakatsi imaĩnõ, wetsã ea nĩkãki ‘ato mĩ kakatsikírkĩ?’ ea mato akámakarkĩ?

⁶ Askámẽkĩ, neská akĩ mato ẽ yoãshoatõsho mato onísvarãi taíse.

⁷ Askámẽkĩ neskávere. Ẽ kaavísiro roaka. Ẽ kaamaro mato vesoshokatsayatõ chinãvarãtĩpá. Askámaĩnõ ẽ kaaro aa mato ẽ yonoshokatsai.

⁸ Ãatõ oshõro neno mai shavapa yorarasĩ anõ itima ivõ atõ imaĩnõ, aaivorasĩ anõ amai, chinã mekika ivorasĩ meramaí, Yové Koĩni yosta ivo shavá chinãmaí, akatsai.

⁹ Atõ anõ itima ivoro awesáma, ea anõ amísmavosho atõ ikí iinã oĩmakatsai.

¹⁰ Atõ chinã mekika ivo, awesáma, ẽ papanamã ẽ kaatxinĩ ea mato oĩoma ikatsai iinã ikí.

¹¹ Askámaĩnõ yosta ivo shaváro awesámásevi, naaivo mai shavapa niaya kakáya Yové Koĩni ‘ẽ yostanõ’, ikĩ ma chinãshoa.

¹² Aská mato ẽ yoãshoti vana itãtĩpa ayamẽkĩ mato tenetĩpá rama.

¹³ Askámaĩnõ Yové anõpa yosĩya ivo oshõro ãatõse anõpa ivo katseki mato imakatsa. Arí ãwẽ yoãnakatsamarívi, ẽ vana katseki ãwẽ nĩkãvaĩvaĩa ivo, ikatsai ivorasĩ aká mato yoãshokatsai.

¹⁴ Ẽ yosĩa ivorasĩ teki akĩ mato yoãshokatsai. Anõsho yorã oĩtati ivo ea shovimakatsai.

¹⁵ Ẽ papa katsése ayaro enáserívi. Askáshovísi ‘ẽ yosĩa ivorasĩ teki akĩ mato yoãshokatsai’, iinã ẽ ikírvi.

¹⁶ Aská aatishõkamase mato ea oĩoma ikatsai. Askávaíki aatishõkamásevi ea mã meraókatsa”, ato akĩ.

¹⁷ Ãwẽ askái vanamaĩnõ ãwẽ shokõkenavo arímamẽ vanaketanávo. “‘Aatishõkamase mato ea oĩoma ikatsai’, askávai ‘aatishõkamásevi ea mã meraókatsa’, ikí ‘ẽ papanamã ẽ kakatsaisho ẽ ikí’ ioi ãwẽ akánã awesainã ãwẽ ikírkĩ?

¹⁸ ‘Aatishõkamase’, ikí askásevi, noke tanamakatá askái ãwẽ vananã”, ikívo.

¹⁹ Aská akĩ atõ nĩkãtsiki tanainãse vanainaói. “‘Aatishõkamase mato ea oĩoma ikatsai’, askávai ‘aatishõkamásevi ea mã meraókatsa’, ikí nĩkãinã mã vanaketanaa ivoro

²⁰ neskávere nĩkãtsoma. Ẽ ikatsai ivokiri chinãki, naaivo mai shavapa shokoyavorasĩro mekíkatsavo, askámaĩnõ matoro wai ikí mã onískatsa. Askámẽkĩ txipo rona petxĩsho mã metsái shokokatsa.

²¹ Aĩvo ãwẽ vake pakékatsa shavá omakaĩmaĩnõ isĩ tanamtsãwã, askámaĩnõ ãwẽ vake pakéa tavákemaĩnõro isĩ tanaósma, anõ mekímtsãwã ‘vake ẽ meraai’, iinã.

²² Aská mato mã aa ikítõsevi mã ioi, onísi shokoi. Askámaĩnõ txiporo aská, mato ẽ oĩomaĩnõ, mã mekíkatsa. Aa metsá yora wetsã mato enématĩpa ikatsai.

²³ Aatiã shavaparo txipokiri mato ea yokáoma ikatsai. Neskávere nĩkãtsoma, enõsho ẽ papa mã yokáatõsho ãatõ mato inãkatsa.

²⁴ Enõsho mato yokak ikíma ikaikaina. Yokátsoma. Ramaro mato ashõkatsa, mã metsá anose kesonõ iinã.

²⁵ Vevoro tanáki mato ẽ yoãshovaivaina, askámaĩnõ txiporo tanáki mato ea yoãoshoama ikatsai. Aatiãro roaka akĩ ẽ papa mato yoãshonõ.

²⁶ Aatiãro enõsho mã yokákatsa. ‘Eã ẽ papa mato ẽ yokáshokatsai’, iinã ẽ ikíma.

²⁷ Aaro awesáma, aa ẽ papa matomẽ noíka, enõ mã noíkasho ãwẽ ikí, ‘Yové Koĩmẽsho ẽ oá’ ikĩ mã anõ akí aká.

²⁸ Ẽ papamẽsho oí naaivo mai shavapa ẽ nipái oyãtá. Askámaĩnõ, ramaro mai shavapa yorarasĩ eneníi arimẽse ẽ papanamã ẽ iokaĩókatsa”, ato akĩ.

²⁹ Ãwẽ askámaĩnõ ãwẽ shokõkenavõ revínívo. “Ramaro tanáokima meki akĩse mĩ yoãmaĩnõ

³⁰ mia nõ tanaai. Katsése aská tanayasho mĩ yoãmaĩnõ wetsã ano ‘awesárá?’ ikĩ nĩkãtĩpá. Askáshovísi ‘Yové Koĩmẽsho oáserívi’, ikĩ mia nõ anõ aka”, akávo.

³¹ Atõ aská akatõsho ato revíníki. “Ramarvi ea mã anõ aka?

³² Askámẽkĩ nĩkãtsoma, mã anõ peás ikatsai shavá omakaĩma, ma nokóai. Matõ shavátikéki erí nitxĩsho ea mã enekatsa. Askámẽkĩ ea eríchtamarívi. Ẽ papã ea peshót asai.

³³ Aská akĩ mato ẽ yoãshoáro anõsho mã chinã matsiyai shokonõ iinã mato ẽ yoãshoávere. Naaivo mai shavapashõ mã onís awekatsa, askámẽkĩ rakétaníma shokotsoma. Naa mai shavá ma ẽ viakea”, akĩ ato tanamakĩ.