João 14 - Yové Koĩni Vana

¹ Askávaíki ato vana aoki. “Chinã tsakapa itsomároa. Yové Koĩ anõ akí, ea anõ akí atsoma.

² Ẽ papã shavánamã anõ niti ãtsaka aya. Mato ẽ kashma ashõi kakatsai. Ano aská yama ivoro mato yoãshokenkeãai.

³ Ano kashõ shavá mato kashma ashõtani okĩ mato ẽ kawii okatsai, evé mã shokonõ iinã.

⁴ Aaivo vairo mã tanasai”, ãwẽ imaĩnõ,

⁵ Tomepa revíki. “Yora Ivó, mĩ kakatsainamã noke tanama. Vai aweshõkata nõ tanaikĩ?” ãwẽ akátõsho,

⁶ Jesusnẽ revíki. “Eatsikĩ vai, anõpa ivo vana, awetima chinã ivo akánã. Eamaro, ẽ papanamã yora nokótĩpá.

⁷ Onãtakĩ ea mã oĩro ẽ papa askásevi akĩ mã onãkeãai. Ramaro tanaki mã oĩai”, ãwẽ imaĩnõ,

⁸ Filipenĩ nĩkãki. “Yora Ivó, mĩ papa noke oĩma, oĩvaíkarvi nõ enénõ”, ãwẽ akátõsho,

⁹ “ramamarívi matonĩ ẽ nikaikainamẽkĩ eanã mĩ onãtakĩ oĩmarvirá Filipé? Ea oĩya ivoro ẽ papa ãwẽ oĩyaserívi. Awesainã ‘mĩ papa noke oĩma’, mĩ ikíra?

¹⁰ Ea ẽ papanĩ txiwánanãsho nõ shokoa ivo mia anõ akámará? Vanarasĩ mato ẽ yoãshoa enámarívi, ẽ papa enõ niá ivo, ãatõ akárvi, askárasĩ mee iki.

¹¹ Ea anõ atsoma ‘ea ẽ papamẽ txiwásho ẽ niá’, ẽ imaĩnõ. Aská ivo anõ ayamakĩro, ẽ yové akarasĩmẽchtasho ea anõ atsoma.

¹² Neskávere nĩkãtsoma. Yora ea anõ akaya ivõro ẽ mee iti keskásevi akĩ aokatsa. Naaivo keskáchtama, tavákepa akatsai. Tavákepa akatsairo awesáma, earo papa tavá ẽ niakei kakatsaisho ikí.

¹³ Askámaĩnõ, katsése ẽ anemẽsho mã yokámaĩnõ mato ẽ ashõkatsa, enõsho ẽ papa yorã oĩtati ivo ave shovinõ iinã.

¹⁴ Askávere, wetsase ẽ anemẽsho mã yokámaĩnõ mato ẽ ashõkatsa.

¹⁵ Askávai enõ noíyashoro ẽ esé vanarasĩ roaka akĩ mã toĩkatsa.

¹⁶ Askáki ẽ papa ẽ yokáatõsho ãatõ mato vesoshokatsaya mato eneshokatsai, askatase mato ave peshót anõ iinã.

¹⁷ Aaivo mato vesoshokatsayaro Yové Koĩni Chinã, Yové Koĩ anõpakĩ tananõvo iinã ashõya ivo. Askámaĩnõ, naaivo mai shavapashõ yorarasĩni anõ mekítĩpá, oĩki tanamasho atõ ikí. Askámaĩnõ matõro mã oĩya. Aaro awesáma, matonĩse niá, txipo mato peshót ashõse niokatsa.

¹⁸ Vake maõ shokõsho eneatõ ea mato akátĩpá. Arimẽse matomẽsho ẽ iokarãókatsa.

¹⁹ Shavá aatiimáse yorarasĩni ea oĩóma ikatsaivo askámaĩnõ matõro ea mã oĩskatsa. Vopivai ẽ nioinaómaĩnõ enõshorívi mã awetima shokokatsa.

²⁰ Aatiã shavaparívi onãtakĩ ea mã oĩkatsa, ‘ea ẽ papamẽ txiwásho nii, matonĩ txiwánanãsho nii aká’ iinã.

²¹ Aská enõ noíyaro ẽ esé vana roaka akĩ toĩi, ẽ vana anõ akí ashõ nikatsai. Aa enõ noíyaro ẽ papa anõ noíokatsa. Ea askásevi anõ noísho aa ẽ meramakatsai”, ato akĩ.

²² Askái ãwẽ vanamaĩnõ Judasnẽ revíki, Iscariotes Jesus yomẽ akaya ivomavere. “Yora Ivó, awesainã ashkã akĩ ato meramáma, nokechtase mĩ meramakatsikírá?” ãwẽ akátõsho,

²³ revíníki. “Yora enõ noíya ivõro ẽ vana anõ akatsai. Aaivo yora ẽ papa anõ noímaĩnõ chinãvarãsho ãwẽ chinãnamã nõ shaváyakatsai.

²⁴ Askámaĩnõ yora enõ noíma ivoro ẽ vana anõ amísma. Neská vanarasĩ mato ẽ yoãshoa mã nĩkãvaĩvaĩa ivo enárasĩmarívi, ea yonomtáya ẽ papã vanarvi.

²⁵ Neskái matonĩ nishõse vana aská mato ẽ yoãshoá.

²⁶ Askámaĩnõ mato vesoshokatsaya, Yové Koĩni Chinã ivo, ẽ papã ẽ anemẽsho mato yonoshoatõsho katseki mato yosĩkatsa. Ãatõse mato ẽ yosĩvaĩvaĩa ivo vanarasĩ mato chinãmakatsai.

²⁷ Chinã matsi enõsho oá ivo mato ẽ eneshoa, naaivo mai shavapashõ yorã akátõ akĩma. Askáinã rakéi chinã tsakapase itsomároa.

²⁸ ‘Ẽ kaasmẽkĩ arimẽse ẽ iokarãókatsa’, iinã mato ẽ yoãshovaitĩ. Askásho, enõ noíyashoro ẽ papanamã ‘ẽ kakatsai’, ẽ imaĩnõ mã mekíkeãai, ẽ paparo ea vevokepásho.

²⁹ ‘Askákatsa’, ikĩ ramase mato vevo ẽ yoãshoávere, anõkaĩsmaĩnõ ea mã anõ anõ iinã.

³⁰ Inokai matonĩ vanatĩpá ea. Aaro awesáma, naaivo mai shavapa niaya kakáya oa. Ãatõchta viakeatĩpá ea.

³¹ Aská naa mai shavapashõ yorarasĩni ẽ papamẽ ẽ noíya ave onãtakĩ oĩnõvo iinã ea ãwẽ yonoatõ akĩse ẽ aká. Askámaĩnõ ramaro shokonína, nõ vonõ”, ato akĩ.