João 13 - Yové Koĩni Vana

Jesusnẽ ãwẽ shokõkenavo atõ tae txoa ati ivo yoã

¹ Aská Páscoa saí iki ivõ atõ ikatsai omakaĩmaĩnõ Jesusnẽ naa ivo mai shavá eneníi ãwẽ papanamã ãwẽ iokaĩkatsa shavá nokóa tanaski. Naaivo mai shavapashõ anõ akayavorarasĩ atomẽ noí nishõ mashtéki ato oĩmakĩ.

² Aská ãwẽ shokõkenavonĩsho yamé atõ pikatsikí. Aská Judas Iscariotes, Simão vake ivoro yochĩ ichnátõ kakáyã ãwẽ chinãne ma imakéya, Jesus yomẽ ati chinãki.

³ Askámẽkĩ Jesusnẽro ãwẽ papã katsése ãwẽ weeyakĩ nitxĩa tanasi, Yové anõsho ãwẽ oá tanasi, arimẽse ãwẽ iokaĩókatsa tanasi akĩ.

⁴ Askánamãsho weníinakíse õpo anõsho kawãa ãwẽ sawea ivo kochakéi, avaikĩ raskíti ninivarãvaí anõ yaneshmekaĩi avaikĩ

⁵ kẽtxapa wakapasha manevaíki ãwẽ shokõkenavõ tae ato txoa apavaíki ãwẽ anõ yaneshméa raskítinĩse ato toshkopakéki.

⁶ Askáki Simão Pedro ivo ãwẽ tae ãwẽ txoa akãtsikitõsho “Yora Ivó, ease mĩ tatxó aokatsikírá?” ãwẽ akátõsho,

⁷ “ẽe, ẽ neská aká rama mia tanama. Txiporvi mĩ tanakatsa”, ãwẽ akátõsho,

⁸ “earo mĩ tatxó akatĩpávere”, ãwẽ imaĩnõ “ea mĩ tatxó amama ivoro mia evé niótĩpávere”, akĩ.

⁹ “Askáinãro ẽ tae westíse ea tatxó akáma. Mevikiri ea mepãi, matxó akí ea atso”, ãwẽ aoatõsho,

¹⁰ “yora nachia venáro txochtamarívi, ãwẽ taese tatxó ikírvi. Mato ravéro txochtama askámẽkĩ katsékasema, wetsachta ayase”, ato akĩ.

¹¹ Jesusnẽ ãwẽ yomẽ akatsaiya tanainãvísi “txochtamaro katsékasema, wetsachta ayase”, iinã ãwẽ ikírvi.

¹² Aská akĩ ãwẽ shokõkenavo ato tatxó apavaíki arimẽse ãwẽ õpo anõsho kawãa ivo saweniovaí mesa kesó tsaópakeósho ato nĩkãki. “Mã tanaai, mato ẽ neská akánã?

¹³ Matõ ea onãki ‘yosin ikiyá, Yora Ivó’, akĩ ea mã kenavaĩvaĩa. Anõ akĩse ea mã anõ kenarívi, earo aase.

¹⁴ Ea Yora Ivo, yosin ikiya akásho mato ẽ tatxó amaĩnõ marí askánanãseviótsoma.

¹⁵ Mato ẽ aská ashõa ivo, txipo marí mã askánanãseviónõ iinã ẽ akávere.

¹⁶ Neskávere nĩkãtsoma. Mee ishõyaro ãwẽ ivo tavakésmarvi chinãtso. Yora yonótaya askásevi, aa yonoya tavakémasevi.

¹⁷ Ramaro neská vanarasĩ tanasho askátõ mã ikíro roã pakékésho shokokatsavo.

¹⁸ Askámẽkĩ mato katsékase yoí ẽ ikímavere. Ẽ kavẽa ivorasĩ onãtakĩse ẽ oĩai. Askámẽkĩ vana neea yoãna ivo ave nokónõ iinã ikí, ‘evésho pão piaya ivo yorase eki vesokékatsaya’, iti neea keskái.

¹⁹ ‘Askákatsa’, ikĩ ramase mato vevo ẽ yoãshoávere, anõkaĩsmaĩnõ ‘Earo Earvi’, ikĩ tanaki mã anõ anõ iinã.

²⁰ Neskávere nĩkãtsoma. Yora wetsa ẽ yonoa yoramẽ ãwẽ mekía ivoro enõ ãwẽ mekíaserívi. Aská yora wetsa enõ mekíoa ivoro ea yonoyamẽ ãwẽ mekíosevirívi aká”, ato akĩ.

²¹ Askái vanavaí naípakĩ chinãi nishõ ato yoãoshokĩ. “Neskávere nĩkãtsoma. Mato wetsãse ea mã yomẽ akatsai”, ato akĩ.

²² Ãwẽ askái vanamaĩnõ ãwẽ shokõkenavo arímamẽ oĩnanãketanávo, “tsoa yoí ãwẽ ikírmẽ”, iinã.

²³ Askái wetsa, Jesus anõ noíka ivo tava ãwẽ tsaómaĩnõ,

²⁴ Simão Pedro ivõ aa oĩtavaikĩ “nĩkãta, tsoa yoí ãwẽ ikírki?” ikĩ ãwẽ vero oĩmatõsho,

²⁵ Jesus tashnákaĩsho nĩkãki. “Yora Ivó, tsoa yoí mĩ ikírkĩ?” ãwẽ akátõsho

²⁶ “kẽtxapa pão kashke metxá ashõ ẽ inãkatsa ivovere”, akĩ. Askátakĩse pão kashke metxá avaikĩ Simão vake Judas Iscariotes inãki.

²⁷ Askámaĩnõ Judasnẽ pão aská akĩ ãwẽ viánamãshóse Satanásnẽ tasavarãki. Ãwẽ askámaĩnõ Jesusnẽ “rayá mĩ chinã ivo mashtétso”, ãwẽ aká nĩkãinã,

²⁸ avé mesã kãtxíyavõ “awesainã ãwẽ akárkĩ?” ikĩ chinãinã ashkãshóse tanama ikívo.

²⁹ “Judasro kopímati vesoyatserã”, ikĩ chinãsho wetsã chinãkiro “piá vitã, saí ikinamãsho piti”, ikiravã akí, iokiro “yora onís aweyavorasĩ ato inãta”, ãwẽ ikiravã aoi akávo.

³⁰ Aská akĩ pão ãwẽ inãa, ichnákise pivaí kaí. Anoro ma yamé semekéya.

³¹ Judas askákaĩmaĩnõse Jesus askái vanai. “Ramaro ‘Yorã Vake’, ikí anéa ivo yorã oĩtati ivo shovikatsa. Anõshósevi Yové Koĩ askásevi shoviókatsa.

³² Aská Yové Koĩ yorã oĩtati ivo enõsho shovia ivoro, ãatõ ea askásevi akĩ ato oĩmaoa omakaĩai.

³³ Vakerasĩní, matonĩ inokai ea niáma ikatsai. Ea mã itimakatsai. Judeurasĩ ẽ tanamavai ivo mato ẽ yoãoshoávere. ‘Ea ẽ kakatsainamã mato voátĩpá’, ẽ ivaitĩ.

³⁴ Aská rama ‘neskátsoma’, ikĩ vana vená mato ẽ eneshoá. Noínanãi shokotsoma. Neskái matomẽ ẽ noíatõ ikĩ noínanãótsoma, marí.

³⁵ Askái marí noínanãsho mã shokomaĩnõro ãwẽ shokõkenavo ‘anõse’, ikĩ mato onãtakĩ oĩkatsavo”, ato akĩ.

³⁶ Ãwẽ askámaĩnõ, Simão Pedrõ nĩkãki. “Yora Ivó, atonamã mĩ kakatsikírá?” ãwẽ akátõsho “ẽ kakatsikinamã ramachta evé mia kaatĩpá. Txiporvi mĩ kakatsai ano”, ãwẽ imaĩnõ

³⁷ Pedrõ arimẽse nĩkãnióki. “‘Ramachta mivé ea kaatĩpáro’ awesásho ikírá? Minõsho ẽ vopia roaserívi”, ãwẽ akátõsho

³⁸ “askárá? Evé mĩ vopikatsikirá? Neskávere nĩkãtso. Takare keókatsa vevo, 3tíi ‘ẽ oĩmarvi’, ikí mĩ yoá ikatsai”, akĩ.