João 11 - Yové Koĩni Vana

Lázaro vopiti ivo yoã

¹ Aská yora Betânianamã niaya, ãwẽ anero Lázaro isĩ tenei. Ãwẽ aweshavovoro Maria, Marta aká.

² (Aaivo Mariaro isĩ teneyatõ take, ene inĩkatõ Jesusnẽ tae voivaíki ãwẽ võose toshkoya ivo.)

³ Askáki ãwẽ aweshavovõ Jesus aská akĩ vana yonoshoávo. “Yora Ivó, mĩ anõ noíka ivo isĩ teneai”, atõ ikí nĩkãinã

⁴ askái vanai. “Isĩ teneai ãwẽ askámẽkĩ vopima ikatsai. Anõsho ãwẽ aká oĩsho Yové Koĩ ravikatsavo. Askánamãshorívi, ãwẽ vake askásevi aokatsavo”, ikí.

⁵ Aská Jesus, Marta, Maria, Lázaro akámẽ noíkamẽkĩ

⁶ ato rayá chinãvaĩma. Ãwẽ niánamãsho shavá ravévakĩ tavái niisi, Lázaro aská kakáa nĩkãsmẽinã.

⁷ Askávaíki ãwẽ shokõkenavo txipo ato aská akĩ. “Arimẽse Judeiakiri nõ iovaĩónõ”, ato ãwẽ akátõsho

⁸ “yosin ikiyá, ramapase judeu vevokerasĩni shashõ tsakaki mia yamamakatsívaivomẽkĩ arimẽse mĩ iokaĩkatsikírkĩ?” atõ akátõsho

⁹ ato revíki. “Varikawãa westíkase 12 horastserã? Variké yora niáro oshkorósma, naaivo mai shavapa amo naopa niásho.

¹⁰ Askámaĩnõ yamé niáro oshkoromtsãwa, amõ naó yamasho”, atõ akĩ.

¹¹ Askái mashtévaí vanainaói. “Nõ avé takéa Lázaro oshamẽkĩ ẽ vesõi kakatsai”, ato ãwẽ akátõsho

¹² “Yora Ivó, ‘oshaai’, mĩ ikí roase, tãti akatsai”, akávo.

¹³ (Jesus askái vanaro “Lázaro vopiai”, iinã ãwẽ ikí. Askámẽkĩ atovõ chinãkiro “oshaa”, ãwẽ yoãravã akávo.)

¹⁴ Anosho Jesusnẽ meki akĩ ato yoãshokĩ. “Lázaro vopiai.

¹⁵ Ẽ ano niáma ivaisho mekíai ea, anõsho ea mã anõ akatsai iinã. Rama nõ oĩi vonõ, ano”, ato akĩ.

¹⁶ Ãwẽ aská nĩkãinã Tomé, “Ravé Pakéa” ivõ avé yosĩnáya wetsarasĩ akí, “kaõ. Noke yosĩyanĩrvi nõ yamai vonõ”, ato akĩ.

¹⁷ Askái ano nokókaĩsho “Lázaro atõ onevai ma 4 shaváai”, ikí nĩkãki.

¹⁸ (Betâniaro Jerusalém orakama, 3 quilômetropáchta tanáti.

¹⁹ Askásho judeurasĩni Martanĩ Maria onísmaĩnõvo atõ ronaa tãti amai ano kãtxívo.)

²⁰ Askánamãsho Marta “Jesus oa”, ikí nĩkãinã veyai kaí. Askámaĩnõ Mariaro ano shovõse.

²¹ Askákaĩi kakĩ Martã Jesus nokovaĩsho aská akĩ. “Yora Ivó, mia nenose mĩ niáro ẽ take vopima ikenkeãvai.

²² Askámẽkĩ miã Yové Koĩ mĩ tanamáa ramase katsése mia ãwẽ ashõkatsa ẽ tanasai”, ãwẽ akátõsho

²³ “mĩ take nioinaókatsa”, ãwẽ imaĩnõ

²⁴ “ẽe, aaro ẽ tanasai, enékaĩa shavapa weníokatsarvi”, akĩ ãwẽ revíatõsho

²⁵ “eatsikĩ, wenímaiya, awetima akaya akánã. Ea anõ akayaro vopismẽinã weníokatsa.

²⁶ Askái ea anõ akí niayaro, veítĩpá. Neská ivonã mĩ anõ atirá?” ãwẽ akátõsho,

²⁷ “Yora Ivó, miaro Cristo ẽ tanai, Yové Koĩni vake naaivo mai shavapa oá ivo tanaói ẽ aka”, akĩ.

²⁸ Aská avaini kashõ ãwẽ take kenavaíki aská akĩ. “Yosin ikiya neno nokói oshõ mia kenaai”, akĩ.

²⁹ Maria aská nĩkãinã vestẽi weníinavai kakĩ Jesus merai kakĩ.

³⁰ (Askámaĩnõ Jesusro Betânianamã nokókaĩma, Martã veyatachianamãse nii.)

³¹ Askámaĩnõ judeurasĩ Mariã shovõ ronaa tãti amai kãtxíyavorasĩ askái vestẽkai weníinakaĩi ãwẽ kaa oĩinã atxõvaĩvo, “ãwẽ take onévainamãsho wai iki kaai”, ravãki.

³² Askákaĩi kakĩ Jesus niá nokovaĩsho aa veyó pakéi kashõ “Yora Ivó, mia nokenĩse mĩ niáro ẽ take vopima ikenkeãvai”, akĩ.

³³ Aská Maria wai ikí, avé voayavo judeurasĩ wai ikí aká oĩinã Jesus onísi chinã naíkatõ ikí.

³⁴ “Atonamã mã roa avai?” ato ãwẽ akátõsho “Yora Ivó, neno oĩi kawã”, atõ imaĩnõ

³⁵ wai iinái.

³⁶ Askái ãwẽ wai imaĩno yorarasĩni “anõ noíkasho ãwẽ ikíki, oĩ”, ikívo.

³⁷ Askámaĩnõ wetsarasĩ “yora vesho ãwẽ roa aka nõ oĩvaimẽkĩ Lázaroro awesakĩ ãwẽ tenãrkĩ?” ikívo.

³⁸ Aská nĩkãinã Jesus ronã atxivarãóa tanainã ãwẽ onéa shasho pepinamã kaí. Anõ atõ kepovai ivo shasho anika kepióa.

³⁹ Aská anosho “naa shasho vepẽvãna”, ato ãwẽ akátõsho vopivaiyatõ aweshavo Marta askái. “Yora Ivó, ma ichnákawãai, ãwẽ anõ onévai ma 4 shaváaikatá”, ãwẽ akátõsho,

⁴⁰ “‘ea anõ akí mĩ niáro Yové Koĩni weeyai nishõ aká mĩ oĩkatsa’, ẽ ikitĩ”, akĩ.

⁴¹ Aská avaikĩ shasho pepi anõ ãwẽ kepóa ivo shasho sherekévo. Askánamãshóse Jesus naíkiri oĩnivaí askái vanai. “Papá, ea mekíai, ea mĩ nĩkãtõsho.

⁴² Ẽ tanasai, askatase mia ẽ yokáa ea mia nĩkãmtsãwa, askámẽkĩ neskái ẽ vana, naa ea kesó shokoarasĩni ‘“Yové Koĩni yonoáse”, ikĩ ea ave anõ anõvo’, iinã ẽ vanavere”, akĩ.

⁴³ Askái vanai enetaníse isĩinasho vanai. “Lázaró, kayakarã”, ãwẽ imaĩnõse,

⁴⁴ vopivaiya kayakarãi. Ãwẽ mevi, ãwẽ tae aka õpo kashkerasĩni rakópakéa, ãwẽ vemanero õpo kashke westítõse verákmeóa. Askámaĩnõ Jesusnẽ “kochana, ave katãnõ”, ato akĩ.

⁴⁵ Askávai judeurasĩ ravétõ Maria oĩi vevaiyavõ Jesusnẽ aská aká oĩinã anõ ayakeávo.

⁴⁶ Aská ravétõro Jesusnẽ aská aká ivo fariseurasĩ yoãshoi voávo.

⁴⁷ Atõ askámaĩnõ fariseurasĩ, Yové Koĩ ato vana ashõya kakáyavorasĩ aatíisho judeu vevokeparasĩ ato kenavarãsho kãtxísho vanavo. “Nõ awesakatsai? Aa yorã ãwẽ yové akarasĩ ãtsaka akĩ ato oĩmaai.

⁴⁸ Ãwẽ aská akarasĩ nõ teakémaro ashkãsho anõ amísivo. Romanorasĩni aská nĩkãinã nokekíse vesokéki, Yové Koĩni shovo, nokẽ mai aká noke ivõkemísivo”, ikívo.

⁴⁹ Askáki atopa yora wetsa, Caifás, Yové Koĩ ato vana ashõya kakáyapa ivo vanainái. “Mato tanama.

⁵⁰ Noke ashkãka noke keyóro roakamáse. Yora westíse ashkãmẽsho ikí ãwẽ vopiro roapáse”, ato akĩ.

⁵¹ Askái ãwẽ vanaro arí chinãne ãwẽ ikíma, aatiã Yové Koĩ ato vana ashõya kakáyapa ivosho “nokemẽsho ikí Jesus vopi askákatsa”, iinã vevo ãwẽ yoãrívi.

⁵² Judeurasĩ westíchta ravĩi ãwẽ ikatsaima. Yora õsi õsipa Yové Koĩni vakerasĩ maitioi peás ikí shokoyavo westíse keská iyakekatsai yoãnávere.

⁵³ Aatiã ãwẽ aska aka oĩinãse “Jesus nõ yamamanõ”, ikí vanai shovivo.

⁵⁴ Aská ato nakosho niátĩpase oĩinã, Jesus kaí, askata wenẽ kesotõ “Efraim” akĩ atõ anea shavapa ãwẽ shokõkenavonĩ nii kaí.

⁵⁵ Aská ano ãwẽ niátiã Jerusalémnamãsho Páscoa saí iki shavá omakaĩmaĩnõ judeurasĩ ano võo või, saí ikatsai vevo “nõ kashmai yoínõ”, iinã.

⁵⁶ Askái ano Yové Koĩni shovo veyó shokosho Jesus itimavaí arí vanavo. “Awesakatsí mã chinãnã? Okatsairmẽ, neno saí ikinamãnã”, ikívo.

⁵⁷ Anoshósevi Yové Koĩ ato vana ashõya kakáyarasĩ, fariseurasĩ aatíisho kepokatsikívo. Askáinã “Jesus meravaíki noke yoãshotsoma”, ikí shokovo.