Yozhanq Saw 6 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh hawj hajcien vunz gw imq

¹ Gij saeh neix goq le, Yehsuh goq aen huz Gyahliqliq bae. (Aen huz neix caemh heuh Dizbijlijyaq Haij.)

^2-4 Mwhde caemh dwg ij daengz aen ciet Youzdaiq vunz dih aen ciet Bienqgoqbae he lo. [2]Miz haujlai vunz gaen de bae, aenvih gyoengqde raen goq de gij geizmiuj ndaej yw vunz bingh mwnq. [3]De goq bae le, couh caeuq gyoengq lwgsae de hwnj gwnz bya bae naengh.

⁵ De naengh roengzma le, ngiengx raeuj hwnjdaeuj yawjraen miz baenx gyoengq vunz gaen de bae. De raen yienghneix le, couh doiq Feihliz boux lwgsae neix naeuz: “Gyoengqraeuz ij nwj bae cawx gij gw hawj gyoengq vunz mwnq gw nej?”

⁶ Yehsuh yienghneix naeuz dwg siengj sawqsawq Feihliz; gizsaed de gaenq rox ij baenzlawz guh lo.

⁷ Gajlaeng Feihliz han naeuz: “Cungjsuenq naeuz aeu songbak ngaenz bae cawx gij gw hwjx, cungj mbouj gaeuq gyoengqde gw boux gaemz hwx!”

⁸ Yiengq miz daixlingh boux lwgsae, gij coh de heuh Anhdwzlez, couh dwg daegnuengx Sihmaenz-Bijdwz, de doiq Yehsuh naeuz:

⁹ “Dineix miz laeq lwgngez he; de daiq miz haj aen menqbauh caeuq song duz bya, hoeng, baenxbienh vunz, ij baenz gaeuq faen hawj gyoengqde gw hwj?”

¹⁰ Yehsuh dingq le, couh doiq gyoengq lwgsae de naeuz: “Faenhsou hawj gyoengqde naengh roengzma.” (Yienzlaiz mwnq dwg dieg nywj he.) Gajlaeng gij vunz caemh naengh roengzma lo. Mwhde caenhgag suenq vunzsai daihgaiq miz hajcien vunz yienghneix.

¹¹ Gyoengq vunz naengh roengzma le, Yehsuh couh dawz menqbauh hwnjdaeuj docih Cangqdiq, couh faen hawj gyoengq vunz gw. Caemh doxdoengz, de caemh dawz bya faen hawj gyoengqde gw; gyoengq vunz caemh ndaej seizbienh gw.

¹² Gajlaeng gyoengqde gw imq le, Yehsuh couh doiq doengh boux lwgsae de naeuz: “Dawz doenghheij menqbauh gw lij lw he coux hwnjdaeuj. Mbouj ndaej langqfeiq.”

¹³ Gyoengq lwgsae dingq de yienghneix naeuz le, couh dawz gij menqbauh gyoengq vunz gw lij lw he coux hwnjdaeuj, coux ndaej baenx cibngeih lamz rim.

¹⁴ Gyoengq vunz raen Yehsuh guh gij geizmiuj neix le, cungj naeuz: “Bouxn'x cingqcaen dwg boux daeuj lajmbwn cenz gij vah Cangqdiq mwnq he lo!”

¹⁵ Yehsuh dingq ndaej ok gij vah gyoengqde, couh dwg naeuz gyoengqde siengj ep de guh vuengz. Gajlaeng de couh gag caiq hwnj caek gwnz bya he bae.

Yehsuh byaij youq gwnz raemx

¹⁶ Yiengq daengz haemh le, gyoengq lwgsae de couh roengz bya ma, bae daengz henz huz,

¹⁷ ij naengh ruz bae Gyahbwznungz Singz, hoeng, Yehsuh vanzlij mijyaengz daeuj daengz gyoengqde mwnq, mbwn caemh laep lo.

¹⁸ Cingq youq mwh gyoengqde naengh ruz bae Gyahbwznungz hih mwhde, sawqmwh youq gwnz huz fan ndaek raq rumz hung he, ci hwj raemx fan foedfoed bae.

¹⁹ Gyoengq lwgsae buekmingh vad ruz. Yiengq daihgaiq vad bae ndaej daengz cib lai leix gyae yienghneix le, sawqmwh gyoengqde yawjraen Yehsuh youq gwnz raemx cingq yiengq aen ruz gyoengqde byaij daeuj. Gyoengqde raen le, cungj lau hwj ij rai bae.

²⁰ Yehsuh raen yienghneix le, couh majcangq doq vued gyoengqde naeuz: “Gaejyungh lau; dwg gou lah!”

²¹ Gyoengqde dingq le, cungj angq hwj ij rai, gajlaeng couh ciep Yehsuh hwnj ruz bae. Couh youq mwhneix, aen ruz couh majcangq bae daengz mwnq gyoengqde ij bae he lo.

Yehsuh couh dwg boux ciengx mingh

²² Daengz daixngeih ngoenz, youq hamq huz baihneix hih gyoengq vunz mwnq rox naeuz dimwnq caenhgag miz aen ruz dog, caemh rox Yehsuh gaenhbaenj mbouj caeuq gyoengq lwgsae de hwnj ruz bae.

²³ Gajlaeng miz geij aen ruz daj Dizbijlijyaq Singz daeuj daengz henz hamq huz mwnq dingz; mwnq couh dwg gaenh mwnq ngoenz gaxgonq Yehsuh euj bingj faen hawj vunz gw hih mwnq.

²⁴ Gajlaeng gyoengqde rox Yehsuh caeuq doenghheij lwgsae de cungj mbouj youq mwnq, couh hwnj ruz bae, naengh ruz bae Gyahbwznungz cimh Yehsuh.

²⁵ Gyoengqde youq baih huz baih de ndaej raen Yehsuh, couh doiq de naeuz: “Lahbij, mwngz seizlaw daeuj daengz dineix lah?”

²⁶ Yehsuh han gyoengqde naeuz: “Gou saedsaeh naeuz sou ni, faenhsou cimh gou, gaenhbaenj mbouj dwg vih ij ndaej yawjraen gij geizmiuj ndaej cingqmingz gou dwg byawz he, dauq dwg vih ij ndaej gw menqbauh hwj imqaq lah.”

²⁷ De vanzlij caiq naeuz: “Faenhsou gaejyungh vih gij gw gij rox naeuh rox lanh hih hwj roengzrengz, dauq ij vih Vunz dih Daiqbiuj soengq hawj faenhsou hih seiqseiz mbouj rox naeuh hih gij gw hwj roengzrengz guh hong cij deng, aenvih Vunz dih Daiqbiuj dwg Cangqdiq Bohmbwn nginh hih, cingqmingz hih.”

²⁸ Gyoengq vunzlai dingq de yienghneix naeuz le, couh cam de naeuz: “Yiengq gyoengqraeuz ij baenzlaw guh cij deng, cij suenq dwg guh gij hong Cangqdiq nej?”

²⁹ Yehsuh han naeuz: “Sinq Cangqdiq baij daeuj hih boux mwnq, couh dwg guh gij hong Cangqdiq lo.”

³⁰ Gajlaeng gyoengqde caiq cam naeuz: “Yiengq mwngz ij guh gijmaz geizmiuj hwj hawj gyoengqraeuz yawj le, couh sinq mwngz nej? Mwngz dauqdaej daeuj guh gijmaz saeh nej?

³¹ Cojgoeng raeuz youq rogndoi vanzlij ndaej miz mahnaq gw goq, cingq luj ndaw Singqgingh ndaw de sij naeuz: De daj gwnzmbwn coengq gij gw hawj gyoengqde gw.”

³² Hoeng Yehsuh dauq han gyoengqde naeuz: “Gou saedsaeh naeuz sou ni, daj gwnzmbwn coengq gij gw roengzdaeuj hawj faenhsou gw hih gaenhbaenj mbouj dwg Mohsih; dwg boh gou daj gwnzmbwn coengq gij gw caen he hawj faenhsou gw lah,

³³ aenvih Cangqdiq hawj hih gij gw dwg daj gwnzmbwn coengq roengzdaeuj he, dwg hawj lajmbwn sojmiz hih vunz miz mingh he.”

³⁴ Gyoengqde dingq le, couh cam de naeuz: “Goengjau, cingj mwngz ngoenzngoenz hawj gij gw neix hawj gyoengqraeuz bax!”

³⁵ Yehsuh han naeuz: “Gou couh dwg gij gw hawj vunz miz mingh he lo. Gaep haeuj gou hih vunz gaengjdingq mbouj rox iek; sinq gou hih vunz seiqseiz mbouj rox hozhawq.

³⁶ Hoeng gou doiq faenhsou naeuz goq, gannaeuz faenhsou ndaej raen gou goq lah, hoeng, faenhsou dauq mbouj sinq gou.

³⁷ Famz boh soengq hawj gou hih vunz, gaengjdingq daeuj gaep haeuj gou; gaep haeuj gou hih vunz, gou gaengjdingq mbouj vwt de,

³⁸ aenvih gou dwg daj gwnzmbwn roengz daeuj he; mbouj dwg ciuq gij cawjeiq bonjfaenh gou ma guh he, dwg ciuq gij cawjeiq boux baij gou daeuj hih guh he.

³⁹ Boux baij gou daeuj hih gij iqswh de dwg: de soj soengq hawj gou hih, hawj gou ityiengh cungj mbouj ndaej lauq; daengj daengz ngoenz gatsat he, gou ij hawj gyoengqde dauqlix,

⁴⁰ aenvih gij iqswh boh gou couh dwg naeuz, hawj sojmiz raen daeglwg de couh sinq de hih vunz couh ndaej seiqseiz lix, caemh youq ngoenz gatsat he, gou ij hawj gyoengqde dauqlix.”

⁴¹ Gij vunz Youzdaiq dingq Yehsuh naeuz bonjfaenh de couh dwg daj gwnzmbwn coengq roengzdaeuj hih gij gw he le, couh lwnh yebyeb naeuz:

⁴² “Aeq, bouxn'x mbouj dwg Yehsuh, daeglwg Yozswz maz? Bohmeh de gyoengqraeuz cungj rox hah; de vihmaz naeuz de dwg daj gwnzmbwn roengz daeuj hih nej?”

⁴³ Yehsuh dingqri le, couh doiq gyoengqde naeuz: “Faenhsou gaejyungh gangj yebyeb lo.

⁴⁴ Hauhnaeuz mbouj dwg baij gou daeuj hih daxboh iuyinx vunz, couh mij vunz ndaej gaep haeuj buek vunz gou. Gaep haeuj buek vunz gou hih, daengz ngoenz gatsat, gou couh hawj de dauqlix.

⁴⁵ Bonj saw boux cenz gij vah Cangqdiq ndaw de yienghneix sij naeuz: ‘Gyoengqde cungj ij ndaej daengz Cangqdiq son gyoengqde.’ Gawq neix dwg ceij famz dingq Cangqdiq daxboh son caemh ciuq de son hih yienghmwnq bae guh hih, cungj ij gaep haeuj gou.

⁴⁶ Gij neix mbouj dwg naeuz miz vunz raen goq Cangqdiq Bohmbwn; caenhgag dwg boux dajlaeng Cangqdiq daeuj he cij ndaej raen de goq he.

⁴⁷ “Gou saedsaeh naeuz sou ni, sinq gou hih vunz couh ndaej seiqseiz lix.

⁴⁸ Gou couh dwg miz mingh hih gij gw.

⁴⁹ Cojgoeng faenhsou youq rogndoi gw goq mahnaq, hoeng vanzlij dwg ngaiz rai lo.

⁵⁰ Hoeng, daj gwnzmbwn roengz daeuj hih gij gw, vunz gw le, mbouj rox rai.

⁵¹ Gou couh dwg daj gwnzmbwn roengz daeuj hih gij gw miz mingh; vunz gw gij gw neix couh ndaej seiqseiz lix. Gou hawj hih gij gw couh dwg gij noh gou, muzdiz dwg ij hawj vunz ndaej miz mingh hih.”

⁵² Gij vunz Youzdaiq dingq Yehsuh gangj gij vah neix le, cungj doxcwngq oxox naeuz: “Boux vunz bouxn'x ij baenz dawz gij noh bonjfaenh ma hawj gyoengqraeuz gw hwj nej?”

⁵³ Yehsuh caiq doiq gyoengqde naeuz: “Gou saedsaeh naeuz sou ni, hauhnaeuz faenhsou mbouj gw gij noh Vunz dih Daiqbiuj, mbouj gw gij lwed Vunz dih Daiqbiuj, couh mij'z mingh lo.

⁵⁴ Gw gij noh gij lwed gou hih vunz couh ndaej seiqseiz lix; daengz ngoenz gatsat, gou couh hawj de dauqlix.

⁵⁵ Gij noh gij lwed gou cingqcaen dwg ndaej gw hih.

⁵⁶ Gw gij noh gij lwed gou hih vunz ndaw sim de siengzseiz miz gou, gou caemh miz de.

⁵⁷ Hawj miz mingh dih daxboh baij gou daeuj; gou dwg baengh de cij ndaej lix he. Caemh doxdoengz, gw gou hih vunz couh dwg baengh gou cij ndaej lix he.

⁵⁸ Gou dwg daj gwnzmbwn roengz daeuj hih gij gw caen he. Gw gij gw neix hih vunz ndaej seiqseiz lix, mbouj luj cojgoeng faenhsou gannaeuz ndaej gw goq mahnaq lah, hoeng, ciuqyiengh ngaiz rai.”

⁵⁹ Yehsuh gangj doenghgij vah neix hih mwhde, dwg youq Gyahbwznungz veiqdangz son vunz mwhde gangj he.

Haujlai lwgsae mbouj gaen Yehsuh

⁶⁰ Yiengq miz haujlai lwgsae dingq de gangj doenghgij vah neix le, couh lwnh naeuz: “Gij vah neix daiq hoj dingq hoh; byawz souh ndaej hax?”

⁶¹ Yehsuh rox gyoengq lwgsae de lwnh gij saeh neix le, couh doiq gyoengqde naeuz: “Gij vah neix hawj faenhsou dwgcaengz, mbouj sinq haj?

⁶² Hauhnaeuz faenhsou yawjraen Vunz dih Daiqbiuj dauq hwnj gwnz yienzlaiz de maj nex, ij baenzlaw yiengh nej?

⁶³ Hawj vunz miz mingh hih dwg Hoenzsaenz Cangqdiq, mbouj dwg ndangnoh; ndangnoh mij'z yungh. Gou doiq faenhsou soj gangj hih vah cungj dwg gangj daengz Hoenzsaenz Cangqdiq hawj vunz ndaej miz mingh hih.

⁶⁴ Hoeng, faenhsou ndaw de miz hih vunz mbouj sinq.” Gizsaed, Yehsuh senqsi cix rox byawz mbouj sinq de, byawz ij buenqduz cuzmaiq de lo.

⁶⁵ Yehsuh vanzlij caiq naeuz: “Sojhij gou doiq faenhsou naeuz goq: ‘Hauhnaeuz mbouj dwg daxboh hawj, mij'z vunz ndaej gaep haeuj gij vunz gou.’”

⁶⁶ Miz haujlai lwgsae dingq de gangj doenghgij vah neix le, couh mbouj caiq gaen de haem lo.

⁶⁷ Yehsuh raen yienghneix le, couh cam cibngeih boux lwgsae de naeuz: “Faenhsou caemh ij mbouj gaen gou haz?”

⁶⁸ Yiengq Sihmaenz-Bijdwz han naeuz: “Bouxcawj gou hax, raeuz mbouj gaen mwngz, ij gaen byawz? Caenhgag mwngz cij ndaej naeuz raeuz ni ndaej seiqseiz lix hih gij siuhsiz neix hah!

⁶⁹ Gyoengqraeuz sinq, caemh rox mwngz dwg boux gvi hawj Cangqdiq mwnq he hih.”

⁷⁰ Yehsuh dingq le, han naeuz: “Gou mbouj dwg senj aeu faenhsou cibngeih boux maz? Hoeng, miz boux he yak luj fangzvuengz.”

⁷¹ Yehsuh gangj gawq vah neix dwg ceij Youzdaq, daeglwg Sihmaenz, Gyahloz vunz gangj he. Youzdaq dwg cibngeih boux lwgsae ndaw de dih boux he, couh dwg gajlaeng buenqduz hai de hih boux mwnq lo.