Yozhanq It 1 - Gij Baujcingq Moq Caeuq Geij Bonj Gij Baujcingq Daeuzdaeuz

Gij vah miz mingh

¹ Gyoengqraeuz seizneix sij saenq naeuz faenhsou ni gvanhhih gij vah Cangqdiq daiq miz mingh he. Gij vah daiq miz mingh neix couh dwg daj gaihcij cix senqsi miz hih, caemh dwg gyoengqraeuz soj dingqri, soj yawjraen hih, caeuq gyoengqraeuz soj mo goq hih.

² Gij mingh neix gaenq yienh okdaeuj lo; gyoengqraeuz caemh yawjraen goq, caemh ndaej cingqmingz naeuz dwg saedsaeh he. Gij mingh neix daj gaihcij cix caeuq Bohmbwn itheij he; de caemh yienh okdaeuj hawj gyoengqraeuz raen goq. Gyoengqraeuz seizneix cenz naeuz sou ni hih couh dwg gij mingh mbouj rox rai neix.

³ Gyoengqraeuz dawz soj yawjraen hih, soj dingqri hih cungj cenz naeuz faenhsou ni, hawj faenhsou rox le, couh gaep haeuj buek vunz gyoengqraeuz, yiengq caemhdangq ndaej gaep haeuj Bohmbwn caeuq daeglwg de Yehsuh Gihduz lo.

⁴ Gyoengqraeuz sij saenq naeuz faenhsou ni dwg hawj gyoengqraeuz bouxboux ndaw sim cungj angq.

⁵ Seizneix gyoengqraeuz dawz gij siuhsiz dajlaeng Yehsuh Gihduz dingq daengz hih cungj cenz naeuz faenhsou ni, couh dwg Cangqdiq dwg rongh hih; youq ndaw sim de mbouj miz saek di laep.

⁶ Yiengq, hauhnaeuz gyoengqraeuz naeuz gyoengqraeuz caeuq de caemh buek vunz he, hoeng, gyoengqraeuz goq dih saedceij cungj dwg laep saengxsaengx he, yiengq couh dwg naeuz gyoengqraeuz gangj gyajvah, mbouj ciuq saedsaeh goq saedceij lo.

⁷ Yiengq, caiq hauhnaeuz gyoengqraeuz goq dih saedceij cungj dwg rongh sagsag he, luj Cangqdiq youq ndaw rongh yienghmwnq, gyoengqraeuz couh ndaej doxgaep guh buek vunz he lo, gij lwed daeglwg de Yehsuh caemh dawz gij coih raeuz swiq cengh lo.

⁸ Hoeng, hauhnaeuz gyoengqraeuz naeuz gyoengqraeuz mij'z coih, yiengq couh dangq bonjfaenh gag yaeuh bonjfaenh, ndaw sim gyoengqraeuz couh mbouj miz saedsaeh lo.

⁹ Yiengq, hauhnaeuz gyoengqraeuz nginh coih, Cangqdiq couh mienx gij coih gyoengqraeuz, swiq cengh gij uekcueg gyoengqraeuz, aenvih Cangqdiq dwg boux gangj vah gw vah he, caemh dwg ciuq saedsaeh bae guh he.

¹⁰ Hauhnaeuz gyoengqraeuz naeuz gyoengqraeuz mij famh coih goq, yiengq gyoengqraeuz couh dangq dawz Cangqdiq ma yawj dwg boux gangj gyajvah he hih vunz lo, ndaw sim gyoengqraeuz caemh mbouj miz gij vah de lo.