Ok Ngaihgiz 34 - Gij Baujcingq Moq Caeuq Geij Bonj Gij Baujcingq Daeuzdaeuz

Doiqyungz siuq guh baj rin dik miz fazliz he

¹ Yehhozvaz raengq Mohsih naeuz: “Mwngz ij siuq song baj rin luj song baj rin gaxgonq mwnq; gou ij dawz ngaiz mwngz dub soiq hih song baj rin gwnz de dik miz fazliz hih doiqyungz dik hwnj gwnz de bae.

² Mwngz ij cwnjbiq ndei ngoenzcog doengxhaet daihcaeux, hwnj gwnz dingj bya Sihnaiq bae cimh gou.

³ Mboujcwnj miz vunz gaen mwngz hwnj bae. Baenx aen bya cungj mboujcwnj miz vunz, laj dinbya caemh mboujcwnj miz cwz, miz yiengz gw nywj.”

⁴ Yiengq Mohsih couh siuq song baj rin luj song baj gaxgonq ityiengh. Daengz ngoenz daixngeih daihcaeux, de couh ciuq Yehhozvaz raengq hih yienghmwnq, dawz song baj rin hwnj gwnz dingj bya Sihnaiq bae lo.

⁵ Yehhozvaz youq ndaw fwj caeuq gij fwj roengz daeuj, ndwn youq Mohsih ndwn youq hih mwnq, couh gag heuh ‘Yehhozvaz,’ gij coh bonjfaenh de.

⁶ Gajlaeng Yehhozvaz daj dangqnaj Mohsih goq bae, couh naeuz: “Gou dwg Yehhozvaz! Gou dwg miz cojgvaq caiq sim'unq he dih Cangqdiq, mbouj laizluenh fatheiq, cix lauxsaed cix aiq vunz raixcaix he dih Cangqdiq.

⁷ Gij aiq gou louz daengz cien nienz fanh daih, caemh mienx coih, mienx gij doegdoeg siebsieb he, hoeng, gou caemh mbouj dawz miz coih dangq mij coih ma yawj, dauqfanj ij fad boux miz coih he, fad daengz sam seiq daih gajlaeng de bae.”

⁸ Mohsih dingq le, nyungjnyat bomz roengz doem bae sax,

⁹ naeuz: “Yehhozvaz hax, hauhnaeuz mwngz ndiep gou nex, gouz mwngz buenx raeuz caeuq raeuz bae. Gannaeuz gyoengq vunz neix nga'ngangq raixcaix lah, hoeng, cungj gouz mwngz mienx gij coih gyoengqraeuz, sou gyoengqraeuz ma guh gij gyadangq mwngz bax.”

Doiqyungz baujcingq

¹⁰ Yehhozvaz caiq doiq Mohsih naeuz: “Seizneix gou ij baujcingq, ij youq dangqnaj gij vunz Hijswzlez guh gij saeh geizmiuj he, youq lajmbwn sojmiz hih dieg, sojmiz hih minzcuz cungj mijyaengz raen goq he. Gij vunz seiqhenz mwngz cungj rox dwg gou, Yehhozvaz guh he, aenvih gou guh hih gij saeh neix dwg hawj vunz lau he.

¹¹ Gou caemh ij bang mwngz boenq Yaqmohliq vunz hah, Gyahnamz vunz hah, Hwz vunz hah, Bijliqsij vunz hah, Hihveiq vunz hah, Yehbuqswh vunz hah deuz bae. Gou yienghneix bang mwngz, yiengq mwngz caemh ij soenhsouj gou dingh hawj mwngz hih,

¹² couh dwg mwngz ijaeu siujsim, mwngz mbouj ndaej caeuq doenghgij vunz mwnq mwngz bae daengz goq he doxdingh gijmaz, hoengjlau mwngz ngaiz luj duz nou yienghmwnq ngaiz aen canggaep gaep dawz.

¹³ Dauqfanj vanzlij ij cek aen daiz dajbwiz gyoengqde, dub soiq dongqsix caeuq duz you gyoengqde.

¹⁴ “Mbouj ndaej baiq gak cungj you, aenvih gou, Yehhozvaz, rahoengz he; gij coh gou couh dwg ‘Rahoengz.’

¹⁵ Mwngz mbouj ndaej caeuq gij vunz dieg mwnq miz gijmaz doxdingh, hoengjlau gyoengqde baiq gij you gyoengqde, bwiz gij you gyoengqde caemh iu faenhsou bae gw gij noh dajbwiz de, guh gij saeh mbouj ya mbouj yongq he.

¹⁶ Daeglwg faenhsou caemh veiq aeu gij lwgsau gyoengqde ma guh yah. Dahlwg gyoengqde caemh baiq gij you gyoengqde, caemh hawj daeglwg faenhsou gaen gyoengqde baiq.

¹⁷ “Faenhsou mbouj ndaej gag cauh you ma baiq.

¹⁸ “Faenhsou ij souj aen ciet Cawz Yauqmuj he, ij ciuq gou raengq mwngz hih, youq ndwen Yaqbiz soj gveihdingq hih, ij gw caet ngoenz mij fat goq hih bingj, aenvih faenhsou dwg youq ndwen Yaqbiz ndaej ok Ngaihgiz ma he.

¹⁹ “Daeglwg daeuz faenhsou caeuq sojmiz roengz daixdaeuz hih cukseng daeg, mboujguenj cwz haj cixnaeuz yiengz, cungj dwg gvi hawj gou.

²⁰ Hoeng, doengh duz lawz roengz daixdaeuz he ndaej aeu yiengzlwg ma cueg; hauhnaeuz mbouj cueg ma nex, couh ij ngaiz doh gij hoz duz de raek. Faenhsou sojmiz seng daixdaeuz hih lwg vunzsai cungj ij cueg ma. “Faenhsou mbouj ndaej fawz hoengq daeuj yawj gou.

²¹ “Faenhsou ndaej guh roek ngoenz hong, hoeng, daixcaet ngoenz, faenhsou ij yietbaeg; cungjsuenq naeuz daengz mwh dajndaem dajsou he, caemh ij ciuqyiengh yietbaeg.

²² “Daengz ndaej sou mienh mwhde, ij souj aen ciet Caetcaet, gyau gij mienh ngamq sou moq haeujma he. Daengz nienzdaej, caemh ij souj aen ciet Diuh Mienh.

²³ “Ndaw ranz faenhsou sojmiz hih vunzsai, binaengz daengz sam aen ciet neix caemh ij daeuj bwiz gou, Yehhozvaz, Hijswzlez dih Cangqdiq.

²⁴ Gou ij dajlaeng faenhsou mwnq boenq lingh aen minzcuz deuz, hawj faenhsou ndaej miz dieg lai; daengz binaengz faenhsou daeuj baiq gou, Yehhozvaz, sam mbat mwhde, couh mbouj lau miz vunz daeuj ciemq aeu gij dieg faenhsou lo.

²⁵ “Mwngz dawz gij lwed doenghduz daeuj dajbwiz hih mwhde, mbouj ndaej dawz gij bingj fat goq he daeuj doxcaeuq dajbwiz. “Doenghgij noh bwiz aen ciet Bienqgoqbae hih, mbouj ndaej diuh daengz haet daixngeih.

²⁶ “Mwngz ij dawz mwngz soj sou ndaej haeujma hih, ij aeu gij sou ceiq daixdaeuz he dawz bae soengq hawj gou, Yehhozvaz, mwngz dih Cangqdiq. “Mbouj ndaej aeu nauq yiengzmeh ma cawj duz yiengzlwg bonjfaenh de.”

²⁷ Yehhozvaz vanzlij raengq Mohsih naeuz: “Mwngz ij dawz doenghgij vah neix sij hwnjdaeuj, aenvih gou ij dawz gij vah neix ma guxdingh, dingh baujcingq lienz diuzgyenq hawj mwngz caeuq gij vunz Hijswzlez.”

²⁸ Couh yienghneix, Mohsih youq gwnz bya laeng Yehhozvaz mwnq youq baenx seiqcib ngwnzngoenz, mbouj gw haeux, mbouj gw raemx. Gajlaeng Yehhozvaz vanzlij dawz cib diuz fazliz dik hwnj gwnz song baj rin neix bae.

Mohsih naj rongh sagsag

²⁹ Mohsih dawz song baj rin dik miz cib diuz fazliz he daj gwnz bya Sihnaiq roengz ma mwhde, cungj mbouj rox bonjfaenh de vih Yehhozvaz caeuq de gangj vah hwj naj rongh sagsag.

³⁰ Yaqlwnz caeuq gij vunz Hijswzlez raen baj naj Mohsih rongh sagsag le, cungj lau hwj mbouj gamj dep de.

³¹ Mohsih raen yienghneix le, couh heuh gyoengqde goq daeuj, yiengq Yaqlwnz caeuq gij vunz Hijswzlez hih doengh boux lingjdauj he cungj goq laeng de daeuj. Mohsih couh caeuq gyoengqde gangj vah.

³² Gajlaeng gij vunz Hijswzlez caemh daeuj dep de, yiengq de couh gangj naeuz gyoengqde ni Yehhozvaz dih mingqlingq.

³³ Mohsih caeuq gyoengqde gangj sat le, couh aeu sujbaq ma goemq naj hwj.

³⁴ Moix it mbat Mohsih bae caeuq Yehhozvaz gangj vah mwhde, cungj dwg dawz mbaw sujbaq goemq naj de roengz; moix it mbat Yehhozvaz caeuq de gangj vah, de cungj caiq ok ma gangj naeuz gyoengq vunz ni Yehhozvaz caeuq de gangj hih vah.

³⁵ Mohsih raen gyoengq vunz lau raen baj naj de rongh, youhcaiq doiqyungz aeu sujbaq ma goemq naj hwj, goemq daengz de caiq bae caeuq Yehhozvaz gangj vah mwhde cij dawz mbaw de roengz.